ۋنيۆەرسيادا الاۋىن الماتىعا جەتكىزۋ نازىم يشانوۆاعا تاپسىرىلدى

اتىراۋ. قازاقپارات - اتىراۋ وبلىسى بويىنشا ۋنيۆەرسيادا الاۋىن الماتىعا جەتكىزۋ ميسسياسى ستۋدەنت نازىم يشانوۆاعا تاپسىرىلدى، دەپ حابارلايدى «قازاقپارات» ح ا ا ءتىلشىسى.

نازىمنىڭ كانديتاتۋراسى اتىراۋداعى الپىس الاۋگەردىڭ اراسىنان تاڭداپ الىنىپ وتىر. ويتكەنى، ول - ۆەتنامدا وتكەن چەمپيوناتتا ايەلدەر اراسىنداعى بوكستان قولا جۇلدە يەلەنگەن، قازاقستاننىڭ ءتورت دۇركىن چەمپيونى جانە حالىقارالىق جارىستاردىڭ التىن مەدال يەگەرى.

اتىراۋ وبلىسىندا الاۋ ەستافەتاسى 27- قاڭتاردا وتەدى دەپ بەلگىلەنگەن. ەستافەتا ەكى ساتىدان تۇرادى. الاۋگەرلەردىڭ ءبىرىنشى توبى الاۋدى اتىراۋ مەملەكەتتىك مۇناي جانە گاز ۋنيۆەرسيتەتىنەن ماحامبەت اتىنداعى دراما تەاترعا دەيىن الىپ وتسە، ەكىنشى توپ دراما تەاتردان ح. دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنە دەيىن باعىتتا ءجۇرىپ وتەدى.

الاۋگەرلەردىڭ قاتارىندا اتىراۋدىڭ ماقتان تۇتار سپورتشىلارى، وقۋ وزاتتارى، ۇزدىك ستۋدەنتتەر جانە قوعام بەلسەندىلەرى بار. ولار ح. دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ الدىندا الاۋدى نازىم يشانوۆاعا تابىستايتىن بولادى. نازىم 29- قاڭتاردا الماتىدا وتەتىن دۇنيەجۇزىلىك قىسقى ۋنيۆەرسيادانىڭ اشىلۋىنا اتىراۋدىڭ اتىنان قاتىسادى. وسىلايشا، ءار وبلىستان تاڭدالعان 16 الاۋ كوتەرۋشى ۋنيۆەرسيادا تورىندە الاۋدى ءبىر توستاعاندا بىرىكتىرمەك.

ۋنيۆەرسيادا الاۋى قازاقستاننىڭ 22 مىڭ شاقىرىمىندا ساپار شەكسە، ونىڭ ەكى ءجۇز شاقىرىمىن الاۋ كوتەرۋشىلەر ءجۇرىپ وتەدى دەپ جوسپارلانعان.