وقۋشىعا ءۇي تاپسىرماسىن بەرگەن دۇرىس پا؟

استانا. قازاقپارات - جۋىردا الەۋمەتتىك جەلىلەردىڭ بىرىندە امەريكالىق ۇستازداردىڭ، فين مەكتەپتەرىنىڭ وقۋشىلارعا ءۇي تاپسىرماسىن بەرمەيتىندىگى جونىندە اقپارات تارادى.
None
None

 وسىنى وقىپ، «ءبىزدىڭ مەكتەپتەردە دە وقۋشىعا ءۇي تاپسىرماسى بەرىلمەسىن» دەگەن پىكىرلەر تۋىندادى. وسى ۋاقىتقا دەيىن ماسەلە رەتىندە كوتەرىلمەگەن، زاڭدىلىق رەتىندە قاراستىرىلعان ءۇي تاپسىرماسى نەگە ءدال بۇگىن وسىنشالىقتى وزەكتى ماسەلەگە اينالدى؟ اتا- انالار ايتىپ جۇرگەندەي، ءۇي تاپسىرماسىنىڭ وقۋشىعا زيانى بار ما؟

داۋدىڭ باسى...

«داۋدىڭ باسى - دايرابايدىڭ كوك سيىرى» ەمەس، برەندي يانگ دەگەن امەريكالىق ۇستازدىڭ باستاماسى بولدى. ول اتا- انالار جينالىسىندا جىل سوڭىنا دەيىن وقۋشىلارعا ءۇي تاپسىرماسىن بەرۋدەن باس تارتتى. سەبەپ: ءۇي تاپسىرماسى وقۋشىلاردىڭ كوپ ۋاقىتىن الادى، سالدارىنان بالا اتا- اتاسىمەن ۋاقىت وتكىزۋدىڭ ورنىنا كىتاپقا شۇقشيىپ وتىرادى.

برەندي يانگتىڭ حاتى

برەندي يانگتىڭ اتا- انالارعا جازعان حاتى. وندا جىل سوڭىنا دەيىن وقۋشىلارعا ءۇي تاپسىرماسى بەرىلمەيتىنى، تەك ساباقتا ورىنداپ ۇلگەرمەگەن تاپسىرمالاردى اياقتايتىنى، ءۇي تاپسىرماسىنا جۇمسالىپ جۇرگەن ۋاقىتتا بالانىڭ وتباسىمەن بىرگە كەشكى اس ءىشىپ، كىتاپ وقىپ، سەرۋەندەگەنى، ەرتەرەك ۇيىقتاعانى دۇرىس ەكەنى جازىلعان.

ءۇي تاپسىرماسىن ورىنداۋعا بالاسىن كوندىرە الماي جۇرگەن اتا- انا، ارينە، بۇل باستاماعا قۋاندى، قولدادى. ءتىپتى ءبىرقاتار امەريكالىق عالىمدار دا قارسى شىقپادى. رەسەيلىك «لايف حاكەر» پورتالىنىڭ جازۋىنشا، ءۇي تاپسىرماسىنىڭ بالاعا 6 ءتۇرلى زيانى بار- مىس. ولار:

1. بالانىڭ دەنساۋلىعىنا كەرى اسەر ەتەدى

سەبەبى، ول تاپسىرمانىڭ كوپتىگىنەن از ۇيىقتايدى، ومىرتقاسى قيسايىپ، گاستريت، سوزىلمالى شارشاۋ پايدا بولادى.

2. كوپ ۋاقىت الادى

بوستون كوللەدجىنىڭ پروفەسسورى پيتەر گرەيدىڭ ايتۋىنشا، بالا ماتەماتيكا مەن باعدارلامالاۋدى ۇيرەنەمىن دەپ، ءومىر ءسۇرۋدى ۇيرەنە المايدى. سەبەبى، ول مەكتەپتەن شىققان سوڭ رەپەتيتورعا، ءتۇرلى ۇيىرمەلەرگە بارادى، ءۇي تاپسىرماسىن ورىنداۋ - ارتىق جۇك.

3. وقۋشى ۇلگەرىمىنە اسەر ەتپەيدى

ءبىلىم بەرۋ سالاسىنداعى بىرەگەي ساراپشىلاردىڭ ءبىرى الفي كون «ءۇي تاپسىرماسى تۋرالى ميفتەر» كىتابىندا تومەنگى سىنىپتاعىلار ءۇشىن ءۇي تاپسىرماسىنىڭ ەشقانداي ماڭىزى جوق ەكەنىن، جوعارعى سىنىپتاردا دا ونىڭ پايداسى از ەكەنىن جازادى. الايدا ونىمەن ءبارى بىردەي كەلىسپەيدى.

 توم شەررينگتون دەگەن وقىتۋشى باستاۋىش سىنىپ وقۋشىسىنا تاپسىرمانى ۇيگە بەرگەننەن پايدا از ەكەنىن راستادى، دەگەنمەن 11 جاستان اسقان وقۋشى ءۇي تاپسىرمالارىن ورىنداۋ ارقىلى ەلەۋلى جەتىستىكتەرگە قول جەتكىزەتىنىن ايتتى. ال، TMISS زەرتتەۋ ورتالىعى ءار ەلدەگى وقۋشىلاردىڭ ءۇي تاپسىرماسىن ورىنداۋعا جۇمسايتىن ۋاقىتىن زەرتتەدى. ناتيجەسىندە ءتورتىنشى سىنىپتاعى وقۋشىلاردىڭ تەك 7 پايىزى عانا ءۇي تاپسىرماسىن ورىندامايتىنى بەلگىلى بولدى.

4. ءۇي تاپسىرماسى ەشتەڭە ۇيرەتپەيدى

تاپسىرمالار شىنايى ومىردەن الشاق. بالالاردىڭ ميى تەك فاكتىلەر مەن تەورەمالارعا تولىپ كەتكەن، الايدا ولار ونى قورىتا المايدى.

6. وقۋعا دەگەن نيەتتى وشىرەدى

سەبەبى وقىتۋشى ءۇي تاپسىرماسىنا ءوزىنىڭ ساباق ۋاقىتىندا ايتىپ ۇلگەرمەگەن تاقىرىپتارىن بەرەدى. ناتيجەسىندە بالاعا ءتۇسىنۋ قيىنعا سوعادى.

7. اتا- انا مەن بالا اراسىنداعى قارىم- قاتىناستى بۇزادى

كوپتەگەن اتا- انالار ءۇي تاپسىرماسىن بالاسىمەن بىرگە نەمەسە بالاسى ءۇشىن ورىندايدى. مەكتەپ باعدارلاماسى اۋىسىپ كەتكەن، ال اتا- انانىڭ ءبىلىمى «ەسكىرگەن». نەمەسە بالا تاپسىرامىن ورىنداعىسى كەلمەيدى، اتا- انا وعان دۇرىس موتيۆاتسيا بەرە المايدى. ناتيجەسىندە كەلىسپەۋشىلىك، ۇرىس- كەرىس تۋىندايدى.

قازاقستاندىقتار نە دەيدى؟

قاي كەزدە دە داتتاۋشىعا جاقتاۋشى دا، اقتاۋشى دا تابىلادى. كوپشىلىك پىكىر ءۇي تاپسىرماسىن بالا ءۇشىن اتا- اناسى ورىنداپ بەرەتىنىن ايتتى. ماسەلەن، بەلگىلى جۋرناليست جانىبەك نۇرىش وسىدان بىرنەشە كۇن بۇرىن ءوزىنىڭ الەۋمەتتىك جەلىدەگى پاراقشاسىنا ءۇي تاپسىرماسىن بەرۋدى قولدامايتىنىن جازدى:

بۇل پىكىردى بلوگەر اسقار بازارباي دا قولدايدى:

«ەگەر اتا- انانىڭ بالاسىنا تەك ءۇي جۇمىسىن ورىنداۋ كەزىندە عانا كوڭىل بولە الاتىن مۇمكىندىگى بولسا، بىرگە ۋاقىت وتكىزۋگە جاقسى نارسە. كوبى بالامەن جەكە ۋاقىت وتكىزۋ جايلى ويلامايدى دا. ساباقتىڭ سىلتاۋىمەن اتا- اناسىنىڭ نازارىنا يە بولىپ قالادى بالا. ال بالامەن جەكە ۋاقىت وتكىزۋدىڭ پارقىن بىلەتىن ادامعا ءۇي جۇمىسىن جاساۋ - پايداسىز دۇنيە. ودان سەرۋەنگە شىققانى، قالانى ارالاعانى، بىرگە ويناعانى، قورشاعان ورتامەن تانىستىرعانى پايدالىراق. نەمەسە قوسىمشا مۋزىكا، سپورت ۇيىرمەلەرىنە قاتىسقانى دۇرىس»، - دەيدى ول.

الايدا، بۇل پىكىرمەن جۋرناليست جۇلدىز ءابدىلدا كەلىسپەيدى:

- ءۇي تاپسىرماسى بەرىلۋى كەرەك. اتام زاماننان بەرى بەرىلەتىن، قازىر دە ەشتەڭە وزگەرگەن جوق. بالا كۇنىمىزدە ءۇيدىڭ، ءتۇزدىڭ تىرلىگىن ىستەپ، ويىندى دا ويناي ءجۇرىپ، ءۇي تاپسىرماسىن جاساپ ۇلگەرەتىنبىز. ەشقاشان قيىندىق تۋدىرعان ەمەس. قازىر دە تۋدىرمايدى.

قىزىم 2-سىنىپتا وقيدى. تاپسىرمانى كوپ بەرەدى. كومەكتەسپەيمىن، ءوزى ورىندايدى. تەك اعىلشىن تىلىنەن ازداپ كومەكتەسەمىز. سونشالىق قيىن دەپ ويلامايمىن. ۋاقىتى دا جەتەدى. اپتاسىنا 2 رەت بيگە، 2 رەت اعىلشىننان قوسىمشاعا، 1 رەت اريفمەتيكا مەن لوگيكاعا بارامىز. ولاردىڭ دا تاپسىرمالارى بار. «شارشايدى عوي» دەپ ايتاتىندار بار. ءبىراق، بۇدان دا تىعىز كەستەمەن ءومىر ءسۇرىپ جاتقان بالالاردى بىلەمىن.

 كۇنىنە بىرنەشە ۇيىرمە مەن قوسىمشاعا باراتىن، وعان قوسىمشا ادەبي كىتاپ تا وقىپ ۇلگەرەتىن، حوببيى دە كوپ بالالاردى بىلەمىن. ەشقانداي قوسىمشاعا بارماسا، سول ۋاقىتتا بالا نە ىستەيدى؟ ەگەر ۇيدە تەلەديداردىڭ الدىندا وتىراتىن بولسا نەمەسە تەلەفون شۇقىلاپ وتىراتىن بولسا، ودان گورى قينالىپ ەسەپ شىعارعانى دۇرىس شىعار. پايداسى بولماسا، زيانى جوق. ءۇي تاپسىرماسى دا سولاي. وزىمە ەشقاشان ەشكىم كومەكتەسكەن ەمەس. ءبارىن ءوزىم ورىندايتىنمىن. قىزىمدى دا مۇمكىندىگىنشە سولاي ۇيرەتۋگە تىرىسىپ ءجۇرمىن. «تۇسىنبەگەنىڭ بولسا، اپايدان سىنىپتا سۇراپ ال. وقۋشى مەن ەمەسپىن، سەنسىڭ» دەپ ايتامىن.

وسىعان قاتىستى فەيسبۋك قولدانۋشىلارى دا بەلسەندى تۇردە پىكىرلەرىمەن ءبولىستى. ماسەلەن، باعلان وماروۆ دەگەن اتپەن تىركەلگەن تاعى ءبىر فەيسبۋك قولدانۋشىسى ءۇي تاپسىرماسىنىڭ كەرەك ەكەنىن ايتتى: «ءۇي تاپسىرماسى كەرەك. ال ونىڭ پايدالى- پايداسىزدىعى مۇعالىمنىڭ ساباقتى قالاي وتكەنىنە، ونىڭ جاسامپازدىعىنا بايلانىستى. وتكەن تاقىرىپ شىنايى ومىردە قانداي جاعدايلاردا كەرەك بولۋى مۇمكىن ەكەنىن تۇسىندىرە الۋ كەرەك. سوندا وقۋشى قۇلشىنىسى ءسال بولسا دا ارتادى. وعان قوسا ءۇي تاپسىرماسىن پراكتيكاعا، شىنايى ومىرگە نەگىزدەپ بەرە الساڭ، ءۇي جۇمىسىنا دەگەن كوزقاراس تا وزگەرىپ شىعا كەلەدى»، - دەدى ول.

ءۇي تاپسىرماسىنا قاتىستى پىكىرلەر

ءۇي تاپسىرماسىنا قاتىستى پىكىرلەر Facebook جەلىسىنەن ءتۇسىرىلىپ الىندى

بۇل تۋرالى ساياساتكەر باقىتجان بۇقاربايدىڭ دا پىكىرىن بىلدىك:

«ءبىلىم بەرۋ جۇيەسىن مۇلدەم جاڭارتىپ تاستاۋ كەرەك. بىزدە بالانى ماجبۇرلەپ قويادى. كەرەك ەمەس نارسە. بىزگە دە بالا كەزىمىزدە تالاي تاپسىرما بەردى. مىسالى، حيميالىق ەلەمەنتتەردىڭ كەستەسىن جاتتاتتى. مەن جاتتاپ شىقتىم: 27 فەررۋم، التىننىڭ سالماعى مىنداي، مول، تاعى باسقالارىن. الاتىن بەستىك باعالارىمدى الدىم. قازىر ونىڭ ماعان قاجەتى قانشا؟ قازىر قاتتى قاجەت بولىپ جاتسا، قولىڭداعى تەلەفونىڭنان قاراي سالاسىڭ. بالانىڭ ميىن سونداي قوقىسپەن تولتىرۋدىڭ كەرەگى جوق. ول قوقىس. ونى مويىنداۋ كەرەك. ونى مويىندامايىنشا، ول جەردە پروگرەسس بولمايدى. بالاعا باسقا نارسە بەرۋ كەرەك. قابىلەتىن اشاتىن. مەن فينليانديانىڭ ءبىلىم سالاسىنداعى جۇيەسىنە كوپ قىزىعامىن».

مۇعالىمدەر نە دەيدى؟

بۇرىن- سوڭدى يتاۋرەگە تۇسىرەتىن تىرلىك سانالماعان ءۇي تاپسىرماسىنىڭ ماسەلەسى نەگە ۋشىقتى؟ ءۇي تاپسىرماسىن بەرگەن دۇرىس پا؟ ونىڭ كولەمى بەكىتىلگەن بە؟ بالا ءۇي تاپسىرماسىن ورىنداماسا وعان كىم كىنالى؟ وقۋشى ۇلگەرىمىنە اسەر ەتە مە؟ وسى ساۋالدارمەن پەداگوگتارعا حابارلاستىق.

رەسپۋبليكالىق «قازءبىلىم» ورتالىعىنىڭ ديرەكتورى اياتجان احمەتجان ءۇي تاپسىرماسىنا قارسى شىعۋ جالقاۋلىقتان شىققانىن ايتتى:

اياتجان احمەتجان، رەسپۋبليكالىق «قازءبىلىم» ورتالىعىنىڭ ديرەكتورى

- ءۇي تاپسىرماسىن بەرمەۋ دەگەن ءبىزدىڭ ءبىلىم بەرۋ جۇيەسىنە كەلمەيدى. ەگەر مەكتەپتەر تەك قانا ءبىر اۋىسىمدا وتىراتىن، قىتايداعى، جاپونياداعى سياقتى تاڭەرتەڭگى ساعات 8-دەن، كەشكى 6-عا دەيىن وقۋشى مەكتەپتە بولاتىن جۇيە بولسا، وندا بولادى. ياعني بالا مەكتەپتە تۇسكە دەيىن ساباق وقيدى، تۇستەن كەيىن تاپسىرمالار ورىندايدى. ول بىزدەگى كەيبىر دارىندى بالالارعا ارنالعان مەكتەپتەردە عانا قاراستىرىلعان. ولار تاپسىرمالارىن مەكتەپتە ورىنداپ، كەشكە ءبىراق كەتەدى. ءبىراق بىزدەگى ەكى- ءۇش اۋىسىمدا جۇرگەن مەكتەپتەردە تۇستەن كەيىن مەكتەپتە وتىرىپ، تاپسىرمالاردى ورىنداتىپ وتىراتىن باعىت- باعدار بەرەتىن جاعداي جوق. ال ونداي جاعدايدا ءۇي تاپسىرماسىن بەرمەۋ ءبىلىم ساپاسىن تومەندەتەدى. بۇل ءبىر.

ەكىنشىدەن، ءۇي تاپسىرماسى بالاعا نە ءۇشىن بەرىلەدى؟ بىرىنشىدەن، العان ءبىلىمىن ءتۇسىنۋى، ەكىنشىدەن، جاڭا باعىتتا ىزدەنۋگە ۇيرەتەدى. نەگىزى ءۇي تاپسىرماسىن بەرمەۋ دەگەن نارسە جالقاۋلىقتان شىققان دۇنيە دەپ ويلايمىن. پەداگوگ رەتىندە ەشقانداي اقىلعا سىيمايدى. بالا ءۇي تاپسىرماسىن ورىنداماسا، وعان بالا مەن ورىنداتا الماعانى ءۇشىن اتا- انا كىنالى. سەبەبى ءۇي تاپسىرماسى وقۋشىنىڭ باعاسىنا 20-30 پايىز، ال شىنايى بىلىمىنە 50 پايىز اسەر ەتەدى. ءۇي تاپسىرماسىن ورىندامايتىن بالانىڭ ءبىلىم دەڭگەيى ەشقاشان دا جاقسى بولمايدى.

باقىتجان قاسەنبايەۆا، ش ق و، قارابۇتا ورتا مەكتەبىنىڭ ورىس ءتىلى مەن ادەبيەتى ءپانىنىڭ وقىتۋشىسى:

- ءۇي تاپسىرماسىن بەرگەن دۇرىس. ونىڭ ماقساتى - جاڭا وتكەن تاقىرىپتى قايتالاۋ، پىسىقتاۋ. ءبىراق تا ءۇيىپ- توگىپ بەرۋگە بولمايدى. نەگە ەكەنىن بىلمەيمىن، قازىر «مۇعالىم ۇيگە تاپسىرمانى نەعۇرلىم كوپ بەرسە، سوعۇرلىم اقىلدىراق» دەگەن جاڭساق پىكىر بار. الايدا، مەن وقۋشىلارىما ساباقتا العان ءبىلىمىنىڭ 5-7 پايىزىن عانا قۇرايتىن، تاقىرىپتى مەڭگەرۋگە كومەكتەسەتىن جاتتىعۋلار مەن وقيتىن تاپسىرمالار بەرەمىن. ودان كەيىن قازىر «وقۋشى ءوز بەتىمەن ىزدەنۋ كەرەك» دەگەن ترەند بار. ول قالالىق جەردە مۇمكىن شىعار. ال، اۋىلدىق مەكتەپتەردەگى كىتاپحانا قورى از. وقۋشىنى قاجەتتى ماعلۇماتتارمەن قامتاماسىز ەتە المايدى، ينتەرنەت جوق. بالا قايدان الادى؟ سوندىقتان، كەيدە تەك وقۋلىقپەن عانا شەكتەلۋگە تۋرا كەلەدى.

ۇستازداردىڭ پىكىر وسىنداي بولدى، حوش، ودان دا وقۋشىلاردىڭ سوزىنە قۇلاق تۇرەيىك.

وقۋشىعا ءۇي تاپسىرماسى بەرىلۋى كەرەك پە؟

ايات اسقاربەك ۇلى، تاراز قالاسىنداعى اباي اتىنداعى №26 ورتا مەكتەپتىڭ 11-سىنىپ وقۋشىسى:

- ءۇي تاپسىرماسىن بەرۋ دۇرىس دەپ ويلايمىن. ءوزىم ساباقتا مەڭگەرگەنىمدى ءۇي تاپسىرماسى ارقىلى قورتىندىلاپ وتىرامىن. ءۇي تاپسىرماسىن ورىنداۋعا ەكى ساعات ۋاقىت جۇمسايمىن. اتا- انام ارنايى ۋاقىت قويمايدى. ولاردان كومەك سۇراعان ەمەسپىن.

بۇلبۇل قايىربايەۆا، الماتى قالاسىنداعى اباي اتىنداعى رەسپۋبليكالىق مامانداندىرىلعان دارىندى بالالارعا ارنالعان قازاق ءتىلى مەن ادەبيەتىن تەرەڭدەتە وقىتاتىن ورتا مەكتەپ- ينتەرناتتىڭ 11-سىنىپ وقۋشىسى:

 - ءبىزدىڭ مەكتەبىمىزدە ءدال باسقا مەكتەپتىڭ وقۋشىلارىنداي وقۋشىلار وقيدى. كۇندەلىكتى ساباققا ۇنەمى دايىندالىپ وتىرامىز. ارينە، مۇعالىمدەرىمىز دە ءۇي تاپسىرماسىن از بەرمەيدى. مىسالعا الاتىن بولساق، الگەبرا ساباعىنان ءبىر كۇنگە 50-60 ەسەپ شىعارۋعا بەرەدى. بۇل باسقا مەكتەپتەرگە قاراعاندا 90 پايىز كوپ دەۋگە بولادى. ءار ءپان مۇعالىمى ءوز ساباعىن وسىلاي قاداعالايدى. وسىدان سوڭ مىندەتتى تۇردە قورىتىندى شىعادى دەپ ويلايمىن. ءارى ناتيجەسىن ءوزىم دە كورىپ ءجۇرمىن. سوندىقتان ءۇي تاپسىرماسىنىڭ بەرىلۋى، ونى وقۋشىنىڭ ەشكىمنەن كوشىرمەي ءوزى ورىنداۋى قاتاڭ قاداعالانۋى قاجەت دەپ ويلايمىن.

دىنمۇحمەد ءابدىحان، الماتى قالاسىنداعى حيميا- بيولوگيا باعىتىنداعى نازاربايەۆ زياتكەرلىك مەكتەبىنىڭ 9-سىنىپ وقۋشىسى:

- ءبىزدىڭ مەكتەپتە وقىتۋ پروتسەسى باسقا مەكتەپتەردەن وزگەشە. مۇعالىم ساباقتا تاقىرىپتىڭ تەك 30 پايىزىن عانا كورسەتەدى دە، قالعانىن قايدان قاراپ، وقۋ كەرەك ەكەنىن ايتادى. ارى قاراي وقۋشى ءوزى ىزدەنىپ، مەڭگەرۋى كەرەك. ءۇي تاپسىرمالارىمىز وسىنداي. تەك وقۋعا ارنالعان تاپسىرمالار عانا بەرەتىن پاندەر بار. مىسالى، بيولوگيا سياقتى. باسقا پاندەر ءار كەزدە ءارقالاي تاپسىرما بەرەدى. كۇن سايىن 8.20-دان 17.20-عا دەيىن ساباقتا بولامىز. ۇيىمىزگە جەتكەنشە ساعات كەشكى 7 بولادى. كەشكى اس ءىشىپ، ميىڭدى تىنىقتىراسىڭ. ودان كەيىن قايتادان ساباق قاراۋعا وتىرۋ وتە اۋىر. سوندىقتان وقۋشىلارعا تەك قايتالاۋعا ارنالعان تاپسىرمالار بەرگەن دۇرىس سياقتى.

ءۇي تاپسىرماسىنىڭ بەرىلۋىنە قارسى شىعىپ وتىرعان بالا كورمەدىك. ولاي بولسا، «ءۇي تاپسىرماسى كەرەك ەمەس» دەپ جەلەۋلەتىپ وتىرعان كىم؟ اتا- انا ما؟ الدە مۇنىڭ بارىنە بىلىكتىلىگى جەتپەيتىن، ءبىر تاقىرىپتى 45 مينۋتقا سىيدىرا الماي، تۇسىندىرمەگەن كۇيى وقۋشىنىڭ موينىنا ارتاتىن مۇعالىمدى كىنالايمىز با؟ ولاي بولسا، پەداگوگتاردى ءبىلىمسىز قىلىپ دايارلاعان جوعاعى وقۋ ورىندارىنا سىن تاعامىز با؟ نەمەسە ونسىز دا «قيت» ەتكەنگە كىنالى بولا بەرەتىن مۇعالىمدەرگە مويىن بۇرۋعا مۇمكىندىك بەرمەي جۇرگەن قاعازباستىلىقتا ما بار گاپ؟ تامىرى تەرەڭ ماسەلە. قالاي دەگەندە دە ەلىمىزدەگى بارلىق مەكتەپ تەرەڭدەتىپ ءبىلىم بەرۋ جۇيەسىنە كوشپەيىنشە، مەكتەپكە تاڭەرتەڭ كىرگەن بالا وقيتىنىن وقىپ، تاپسىرماسىن ورىنداپ، كەشكە ءبىراق شىعاتىن بولمايىنشا، ءۇي تاپسىرماسىن ورىنداۋدان بالانى تىيماعان ءجون. مەكتەپتە ۇيرەنگەنىن كەشكە ءبىر پىسىقتاپ شىعۋدان ەشكىم جامان بولا قويماسى انىق. قالاي دەگەندە دە «قايتالاۋ - وقۋ اناسى».

اسەل سارقىت

سوڭعى جاڭالىقتار