دارىگەرلەر ۋنيۆەرسياداعا افريكادان ۇشىپ كەلگەن سپورتشىلارعا كومەك كورسەتتى

سپورتشىلار مەن جانكۇيەرلەرگە العاشقى مەديتسينالىق جاردەم كورسەتۋگە دايىندىق قىزۋ جۇرۋدە.
10 - قاڭتار كۇنى شۇعىل ارەكەت ەتۋ قىزمەتى مەن مەديتسينا سالاسىنىڭ ماماندارى قالاداعى حالىقارالىق اۋەجايدا ارنايى وقۋ- جاتتىعۋ شاراسىن وتكىزدى. ونىڭ سسەناريىنە سايكەس، الماتى حالىقارالىق اۋەجايىنا قونعان ۇشاقتى قاۋىپسىزدىك قىزمەتى دەرەۋ وقشاۋلادى. وسى ۇشاقپەن ۋنيۆەرسيادا ويىندارىنا افريكا ەلدەرىنىڭ بىرىنەن 40 سپورتشى كەلگەن. الدىن الا مالىمەت بويىنشا، سپورتشىلاردىڭ بىرىنەن قاۋىپتى ينفەكسيالىق اۋرۋدىڭ بەلگىلەرى انىقتالعان. 40 مينۋت ىشىندە ۇشاق بورتىنا ينفەكسيالىق اۋرۋلارمەن كۇرەسەتىن دارىگەرلەردىڭ العاشقى توبى كوتەرىلەدى.
«بۇل وقۋ- جاتتىعۋدىڭ ماڭىزى زور. ناۋقاس بارلىق تالاپقا ساي وقشاۋلاندى. جەدەل جاردەم شاقىرتىلىپ، شارتتى تۇردە ينفەكتسيالىق اۋرۋحاناعا جاتقىزىلدى»، - دەيدى قالالىق دەنساۋلىق ساقتاۋ باسقارماسى باسشىسىنىڭ ورىنباسارى گۇلنار قۇلقايەۆا.
جالپى ۇشاقتا 150 جولاۋشى بار. ولار شەكارالىق تەكسەرىستەن ۇشاق تابالدىرىعىنان تۇسە سالىپ وتەدى. جولاۋشىلار اۋەجاي ايماعىنان ارنايى ءدالىز ارقىلى شىعارىلعاننان كەيىن ۇشاقتىڭ ءىشى تازارتىلادى. ناۋقاسپەن بىرگە كەلگەن بارلىق جولاۋشى مەديتسينالىق تەكسەرىستەن وتەدى.
مامانداردىڭ ايتۋىنشا، بۇل ارەكەت قاۋىپسىزدىك ماقساتىندا جاسالادى. دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنشە، ەكۆاتور بەلدەۋى ايماعىندا ورنالاسقان ەلدەردە جىل سايىن ينفەكتسيالىق اۋرۋلارعا 200 ميلليونعا جۋىق ادام تاپ بولادى.
13 - قاڭتاردان باستاپ ۋنيۆەرسياداعا قاتىساتىن سپورتشىلار مەن شەتەلدىك مەيماندار الماتىعا كەلە باستايدى. سول ساتتەن باستاپ قالاداعى مەديتسينا سالاسىنىڭ قىزمەتكەرلەرى سپورتتىق نىسانداردا كەزەكشىلىكتى كۇشەيتەدى.
ەسكە سالايىق، 28 - قاڭتار مەن 8 - اقپان ارالىعىندا الماتى قالاسىندا 28- دۇنيەجۇزىلىك قىسقى ۋنيۆەرسيادا ويىندارى ءوتى.
ۋنيۆەرسيادا باعدارلاماسىنا مانەرلەپ سىرعاناۋ، شورت- ترەك، تاۋ شاڭعىسى، سنوۋبورد، بياتلون، شاڭعىمەن جارىسۋ، شايبالى حوككەي (ايەلدەر مەن ەرلەر اراسىندا)، كەرلينگ، شاڭعىمەن ترامپليننەن سەكىرۋ، شاڭعى قوسسايىسى، كونكيمەن جۇگىرۋ سپورتى، فريستايل سەكىلدى 12 سپورت ءتۇرى ەنگەن.
جارىسقا الەمنىڭ 60-قا جۋىق ەلىنەن كەلەتىن 2 مىڭعا جۋىق سپورتشىعا 3 مىڭعا جۋىق ەرىكتى قىزمەت كورسەتەدى. ال سايىستاردى الەمنىڭ 80 ەلىندەگى 1 ميلليارد ادام تەلەديدار ارقىلى تاماشالاي الادى.
الماتى ت م د ەلدەرى اراسىنان قىسقى ۋنيۆەرسيادانى ءبىرىنشى بولىپ وتكىزگەلى وتىر. بۇعان دەيىن، 2013 -جىلى رەسەيدىڭ قازان قالاسىندا جازعى ۋنيۆەرسيادا ۇيىمداستىرىلعان بولاتىن.
دەرەككوز: «حابار 24» ارناسى