حالىقتىڭ ويىن ءبىلۋ ءۇشىن «الماس قىلىش» فيلمىنىڭ رەجيسسەرى «جاسىرىن» كينوتەاترعا باردى

استانا. قازاقپارات - «قازاق حاندىعى. الماس قىلىش» فيلمىنىڭ رەجيسسەرى رۇستەم ابدىراشەۆ حالىقتىڭ ىشىندە وتىرىپ، كورەرمەننىڭ وي-پىكىرىن ءبىلۋ ماقساتىندا استاناداعى كينوتەاترلاردىڭ بىرىنە بارىپ، كينوپروكاتتىڭ قازاق ءتىلدى نۇسقاسىن تاماشالادى.

«كەشە بيلەت الىپ، كينوتەاترگا ادەيى باردىق. تۇنگى ساعات 22:30 دا قازاقشا سەانس بار ەكەن. بارساق، زالدىڭ 80 پايىزى تولىپ وتىر. سوندىقتان قازاق ءتىلدى كورىلىمگە ادام از كەلەدى دەپ ايتا المايمىن. وسىعان بايلانىستى پروكاتپەن اينالىساتىن كومپانيالارمەن كەلىسسوز جۇرگىزىپ، حالىقتىڭ ءوتىنىشى بويىنشا، كەشكى ۋاقىتتا فيلمنىڭ قازاقشا جانە ورىسشا نۇسقالارىن قاتار قويۋعا ءوتىنىش جاساپ وتىرمىز. قازىر اقىرىنداپ قويعىزىپ جاتىرمىز. ايتپەسە، بۇرىنعى ادەتپەن ورىسشاسىن ىڭعايلى ۋاقىتقا قويىپ وتىرادى. مەن ءوزىم، ادەيى، حالىقپەن بىرگە بارىپ كوردىم. كورەرمەن كۇلەتىن جەردە كۇلدى، سەزىمگە ەرىك بەرىپ، كوزىنە جاس العاندار دا بولدى. ەندى، ول جەردە ارنايى پرەزەنتاتسيا ەمەس قوي، كادىمگىدەي كينوتەاترداعى كورسەتىلىم. مەنىڭ وتىرعانىمدى ەشكىم بىلمەدى. سونىڭ وزىندە فيلمنىڭ سوڭىندا حالىق تۇرەگەلىپ، قول شاپالاقتادى، قوشەمەت كورسەتتى. سوعان ءماز بولىپ قالدىق. فيلم حالىقتىڭ كوڭىلىنەن شىعىپ جاتقان سياقتى»، - دەدى ر. ابدىراشەۆ «قازاقپارات» ح ا ا تىلشىسىنە بەرگەن سۇحباتىندا.

بۇگىن رەجيسسەر ورىس ءتىلدى سەانستاردى ارالاپ شىقپاقشى.

ايتا كەتەيىك، كەشە «قازاق حاندىعى. الماس قىلىش» فيلمى پروكاتقا شىقتى.

قازاقپارات ءتىلشىسى تاريحي تۋىندىنى كينوتەاتردان ءبىرىنشى بولىپ تاماشالاعان كورەرمەندەردىڭ پىكىرىن جازىپ العان بولاتىن.

ال مادەنيەت جانە اقپارات ءمينيسترى ارىستانبەك مۇحامەدي ۇلى كادردىڭ سىرتىندا قالعان جايتتەر - ەلباسىنىڭ سەناريدى قالاي تۇزەتكەنىن، ءتۇسىرۋ توبىنا قانداي تالاپ قويىلعانىن ايتىپ، ءفيلمنىڭ نەگىزگى يدەياسىمەن ءبولىستى. سونداي-اق مينيستر سوڭعى ۋاقىتتا كينو سالاسىندا بولعان داۋ- دامايلاردىڭ نەگىزگى سەبەبىنە دە توقتالعان-دى.

اۆتور: ارمان اسقاروۆ