قاراعاندىداعى تۇرعىن ءۇيدىڭ نەدەن وپىرىلعانى بەلگىلى بولدى - فوتو
«تۇرعىن ءۇي قازاندىقتىڭ جارىلۋىنان قۇلاعان. شاحانداعى ءبىرقاتار تۇرعىن ۇيلەرگە جىلۋ اۆتونومدىق جۇيە ارقىلى بەرىلەدى. بۇل قازاندىق ءۇي كوميتەتىنىڭ ەسەبىندە بولدى»، - دەپ ءمالىم ەتتى وبلىس اكىمى نۇرمۇحامبەت ابدىبەكوۆ جۋرناليستەرگە بەرگەن سۇحباتىندا.
ول توتەنشە جاعدايدىڭ سالدارىن جويۋ جانە سەبەبىن انىقتاۋ بويىنشا وبلىستىق كوميسسيا قۇرىلعانىن جاريالادى. اكىمنىڭ ايتۋىنشا، رەسپۋبليكالىق كوميسسيا قۇرۋ جوسپارلانۋدا. ت ج ورنىندا ىزدەۋ- قۇتقارۋ جۇمىستارى جالعاستىرىلۋدا. «مىندەتىمىز ادامداردى انىقتاۋ ءۇشىن ۇيىندىلەردى تازالاۋ جۇمىستارىن اياقتاۋ»، - دەپ اتاپ ءوتتى ءوڭىر باسشىسى.
ازىرگە، ءبىر ادام ءۇيىندى استىندا قالىپ قويعان. ازىرگە بەلگىلىسى، كوپقاباتتى تۇرعىن ۇيدە 118 ادام تۇرعان، ال ت ج ورىن العان قۇلاعان بولىگىندە 30 ادام بولعان. تۇرعىنداردىڭ كوبىسىن تۋىستارى سىرتقا شىعارىپ ۇلگەرگەن. سونىمەن قاتار، باسپاناسىز قالعاندارعا بالاباقشانىڭ عيماراتىندا تۇرۋعا مۇمكىندىك بەرىلدى. ساعات 8:12-دە قيراعان ءۇيىندىنىڭ استىنان ءتىرى قالعان 32 جاستاعى ەر ادام قۇتقارىلدى. بۇعان دەيىن حابارلانعانداي، ءۇيىندى استىنان كوز جۇمعان 9 ادامنىڭ دەنەسى ارشىپ الىندى. ونىڭ ۇشەۋى ەر ادام، ۇشەۋى ايەل، ۇشەۋى بالا. بالانىڭ بىرەۋى 2016 -جىلعى، ەكىنشىسى 2010 -جىلعى. ۇيىندىلەردى تازارتۋعا 280 ادام جۇمىلدىرىلعان، ولاردىڭ قاتارىندا قۇتقارۋشىلار، پوليتسيا قىزمەتكەرلەرى، جەرگىلىكتى اتقارۋشى ورگاندار، جەدەل مەديتسينالىق جاردەم بريگاداسى، ۇلتتىق ۇلاننىڭ 52859 -اسكەري ءبولىمىنىڭ اۋىر تەحنيكاسى جانە جەكە كاسىپكەرلەر بار.
