بيىل ءدۇيىم جۇرتتى شۋلاتقان شوۋ-بيزنەس وكىلدەرى كىمدەر؟ - فوتو
ءبىراق ءومىردىڭ تەك قۋانىشتان تۇرمايتىنى، ءومىر بولعان سوڭ جاعىمسىز جايتتار مەن داۋ- جانجالدىڭ بولاتىنى بەلگىلى. سول سەبەپتى بۇگىن بيىل باسى داۋعا قالىپ، شۋ شىعارعان شوۋ- بيزنەس وكىلدەرىن ەسكە تۇسىرمەكپىز.
كوكتەم شىعا سالىقشىلار ساحنا جۇلدىزدارىنىڭ سالىق تولەۋ ماسەلەسىن كوتەرىپ، 2015 -جىلى ءار شوۋ- بيزنەس وكىلىنىڭ ەل الدىندا اتىن اتاپ، ءتۇسىن تۇستەپ، تاپقان تابىسىن تيىنىنا دەيىن ساناپ كورسەتتى. وسى ورايدا 163 سالىق تولەۋشىنىڭ 41 ى عانا جەكە كاسىپكەر رەتىندە تىركەلگەندىگى انىقتالدى.
سونىمەن، 2015 -جىلى ءانشى بۇركىتتىڭ تابىسى (دوللاردىڭ ەسكى باعامىمەن العاندا) 1 ميلليون ا ق ش دوللارىن قۇراعان. اسحات تارعىن 172,8 ميلليون، اليشەر كارىموۆ 135 ميلليون، ءدىلناز احماديەۆا 108 ميلليون، باقتيار مامەدوۆ 90 ميلليون، ءالي وقاپوۆ 54 ميلليون، جانار دۇعالوۆا 45 ميلليون تەڭگە تابىس تاپقان. ەسىمدەرى اتالعان ونەر جۇلدىزدارى قوماقتى تابىس تاپقاندارىنا قاراماستان، سالىق تولەمەگەن. لۋيزا قارىنبايەۆا (لۋينا) مەن ماقپال يسابەكوۆا جەكە كاسىپكەر رەتىندە تىركەلسە دە سالىق تولەۋدەن باس تارتقان.
جۋرناليستەر جاۋاپ سۇراي بارعاندا، بارلىعى دەرلىك بۇل اقپاراتتىڭ شىندىققا جاناسپايتىنىن، راس بولعان كۇننىڭ وزىندە شىعىستارىنىڭ شاش ەتەكتەن ەكەنىن ايتىپ بەزەك قاققان ەدى.
قوعامدا رەزونانس تۋدىرعان بيىلعى جىلدىڭ باستى وقيعاسى بايان ەسەنتايەۆانىڭ باسىندا بولدى. 10-ماۋسىمدا شەت ەلدەن كەلگەن پروديۋسەردى جۇبايى باقىتبەك اۋەجايدان كۇتىپ الىپ، جول بويىندا سوققىعا جىعىپ، پىشاق سالعان. دەر كەزىندە جەتكەن ۇلكەن قىزدارى ايساۋلە اناسىنا اراشا ءتۇسىپ ۇلگەرەدى. بايان ماقسات قىزى دەرەۋ اۋرۋحاناعا جەتكىزىلىپ، وتا جاسالدى. جولداسىنىڭ سوققىسىنان مۇرنى سىنىپ، كوزىنە زاقىم كەلىپ، باس- مي جاراقاتىن العان پروديۋسەر تەرگەۋ پروتسەسىنىڭ ءون بويىندا بىرنەشە اي بويى شەت ەلدە ەم قابىلدادى.
بۇل وقيعانىڭ نۇكتەسى قازان ايىندا عانا قويىلدى. ەرلى- زايىپتىلاردىڭ بۇل كۇيگە جەتۋىنە قىزعانىش سەبەپ بولعانىن بايان ماقسات قىزىنىڭ ءوزى دە مويىندادى. باقىتبەك ەسەنتايەۆقا اۋەلدە دەنساۋلىققا اۋىر زيا كەلتىرۋ، كىسى ولتىرۋگە تالپىنۋ، جىنىستىق سيپاتتاعى زورلىق ارەكەتتەرى، كۇش قولدانۋ باپتارى بويىنشا ايىپ تاعىلدى. ايەلىن سوققىعا جىققاندا باقىتبەك ەسەنتايەۆتىڭ ماس بولعانى دا ايتىلدى. سوت وتىرىسى باستالعان كەزدە بايان ماقسات قىزى ارادا ەكى بالا بار ەكەنىن ەسكەرىپ، 22 جىل وتاسقان كۇيەۋىن كەشىرەتىنىن مالىمدەدى. دەگەنمەن سوت باقىتبەك ەسەنتايەۆتى 9 جىلعا باس بوستاندىعىنان ايىردى. بۇل وقيعاعا دەيىن باقىتبەك ەسەنتايەۆتىڭ قۇمار ويىننان ۇلكەن سومانى ۇتىلىپ قالىپ، توبەلەس شىعارعانى تۇسىرىلگەن ۆيدەو عالامتوردا كەڭ تاراپ كەتكەن بولاتىن. ول كەزدە بايان حانىم توبەلەس شىعارعان ادامدى تانىمايتىنىن ايتىپ، جۇبايىن اقتاپ العان- دى.
بايان باقىتبەك ەسەنتايەۆقا 20 جاسىندا تۇرمىسقا شىققان. قازىردە ايساۋلە جانە ايارۋ ەسىمدى ەكى قىزى بار. جولداسىنا ۇكىم شىعارىلىپ، ءىستىڭ نۇكتەسى قويىلعاننان كەيىن تىلشىلەرگە كەڭ كولەمدى سۇحبات بەرىپ، ءبىراز سىرىمەن ءبولىستى. پروديۋسەر وسى وقيعاعا دەيىن جولداسىنان ءۇش رەت اجىراسۋدى وتىنگەنىن، ءبىراق ونىڭ رۇقسات بەرمەگەنىن، كۇيەۋىنىڭ ءوزىن شەكسىز سۇيگەنىن، ءوزىنىڭ سول ماحاباتتى كوتەرە الماعانىن ايتىپ، ەندى ءوز باقىتىن ىزدەيتىنىن دە جاسىرمادى. نە دە بولسا قايىرىن تىلەدىك!
بۇدان كەيىن كەزەكتى داۋعا شىمكەنتتەگى كىلەم فابريكاسىندا تىلشىلەرگە دۇرسە قويا بەرگەن تورەعالي ءتورالى ىلىكتى. جۇلدىزى جانىپ، قازاق ەستراداسىنىڭ تورىنە جىلدام كوتەرىلگەن جاس انشىگە سۇحبات الىپ تۇرعان جۋرناليستەردىڭ ءبىرىنىڭ «قولىڭدى قالتاڭنان شىعارىپ تۇر» دەگەن ەسكەرتۋى جاقپاي قالعان ەدى. ۆيدەو جەلىدە كەڭ تاراپ، ءانشى كوپشىلىكتىڭ قاتاڭ سىنىنا ۇشىرادى.
قازاقستان شوۋ- بيزنەسى جىل سايىن جاڭا توپتارمەن تولىعىپ، ونەرگە جاڭا لەپ، جاڭا سەرپىن قوسىلۋدا. ءبىراق وسى تۇرعىدا داۋ كوپ. سەبەبى ءداستۇرلى قازاق ونەرى مەن ەستى اندەردى جوعارى باعالايتىن ساحنا ساڭلاقتارى جاڭاشىل جاستاردىڭ «ونەرى جەڭىل، قازاقتىڭ ساناسى مەن ونەرىن ولتىرەدى» دەپ ايىپتايدى.
وسىنداي داۋ ەربولات بەدەلحان جەتەكشىلىك ەتەتىن «Ninety one» توبىنا قاتىستى تۋىندادى. تەك كوپشىلىك بۇل توپتىڭ ونەرىنە ەمەس، سىرتقى ءتۇر- كەلبەتتەرىنە قارسىلىق ءبىلدىردى. ولاردىڭ كيىنۋ ءستيلىن، سىرعا تاعىپ، شاشتارىن بوياۋىن قازاق ازاماتىنا جات، قىزتەكەلىكتى جارنامالۋ دەپ سوكتى. العاش بولىپ ولارعا وتاندىق باعدارلامالاردىڭ بىرىندە بەلگىلى ايتىسكەر اقىن رينات زايىتوۆ شۇيلىكتى. وسىدان كەيىن بەكبولات تىلەۋحان، تورەعالي ءتورالى سىنعا الىپ، باعلان ءابدىرايىموۆ سەس كورسەتتى. قوعام دا قارسى شىعىپ، توپتىڭ بىرنەشە قالاداعى كونتسەرتتەرى وتپەي قالدى. دەگەنمەن بۇل شابۋىلدار «91» توبىنا جاقسى پيار جاساپ، تانىمالدىلىقتارىن ارتتىردى. بىرنەشە اپتا بۇرىن اتى شۋلى توپتىڭ «قالاي قارايسىڭ» انىنە تۇسىرگەن بەينەباياندارى جارىق كوردى. بۇل كەزدە دە توپتىڭ «ءيت تەرىسىن باسىنا قاپتاعاندار» از بولعان جوق.
ال جاقىندا، ءقىدىرالى بولمانوۆ ەل كۇتپەگەن توسىن مالىمدەمە جاسادى. جازعىتۇرىم جۇبايى قاراقات ءابىلدينا ەرىنە توقال الىپ بەرمەك نيەتى بار ەكەنىن ايتىپ، جالپاق جۇرتقا جار سالعان بولاتىن. ىلە- شالا ەكەۋى بۇنىڭ قالجىڭ ەكەنىن ايتىپ، اقتالعان- دى. كۇزدە شىققان «ۇيات ەمەس» باعدارلاماسىندا قاراقات ءوزىنىڭ توقال ەكەنىن مويىنداپ، قىدىرالىنىڭ وزىنە دەيىن ءبىر ۇيلەنگەنىن العاش رەت جاريا ەتتى. قازاق حالقىنا قادىرلى جۇپتىڭ توسىن مالىمدەمەلەرى بۇنىمەن اياقتالمادى.
قىدىرالى بولمان جۋىردا توقال الۋ تاقىرىبىن جۇرتتىڭ نازارىن ۋشىققان جەر ماسەلەسىنەن اكەتۋ ءۇشىن ويلاپ تاپقانىن مالىمدەدى. ساۋىردە قازاق جەرىن شەت ەلدىكتەرگە جالعا بەرۋگە قوعام قارسى شىعىپ، ەلىمىزدىڭ بىرنەشە قالالارىندا تولقۋلار وتكەن- ءدى. قىدىرالى تولقۋدىڭ توڭكەرىسكە ۇلاسىپ كەتپەۋى ءۇشىن قارا باسىن «قۇرباندىققا» شالىپ، وسىنداي قادامعا بارعانىن مويىندادى. ايتسە دە، ەل سىيلى ازاماتتىڭ بۇل قىلىعىن كەكەسىنمەن قابىلداپ، «بولمانوۆ بولماسا جەرسىز قالعانداي ەكەنبىز» دەگەن سىڭايداعى سىني پىكىرلەر قىدىرالى مەن قاراقاتتىڭ تاراپىنا تولاسسىز جاۋدى.
وسى داۋدىڭ قىزۋى باسىلا بەرە، كەش-you توبىنىڭ مۇشەسى، جاقىندا كورەرمەنگە جول تارتقان «گلامۋر دليا دۋر» فيلمىندە باستى ءرولدى سومداعان اقبوتا سەيتماعامبەت سىننىڭ استىندا قالدى. وعان سەبەپ بولعان ءانشىنىڭ تۇرمىسقا شىعۋى تۋرالى جاڭالىق. پروديۋسەرى بايان ماقسات قىزى اقبوتانىڭ تۇرمىسقا شىعۋىنا بايلانىستى توپتان كەتىتىنىن، توپ قۇرامى جاڭاراتىنىن ايتقانى سول ەكەن، جەلى قولدانۋشىلارى باقىتتى جىگىتتىڭ كىم ەكەنىن بولجاۋعا كوشتى. نىساناعا اقبوتانىڭ «گلامۋر دليا دۋر» فيلمىندە سۇيىكتىسىن سومداعان داۋرەن ايدارقۇلوۆ ىلىكتى. بۇعان اكتەردىڭ كەلىنشەگىنىڭ الەۋمەتتىك جەلىگە وتباسىلىق سۋرەتتەرىن جۇكتەپ، جۇكتىلىگىن سىلتاۋ ەتكەن سىلقىمنىڭ كۇيەۋىن تارتىپ الۋىنا جول بەرمەيتىنىن جازۋى سەبەپ بولعان. ۇزاق ۋاقىت جاق اشپاعان اقبوتانىڭ شىدامى شەگىنە جەتتى مە، كەزەكتى جازبالارىنىڭ بىرىندە بارلىق قاڭقۋ ءسوزدىڭ نۇكتەسىن قويدى.
«قايىرلى كۇن دوستار! سىزدەرگە ءوزىمنىڭ جەكە ءومىرىم جايلى ايتقىم كەلىپ وتىر. ءيا، ەرجان مەن ءالي، داۋرەن مەن ... بارىمەن قوسىپ شىقتىڭىزدار. ەندى سىزدەرگە ايتارىم، مەن ەشكىمنىڭ وتباسىن بۇزعان جوقپىن. مەنىڭ داۋرەن ايدارقۇلوۆپەن ەشقانداي قارىم- قاتىناسىم جوق. «كينودا دا ماحاببات، ومىردە دە ماحاببات بولىپ كەتىپتى» دەگەندەرگە: ول كىسىگە قوسۋدى دوعارىڭىزدار! مەنىڭ تۇرمىسقا شىعاتىن بولاشاق جارىم مۇلدە ونەر ادامى ەمەس.
ال داۋرەن ايدارقۇلوۆقا كەلەتىن بولساق، وتباسىلىق جاعدايىن وزدەرى شەشسىن. تەك مەنى ارالاستىرماۋلارىن سۇرايمىن. مەن ەشكىمنىڭ وتباسىن بۇزعان جوقپىن. بىلەمىن مەنى قانشا قارعادىڭىزدار، جەك كورىپ كەتتىڭىزدەر، لاستادىڭىزدار، ءتۇرلى- ءتۇرلى جۇرەككە تيەر سوزدەر ايتتىڭىزدار. مەن ءبارىن تۇسىنەمىن. اللا قالاسا كەلەسى جىلى توي!
اركىم ءوز وتباسىمەن باقىتتى بولسىن. وزدەرىنىڭ لاس تىرلىكتەرىنە مەنى قوسپاسىن. ەگەردە باقىتتى وتباسى بولسا، وسىنشاما ايقاي- شۋ شىعارىپ، ەلدى ءدۇر سىلكىندىرمەس ەدى. نە دەيىن ەندى باقىتتى بولىڭىزدار!» - دەپ جازعان ەدى ول.
جىل سوڭىنداعى سوڭعى داۋ مەرۋەت تۇسىپبايەۆا مەن جادونىڭ (جادىرا ساحيەۆا) اراسىندا ءوربىپ جاتىر. داۋكەس مەرۋەرت تۇسىپبايەۆا وتاندىق باعدارلامالاردىڭ بىرىندە ءوزىنىڭ ستيلىنە قاتىستى ويىن ايتقان سانگەر جادونى الەۋمەتتىك جەلىدە «ءبىلىمسىز ءارى سەمىز» دەپ سىنعا الىپ، ءبىلىم الۋعا، ارىقتاۋعا كەڭەس بەرگەن بولاتىن. مەرۋەرتتىڭ سوككەنى جالعىز جادو ەمەس. ودان كەيىن ءانشى الماتىداعى مەشىت مولدالارىنا شۇيلىگىپ، شالا مولداعا تەڭەگەن ەدى.
ءانشىنىڭ الگى ءسوزى سانگەردى اۋرۋحانادان ءبىر-اق شىعاردى. مۇنى كوتەرە الماعان جادو كەيىن سوتقا جۇگىنىپ، ءانشىنىڭ ۇستىنەن ارىز تۇسىرگەن. ال كۇنى كەشە ءوتۋى ءتيىس سوت وتىرىسىنا مەرۋەرت حانىمنىڭ كەلمەگەنى تۋرالى اقپارات تارادى. ەندىگى سوت وتىرىسى قاڭتاردىڭ 10-جۇلدىزىنا بەلگىلەنگەن. وقيعانىڭ قالاي ءوربيتىنىن ۋاقىت كورسەتە جاتار.
جىلدىڭ اياقتالۋىنا ءبىر اپتا ۋاقىت قالدى. سول ارالىقتا ەندى ەشكىم شۋلاتىپ جۇرمەسە بولدى. جاڭا جىلدى جانجالسىز قارسى الايىق!
