قازاقستان مەن كورەيا عالىمدارى جىلقى ءوسىرۋ تاجىريبەسىمەن بولىسەدى

استانا. قازاقپارات - قازاق عالىمدارى كورەي ارىپتەستەرىمەن جىلقى ءوسىرۋ تاجىريبەسىمەن بولىسەدى. ال كورەيا عىلىمي ينستيتۋتتارى سولتۇستىك، باتىس جانە شىعىس قازاقستانداعى قولايسىز اۋا رايى جاعدايىندا سويا ءوسىرۋدىڭ قىر- سىرىن اشىپ بەرەدى.

 ءىرى قازاقستاندىق عىلىمي- زەرتتەۋ ينستيتۋتتارىنىڭ باسشىلارى كورەياعا ساپار اياسىندا وسىنداي كەلىسىمگە كەلدى. كورەيالىق كونكۋك ۋنيۆەرسيتەتى مەن قازاق ۇلتتىق اگرارلىق ۋنيۆەرسيتەتى ەلىمىزدە بىرلەسكەن كافەدرا اشۋعا كەلىستى. كورەيلىكتەردى قازاقستاندىق جىلقى ءوسىرۋ تاجىريبەسى قىزىقتىرادى. ءبىراق ولار ءۇشىن جىلقى ەتى ازىق ەمەس.

 ايىپ ىسقاقوۆ، سولتۇستىك قازاقستان مال جانە وسىمدىك شارۋاشىلىعى عىلىمي زەرتتەۋ ينستيتۋتىنىڭ باس ديرەكتورى

 - وسى كونكۋك ۋنيۆەرسيتەتىنىڭ عالىمدارى قازىر قازاقستانعا كەلىپ جىلقى شارۋاشىلىعى بويىنشا بىرلەسكەن جۇمىس ىستەۋدى كوزدەپ وتىر. سەبەبى جىلقى مايىنان ولار ءارتۇرلى كوسمەتيكالىق زاتتار الادى ەكەن. ال كورەيا - مەديتسينالىق تۋريزم، كوسمەتيكا شىعارۋ جاعىنان ىلگەرى كەلە جاتقان ەل. سوندىقتان قازاقستاننان مال شارۋاشىلىق سالاسىنداعى كوپتەگەن شيكىزاتتى الىپ، سونى قور ەسەبىندە پايدالانۋ كوزدەلىپ وتىر.

كيم سۋ كي، كونكۋك ۋنيۆەرسيتەتىنىڭ پروفەسسورى:

 - چەچجۋدو ارالىندا شامامەن 25 مىڭ باس جىلقى بار. ءبىراق ولاردى ءمىنىپ سەرۋەندەيمىز. جالپى، اپتاسىنا 3-4 -جىلقى سويىلادى. الايدا مال باسىن كوبەيتۋ ءۇشىن تەحنولوگيا جەتىسپەيدى. سوندىقتان جىلقى وسىرۋدە جەتىستىككە جەتكەن قازاقستاننان تاجىريبە العىمىز كەلەدى.

 كورەيادا ءداندى داقىلدىڭ 150 مىڭ ءتۇرى ساقتالعان روبوتتىق گەن بانكى قۇرىلدى. سونداي وسىمدىكتىڭ ءبىرى - سويا قازىر كورەي ەلىندە تاپشى. سوندىقتان ونىڭ ەگىس القابىن 100 مىڭنان 400 مىڭعا ۇلعايتىپ، سولتۇستىك، باتىس جانە شىعىس قازاقستاندا ءوسىرۋ كوزدەلىپ وتىر.

سەرىك كەنەنبايەۆ، قازاق ەگىنشىلىك جانە وسىمدىك شارۋاشىلىعى عىلىمي- زەرتتەۋ ينستيتۋتىنىڭ ديرەكتورى:

 - كونكۋك ۋنيۆەرسيتەتىمەن قاتار كەنبۋك ۋنيۆەرسيتەتى. ولاردىڭ عالىمدارى سويا داقىلدارىن وسىرۋمەن اينالىسادى. وسى ۋنيۆەرسيتەتتىڭ پروفەسسورمەن ءبىز جولىقتىق. ولاردىڭ گەندىك قورىمەن ءبىزدىڭ عىلىمي- زەرتتەۋ ينستيتۋتىندا سەۋىپ كورىپ، ونى ارى قاراي جالعاستىرۋ. ىنتىماقتاستىقتىڭ تاعى ءبىر باعىتى - كادر دايارلاۋ. كورەيالىق ۋنيۆەرسيتەتتەردىڭ بىرىندە جەرگىلىكتى سويا سۇرىپتارىن قازاقستاندىق اسپيرانت زەرتتەپ جاتىر. قازاقستانعا ورالىپ، ول كورەيلىك ارىپتەستەرمەن بىرگە ءوزىنىڭ تاجىريبەسىن باسقالارعا ۇيرەتىپ، ءتىپتى سويانىڭ جاڭا سۇرپىن شىعارۋدى كوزدەپ وتىر.

 اۆتورلارى: ۆلاديسلاۆ سوي، لي سانگ حەن

«حابار 24» ارناسى