16:28, 21 - جەلتوقسان 2016 | GMT +5
جوڭعار قاقپاسىن باعىندىرۋدى ارماندايتىن عالىم «بولاشاق ەنەرگياسى» بايقاۋىن جەڭىپ الدى
استانا. قازاقپارات - بۇگىن ق ر ەنەرگەتيكا مينيسترلىگى مەن «استانا ەكسپو-2017» ۇلتتىق كومپانياسى ۇيىمداستىرعان «بولاشاق ەنەرگياسى» اتتى بايقاۋدىڭ جەڭىمپازدارى انىقتالدى.
60 جاستاعى عالىم، تەحنيكا عىلىمدارىنىڭ كانديداتى، بايقاۋعا جەل ەنەرگياسىنا قاتىستى جوبا ۇسىنعان مارات يسەكەيەۆ جەڭىمپاز اتاندى، دەپ حابارلايدى قازاقپارات.
«ءبىزدىڭ بىرەگەي - جوڭعار قاقپاسى دەگەن جەل ءدالىزىمىز بار. ول جەردە نەمىستىڭ دە، شۆەيتساريانىڭ دا، اۆستريانىڭ دا عالىمدارى 30 مەتر بيىكتىكتە قۇندىرعى ورناتپاق بولدى. ال، مەن ءومىر بويى وسى جوڭعار قاقپاسىن باعىندىرۋدى ارمانداپ كەلەمىن»، - دەيدى عالىم.
مارات يسەكەيەۆ بايقاۋعا ۇسىنعان جوبا «روتورلىق تيپتەگى كوپ دەڭگەيلى كوپ قاتارلى جەل ستانسياسى» دەپ اتالادى. ەندى عالىمنىڭ جوباسى استانادا وتەتىن ەكسپو حالىقارالىق كورمەسىندەگى قازاقستاننىڭ ۇلتتىق پاۆيلونىنا قويىلادى.
اۆتور: كەنجەكەي توقتامۇرات قىزى
