مينيستر زەينەتاقى مەن جاردەماقىنىڭ قالاي وسەتىندىگىن ءتۇسىندىردى

استانا. قازاقپارات - ق ر دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا ەلباسى نۇرسۇلتان نازاربايەۆتىڭ زەينەتاقى مەن بالا تۋعاندا بەرىلەتىن مەملەكەتتىك جاردەماقىنى ۇلعايتۋ تۋرالى تاپسىرماسىنا وراي تۇسىنىكتەمە بەردى،

دەپ حابارلايدى قازاقپارات.

«زەينەتاقىنى 20 پايىزعا كوتەرۋ تۋرالى تاپسىرما بەرىلدى. ءسوز ىنتىماقتى زەينەتاقى جايىندا بولىپ وتىر. قازىر ءبىز 1 - قاڭتاردان باستاپ 9 پايىزعا كوتەرەمىز. 1- شىلدەدەن تاعى دا 11 پايىزعا كوتەرىلىپ، تولىقتاي العاندا جىلىنا 20 پايىز بولادى. بالا تۋۋىنا بايلانىستى بەرىلەتىن جاردەماقى بويىنشا ءبىز 1 - قاڭتاردان 7، ال 1- شىلدەدەن 13 پايىزعا كوتەرىپ، تولىقتاي العاندا 20 پايىز بولادى»، - دەدى مينيستر.

سونىمەن قاتار ول ەل بيۋدجەتىنەن بۇل ماقساتقا قانشا اقشا جۇمسالاتىندىعىن دا ناقتى ءتۇسىندىرىپ بەردى. «بىزدە زەينەتكەرلەر 2 ميلليون ادام جانە شامامەن 300-400 مىڭ بالا بار. ەگەر، بارلىعىن قوسىپ سانايتىن بولساق، شامامەن 90 ميلليارد تەڭگە قاجەت. قازىر ءبىز مۇنى قارجى مينيسترلىگىمەن بىرگە ساناۋدامىز»، - دەپ اتاپ ءوتتى.

دۇيسەنوۆانىڭ ايتۋىنشا، 2018 -جىلدىڭ 1 - شىلدەسىنەن باستاپ بازالىق زەينەتاقى تاعايىنداۋ ەڭ تومەن كۇنكورىس دەڭگەيى مەن جۇمىس وتىلىنە بايلانىستى تاعايىندالاتىندىعىن ەسكەرتە كەتتى.

ەستەرىڭىزگە سالا كەتسەك، ەل تاۋەلسىزدىگىنىڭ 25 جىلدىق مەرەيتويىنا ارنالعان سالتاناتتى جيىندا ەلباسى نۇرسۇلتان نازاربايەۆ ەل ۇكىمەتىنە كەلەسى جىلدان باستاپ زەيناتاقى كولەمىن 20 پايىزعا ارتتىرۋدى تاپسىرعان بولاتىن.

اۆتور: مارلان جيەمباي