پۋتين مەن ەردوعان سيرياعا قاتىستى كەلىسسوزدەردى استانادا وتكىزۋدى ۇسىندى
رەسەي مەن تۇركيا ەلدەرىنىڭ باسشىلارى نۇرسۇلتان نازاربايەۆتى قازاقستان رەسپۋبليكاسى تاۋەلسىزدىگىنىڭ 25 جىلدىعىمەن قۇتتىقتاپ، حالقىمىزعا باق-بەرەكە تىلەدى جانە ودان ارى ءوسىپ-وركەندەي بەرۋىنە نيەتتەستىك ءبىلدىردى.
ۆ. پۋتينمەن اڭگىمەلەسۋ بارىسىندا جوعارى ەۋرازيالىق ەكونوميكالىق كەڭەستىڭ الداعى وتىرىسى جانە ۇ ق ش ۇ سامميتىن وتكىزۋ ماسەلەلەرى تالقىلاندى. تۇركيا پرەزيدەنتىمەن سويلەسۋ كەزىندە ر. ت. ەردوعان استاناعا بيىلعى 12- جەلتوقسانعا جوسپارلانعان ءىس-ساپارىنىڭ كەيىنگە قالدىرىلعانىنا وكىنىش ءبىلدىردى. تۇركيا كوشباسشىسى الداعى ۋاقىتتا ءبىزدىڭ ەلگە كەلۋگە دايىن ەكەنىن ايتتى.
رەسەي مەن تۇركيا پرەزيدەنتتەرى ەلباسىمەن كۇن تارتىبىندەگى وزەكتى وڭىرلىك جانە حالىقارالىق ماسەلەلەردى تالقىلادى. رەسەي مەن تۇركيا كوشباسشىلارى سيرياداعى قاقتىعىسۋشى تاراپتار اراسىنداعى كەلىسسوزدەردى استانادا وتكىزۋگە مۇددەلى ەكەندىكتەرىن ءبىلدىردى.
نۇرسۇلتان نازاربايەۆ بۇل باستامانى قولداپ، قازاقستان ەلورداسىندا مۇنداي كەلىسسوزدەر جۇرگىزۋ ءۇشىن قاجەتتى جاعداي جاساۋعا دايىن ەكەنىن مالىمدەدى. قازاقستان پرەزيدەنتى سيرياداعى قاقتىعىستى بەيبىت رەتتەۋگە باعىتتالعان حالىقارالىق كۇش-جىگەردى ءبىزدىڭ ەلدىڭ ءاردايىم قولداپ كەلە جاتقانىن اتاپ ءوتتى.
