ءديدار امانتاي ءلايلا سۇلتان قىزى تۋرالى: ەكى كىتاپ جازعانىن بىلەمىز، ءبىراق ءبىر كىتاپ وقىدى ما؟
بۇل تۋرالى Stan.kz حابارلايدى.
اعىمداعى جىلى ماۋسىمنىڭ 18- كۇنى الماتى قالاسىندا تانىمال تەلەجۇرگىزۋشى ءلايلا سۇلتان قىزىنىڭ كىتابىنىڭ تۇساۋى كەسىلدى. «مەنىڭ ەكىنشى كىتابىم» اتتى تۋىندىنى الماتىلىقتار ۇزاق كۇتتى. سەبەبى، ول تۋرالى تەلەجۇرگىزۋشى ءوزىنىڭ الەۋمەتتىك پاراقشاسىندا ءجيى جازىپ ءجۇردى. اراسىندا ۇزىندىلەر دە كەلتىرىپ وتىردى.
مۇنىمەن قاتار، ءلايلا حانىم ءار قالاداعى تۇساۋكەسەر راسىمدەرىنە جانار دۇعالوۆا، تاۋەكەل ءمۇسلىم، دينا تولەپبەرگەن سىندى جۇلدىزداردى شاقىرىپ وتىردى. وسىلايشا اتالعان كىتاپ از ۋاقىت ىشىندە حالىق اراسىندا تەز تارادى. اقىن ءارى جازۋشى ءديدار امانتاي كىتاپتىڭ تەز تارالۋىنا قاتىستى ويىن ءبولىستى.
«ءبىز «ءتاڭىردىڭ كىتابى»، «بورحەستىڭ كىتابى» دەپ جۇرگەندە، ءلايلا سۇلتان قىزى «مەنىڭ ەكىنشى كىتابىم» دەگەن ءوز كىتابىن جازىپ تا تاستادى، جازباق تۇگىلى جارىققا شىعارىپ تا تاستادى. وقىرماندارى - «مەن سەنى تەلەۆيزوردان كورگەنمىن» دەگەن قالىڭ اۋديتوريا.
تەلەۆيزوردان كورمەگەندە، كىتاپ وتپەيتىن ەدى... ەكى كىتاپ جازعانىن بىلەمىز، ءبىراق ءبىر كىتاپ وقىدى ما ەكەن؟» - دەيدى ءديدار امانتاي.
جەلى قولدانۋشىلارى دا ءوز كەزەكتەرىندە جوعارىداعى پىكىردى قوشتاي ءتۇستى. «قازىر كىتاپ جازۋ تۇككە تۇرمايتىن ىسپەن تەڭ. كىم كورىنگەن كىتاپ اۆتورى بولىپ جاتىر. وزدەرىن سونداي ءبىر كلاسسيك سانايتىندارىنا قاراپ قارنىڭ اشادى. كوركەم ادەبيەتتىڭ دە قۇنىن وسىلاي قاشىرىپ جاتقاندارى وكىنىشتى»، «وسىنى كىم ايتار ەكەن دەپ ءجۇر ەدىم»، «دۇرىس ايتاسىز»، «وتە ورىندى سىن»، «ءبىراق تاڭقالۋدىڭ دا قاجەتى جوق. قازىر ءبارى ءانشى، ءارتىس، جازۋشى، اقىن، جۋرناليست» دەپ جازادى ولار.
