اكىمدەر بالاباقشالاردىڭ اقشاسىن قالاي ۇرلايدى

استانا. قازاقپارات - ق ر مەملەكەتتىك قىزمەت ىستەرى جانە سىبايلاس جەمقورلىققا قارسى كۇرەس اگەنتتىگىنىڭ ماماندارى مەكتەپكە دەيىنگى مەكەمەلەردى قارجىلاندىرۋ سالاسىندا ءبىرقاتار زاڭ بۇزۋشىلىقتاردى انىقتادى، دەپ حابارلايدى قازاقپارات ءتىلشىسى.

اگەنتتىكتىڭ قورىتىندىسىنا سايكەس، بالاباقشالاردى قارجىلاندىرۋ سالاسىنداعى قىلمىستاردىڭ دەنى - بيۋدجەت قارجىسىن ۇرلاۋ، قىزمەت بابىن اسىرا پايدالانۋ، پارا الۋ مەن جالعان قۇجاتتار جاساۋ ارەكەتتەرى. «ماسەلەن، وڭتۇستىك قازاقستان وبلىسىنىڭ ماقتارال اۋدانىندا «بالاپان» مەن «2016-2019 -جىلدارعا ارنالعان ءبىلىم بەرۋدى دامىتۋ» باعدارلامالارىن ىسكە اسىرۋ بارىسىندا 100 ميلليون تەڭگەدەن استام بيۋدجەت قارجىسى ۇرلاندى. وسىلايشا، اۋىلدىق وكرۋگتاردىڭ اكىمدەرى - اليەۆ، يبراگيموۆ، قالدىبايەۆ، تۇرشايەۆ، ەرىمبەتوۆ، بەكتۇرسىنوۆ پەن ساتىبالديەۆتەر مەكتەپكە دەيىنگى مەكەمە باسشىلارىمەن كەلىسە وتىرىپ، بالالاردىڭ سانىن قولدان كوبەيتۋ ارقىلى اقشانى جىمقىرعان»، - دەلىنگەن رەسمي حابارلامادا.

رەسمي اقپارات بويىنشا تەك ەكى جىلدىڭ ىشىندە اكىمدەر مىڭداعان بالانى بىرنەشە بالاباقشادا تىركەپ ۇلگەرگەن. وسى ىسپەتتى سىبايلاس جەمقورلىق ارەكەتتەرى الماتى، شىعىس قازاقستان، جامبىل،  قىزىلوردا، ماڭعىستاۋ مەن قوستاناي وبلىستارىندا انىقتالدى. ونداي قىلمىستارعا، كوپ جاعدايدا، زاڭ نورمالارىنىڭ ءوزى جاعداي جاساپ بەرىپ وتىر. وسىعان بايلانىستى اگەنتتىك ءبىلىم جانە عىلىم مينيسترلىگىنە ءتيىستى ۇسىنىستارىن جولدادى.

اۆتور: ارمان اسقاروۆ