ينگۋشەتيانىڭ تۇڭعىش پرەزيدەنتى اۋشيەۆ قازاقستانعا جەر اۋدارىلعان كەزدەردى ەسكە الدى
«شەشەن-ينگۋش حالقىن دەپورتاتسيالاۋ كەزى بىزگە وتە اۋىر تيگەنى راس. ءبىراق قوناقجاي قازاق حالقى، وزدەرى ءبىر ءتۇيىر ناندى ءبولىسىپ وتىرسا دا، بارىن بەردى. ءبىز ونى ەش ەستەن شىعارمايمىز. ونى ءبىزدىڭ بالالارىمىز دا، نەمەرەلەرىمىز دە بىلەدى، الداعى ۇرپاقتار دا جادىندا ساقتاپ قالادى. قازاقستان ءبىز ءۇشىن تۋعان جەرىمىزگە اينالدى. قازىرگى ۋاقىتتا قازاقستان قارقىندى دامىپ كەلە جاتقان تەگەۋرىندى مەملەكەتكە اينالدى. 80-90-جىلدارداعى قازاقستان مەن بۇگىنگى قازاقستاننىڭ اراسى جەر مەن كوكتەي. مەن استانادا دا، الماتىدا دا ءجيى بولامىن. وسى 25 جىل ىشىندە قازاقستان قاتتى وزگەردى. ەكونوميكاسى قارىشتاي ءتۇستى»، - دەپ اتاپ ءوتتى ول استانادا ەلباسى نۇرسۇلتان نازاربايەۆتىڭ قاتىسۋىمەن ءوتىپ جاتقان قازاقستان حالقى اسسامبلەياسى ەتنومادەني بىرلەستىكتەرىنىڭ «بەيبىتشىلىك پەن كەلىسىمنىڭ 25 جىلى» فەستيۆالىندە.
سونىمەن قاتار اۋشيەۆ قازاقستاننىڭ تاۋەلسىزدىك جىلدارىندا مەملەكەتتىڭ دامۋىنا ۇلكەن ۇلەس قوسقان نازاربايەۆتىڭ ەرەن ەڭبەگىن جوعارى باعالادى. «ارينە، ەڭ ۇلكەن ەڭبەك پرەزيدەنت نۇرسۇلتان نازاربايەۆتىڭ ەنشىسىندە. قيىن زاماندا بارشا حالىقتى جۇمىلدىرىپ، تۇتاس ەلدىڭ باسقارۋىن ءوز موينىنا الدى. 1991-جىلى بۇرىنعى كەڭەس وداعى مەملەكەتتەرىندە ۇلت ارالىق ارازدىعى جوق ەل جوق ەدى. حالىق پەن ەتنوستار اراسىندا قاندى قاقتىعىستار ورىن الىپ جاتتى. ءبىراق ءبىر شاڭىراقتا ۇلت پەن ۇلىستاردى بارىنەن كوپ توپتاستىرعان قازاقستاندا بەيبىتشىلىك بولدى. وسى 25 جىلدى تاتۋ-ءتاتتى ءومىر كەشكەن قازاقستان حالقى باقىتتى ۋاقىتتى باستان وتكەردى. قازاقستاندى بارشا الەم بىلەدى، وعان سەنەدى، ونىڭ كوشباسشىسىنا سەنەدى. نۇرسۇلتان ءابىش ۇلى قولعا الىپ وتىرعان ىستەرىنىڭ تاعى ءبىر ۇلكەن ميسسياسى - ىقپالداستىق. نازاربايەۆ ت م د ەلدەرىن قىزعىشتاي قورعاپ كەلە جاتقان 29- پانفيلوۆشى دەپ بەكەر ايتپايدى»، - دەدى اۋشيەۆ.
اۆتور: جاسۇلان جولدىبايەۆ
