بالعىنبەك يماشەۆ: بالالاردى وتانشىلدىق رۋحتا تاربيەلەپ جاتقان ۇلتتىق يدەيالوگيا جوق
وقۋدا وزات، دارىندى ءھام ونەرلى بالالار باراتىن بۇل لاگەر جەكە مەنشىككە بەرىلىپ، تەك قالتالى ازاماتتاردىڭ بالالارى باراتىن لاگەرگە اينالماق ەكەن. ۇلت بولاشاعىنا الاڭداعان ايتىسكەر وسى ماسەلەگە قاتىستى ويىن بيلىككە قاراتا جەتكىزگەن. اقىننىڭ الەۋمەتتىك جەلىدەگى جازباسىن الىپ- قوسپاسىز نازارلارىڭىزعا ۇسىنامىز:
دابىل! دابىل! دابىل!
ءبىز ءوزى تاۋەلسىزدىك العالى نەنى جەكەشەلەندىرمەدىك؟ ءبىر جاعىنان جەكە مەنشىك پەن مەملەكەتتىك مەنشىك بولعانى دۇرىس شىعار... ءبىراق، كەشە كوڭىلىمە جاقپاعان جايسىز جاڭالىق ەستىپ قالدىم. مەملەكەتتىڭ شەشىمىمەن كوپتەگەن مەكەمەلەرمەن بىرگە «قازاقستاننىڭ ارتەگى» اتانعان بۋرابايداعى «بالداۋرەن» ساناتوريى (لاگەر تۋرالى اقپارات الۋ ءۇشىن قازاقشا ۋيكيپەديادان قاراڭىز) دە جەكەشەلەنىپ كەتۋى مۇمكىن! ياعني، ەلىمىزدەگى ەڭ قابىلەتتى، دارىندى، وزات، ونەرلى وقۋشىلار ەم الاتىن لاگەر، باي ادامداردىڭ بالالارى اقىلى تۇردە دەمالاتىن ورىنعا اينالماق!
«بالالار - بولاشاعىمىز! قازاقستاندىق برەند» دەگەن اڭگىمە تابىس پەن پايدا تۇرعاندا قۇر ءسوز بولىپ قالادى ەكەن.
ونداعان جىلدار بويى جىلىنا 6000 بالا قابىلداپ، ولارعا تاماشا تابيعات اياسىندا ەمدەپ- ساۋىقتىرۋمەن قاتار ۇلتتىق ءتالىم، وتانسۇيگىشتىك پەن مەملەكەتشىلدىك تاربيە بەرىپ كەلە جاتقان مەكەمە ەندى بىرەۋدىڭ اقشا تاباتىن مەنشىگى بولىپ كەتۋى مۇمكىن!
ءبىزدىڭ ەلىمىزدە 3000000 استام بالا بار. ولاردى كەڭەستىك كەزدەگىدەي وكتيابريات، پيونەر، كومسومول دەپ وتانشىلدىق رۋحتا تاربيەلەپ جاتقان ۇلتتىق يدەيالوگيا جوق! ەرىكسىز ايتىسكەر اقىن بەكجان اشىربايەۆتىڭ:
وكتيابرياتتار ورنىنا،
اقپاقۇلاقتار كەلدى عوي.
پيونەرلەر ورنىنا،
زيان ەرلەر كەلدى عوي.
كومسومولدار ورنىنا،
نان سوعارلار كەلدى عوي.
كوممۋنيستەر ورنىنا،
كوررۋپيستەر كەلدى عوي! - دەگەنى ەسكە تۇسەدى.
«بالداۋرەن» - ول ۇلتتىق برەند! «بالداۋرەن» - ول اقشالى ەمەس، اقىلدى، تەڭگەلى ەمەس، ءتالىمدى، رۋبلدى ەمەس، ءبىلىمدى، دوللارلى ەمەس، دارىندى بالالاردىڭ دەمالىس ورنى!
«ءبىز - سۇلۋمىز، بالدايمىز! بالداۋرەندى تاڭدايمىز!» - دەپ ۇرانداعان بۇلدىرشىندەرىمىز بۇدان بىلاي: «باي ەمەسپىز ونداي ءبىز، بالداۋرەنگە بارمايمىز» - دەپ زارلاپ قالماسا ەكەن! ەلباسىنىڭ تىكەلەي تاپسىرماسىمەن اشىلعان، تاۋەلسىزدىكتىڭ بالالارعا تارتۋى بولعان «بالداۋرەن» مەملەكەت مەنشىگىندە قالۋى ءتيىس!!!
P. S.
قازاقستان حالقىنا كومسومولداعى قىزمەتىنەن باستاپ تانىلعان يمانعالي تاسماعامبەتوۆ سەكىلدى ۇلتجاندى، بىلىكتى باسشى، يدەولوگيا سالاسىنا باس بولىپ كەلگەندە مۇنداي سوراقىلىققا جول بەرمەيدى دەپ ءۇمىت ەتەمىز!
