وڭىرلەردە جەكە ينۆەستيتسيالار ەسەبىنەن سالىناتىن الەۋمەتتىك نىساندار سانى ارتادى

استانا. قازاقپارات - مەملەكەتتىك-جەكەمەنشىك ارىپتەستىك جوبالارىن ازىرلەۋ مەن دايارلاۋ بويىنشا اۋقىمدى جۇمىستار باستالدى.

بۇل تۋرالى بۇگىن ۇكىمەت وتىرىسىندا ۇلتتىق ەكونوميكا ءمينيسترى قۋاندىق بيشىمبايەۆ ءمالىم ەتتى، دەپ حابارلايدى قازاقپارات.

«م ج ءا جوبالارىن ازىرلەۋ مەن دايارلاۋ بويىنشا اۋقىمدى جۇمىستار باستالىپ، ايماقتاردىڭ بەلسەندىلىگى ارتىپ كەلەدى. بۇگىندە جالپى سوماسى 19,6 ميلليارد تەڭگەگە 27 جوبا بويىنشا كەلىسىم-شارت جاسالعان. كونكۋرسقا دەيىنگى جانە كونكۋرس جاريالاۋ كەزەڭىندە 68,5 ميلليارد تەڭگە سوماسىنا 27 جوبا بار. تۇجىرىمداماسىن ازىرلەۋ كەزەڭىندە تاعى 249 جوبا تۇر»، - دەدى ۇ ە م باسشىسى.

مىسالى، شىعىس قازاقستان وبلىسىندا جالپى قۇنى 6,7 ميلليارد تەڭگەگە 11 بالاباقشا بويىنشا كەلىسىم-شارت جاسالعان، ونىڭ ىشىندە سەمەيدە  1290 ورىندىق 5 بالاباقشا مەن وسكەمەندە  1640 ورىندىق 6 بالاباقشا بار. سونىمەن قاتار جالپى سوماسى 51 ميلليارد تەڭگەگە ەكى اۋرۋحانا بويىنشا كونكۋرس جاريالاۋ جوسپارلانۋدا. الماتى وبلىسىندا 1,5 ميلليارد تەڭگە سوماسىنا 7 سەرۆيستىك-ازىرلەۋ ورتالىعىنىڭ جوباسى بويىنشا كەلىسىم-شارتتار جاسالىپ، 1,9 ميلليارد تەڭگە سوماسىنا 3 بالاباقشا بويىنشا كونكۋرستار جاريالاندى.

اقتوبە وبلىسىندا مۇز سارايى، جەدەل جاردەم ستانساسى، وفتالمولوگيالىق جانە ستوماتولوگيالىق كلينيكالار مەن ەكى سپورت عيماراتىن جالداۋعا قاتىستى 6 جوبا بويىنشا 9,7 ميلليارد تەڭگە سوماسىنا كەلىسىمشارت جاسالىپ وتىر. اقمولا وبلىسىندا 1,3 ميلليارد تەڭگە سوماسىنا ەكى بالاباقشا بويىنشا كەلىسىم-شارتتار جاسالعان.

سونىمەن قاتار جالپى قۇنى 22,9 ميلليارد تەڭگە سوماسىنا بالاباقشالار، ەمحانا، اۋرۋحانا مەن تۇرعىن ءۇي-كوممۋنالدىق شارۋاشىلىعى نىساندارىن رەكونسترۋكتسيالاۋ جانە سالۋعا قاتىستى 50 جوبا بويىنشا قۇجاتتار ازىرلەنىپ جاتىر.

اۆتور: جاسۇلان جولدىبايەۆ