قازاقستاندا شاميل الياۋتدينوۆ سياقتى ءدىنتانۋشىلار بار ما

استانا. قازاقپارات - ءدىن ىستەرى جونىندەگى كوميتەت ءتوراعاسىنىڭ ورىنباسارى باقىتجان كۇلەكەيەۆتىڭ ايتۋىنشا، ەلىمىزدە مىقتى يمامدار بار.

ءبىراق ولار حالىقپەن جۇمىس ىستەۋدىڭ باسقا ءادىس- تاسىلدەرىن قولدانادى، دەپ حابارلايدى قازاقپارات ءتىلشىسى. «بۇگىندە قازاقستان مۇسىلماندارى ءدىني باسقارماسى وسى ماسەلەگە قاتتى الاڭداپ كەلەدى. سەبەبى بىزدە ونداي ادامدار از. ءيا، ءوز ويىن ەركىن ءبىلدىرىپ، ءتيىستى اقپاراتتى جەتكىزە الاتىن ءدىن قىزمەتكەرلەرى مەن يمامدار بار. ءبىراق ولاردىڭ سانى كوپ ەمەس بولعاننان كەيىن، «500 يمام» باعدارلاماسى قولعا الىندى. اتالعان باستاما يمامداردىڭ شەبەرلىگىن شىڭداۋدى كوزدەيدى. ارينە، شاميل الياۋتدينوۆ وزىندىك ورنى بار ادام عوي. بالكىم، ءدال سونداي ادام جوق شىعار. دەگەنمەن، ءبىزدىڭ يمامدارىمىز دا قالىسپاي كەلەدى»، - دەيدى ب. كۇلەكەيەۆ.

وسى ورايدا ول باس ءمۇفتي مەن ونىڭ ورىنباسارلارىن مىسال رەتىندە كەلتىردى. سەبەبى ولاردىڭ تەولوگيالىق بىلىمدەرى مىقتى ءارى مەملەكەتتىك ساياساتتى جاقسى بىلەدى. «سوندىقتان بىزدە ونداي ماماندار جوق دەپ ايتۋعا بولمايتىن شىعار. ولاردىڭ سانى از. سوسىن ولار حالىقپەن جۇمىس ىستەۋدىڭ باسقا ءادىس- تاسىلدەرىن قولدانادى. ەڭ باستىسى، ءدىني باسقارما بۇل پروبلەمانى جاقسى تۇسىنەدى جانە يمامداردىڭ شەبەرلىگىن شىڭداۋعا كۇش سالىپ كەلەدى»، - دەدى كوميتەت باسشىسىنىڭ ورىنباسارى استانادا وتكەن باسپا ءسوز ءماسليحاتىندا.

اۆتور: ارمان اسقاروۆ