استانانىڭ تەز تاعام دونەردى جاسايتىن نىساندارى قانشالىقتى قاۋىپسىز
سوندىقتان ولارعا قاتىستى تەكسەرۋ جۇرگىزىلمەيدى.
بۇل جايىندا قازاقپاراتتىڭ رەسمي ساۋالىنا وراي استانا قالالىق توتەنشە جاعدايلار دەپارتامەنتىنەن حابارلادى.
ەلوردانىڭ ت ج دەپارتامەنتى باستىعىنىڭ مىندەتىن اتقارۋشى، ازاماتتىق قورعانىس پولكوۆنيگى مەيرامبەك قايسانوۆتىڭ جاۋابىنا سايكەس، ق ر كاسىپكەرلىك كودەكسىندە مۇنداي نورما بار. سونىمەن بىرگە دەپارتامەنت تاماق دايىنداۋدا گاز باللونىن پايدالاناتىن نىساندارعا دا ەسەپ جۇرگىزبەيدى. «دەگەنمەن 2012 -جىلدىڭ 9 -قاڭتارىنداعى № 532-IV « گاز جانە گازبەن جابدىقتاۋ تۋرالى» ق ر زاڭىنىڭ 7 -بابى 6-1 -تارماعىنىڭ تارماقشالارىنا سايكەس تۇرمىستىق باللوندار مەن گازبەن جابدىقتاۋ نىساندارى جۇيەسىن قاۋىپسىز پايدالانۋ تالاپتارىنىڭ ساقتالۋىنا باقىلاۋدى وبلىستاردىڭ، رەسپۋبليكالىق ماڭىزى بار قالالاردىڭ جانە ەلوردانىڭ جەرگىلىكتى اتقارۋشى ورگاندارى جۇزەگە اسىرادى»، - دەپ ناقتىلايدى ت ج د.
ەستەرىڭىزگە سالا كەتسەك، قاراشانىڭ سوڭىندا استانادا دونەر جاسايتىن نىساندا گاز باللونى جارىلىپ، 40 شارشى مەتر اۋماق ورتكە ورانعان ەدى. ءسال كەيىنىرەك، وسى فاكتى بويىنشا قىلمىستىق ءىس تە قوزعالدى. قالالىق توتەنشە جاعدايلار دەپارتامەنتىنىڭ حابارلاۋىنشا، گاز باللونىنىڭ جارىلۋ فاكتىسى كوبىنە جەكە تۇرعىن ءۇي سەكتورىندا تىركەلەدى. دەگەنمەن، 2 رەت قۇرىلىس نىسانىندا جانە 2 رەت دونەر جاسايتىن جەردە گاز باللونى جارىلعان ەدى. قازاقپاراتقا قالالىق كاسىپكەرلىك جانە ونەركاسىپ باسقارماسىنان حابارلاعانداي، بۇگىنگى كۇنى استانادا «1000 ورىن» باعدارلاماسى اياسىندا تەز تاعام دايىنداۋ نىسانىنا 120 رۇقسات بەرىلگەن. «ۇلتتىق ەكونوميكا ءمينيسترىنىڭ 2015 -جىلعى 30 -مامىرىنداعى «مەملەكەتتىك سانيتارلىق- ەپيدەميولوگيالىق باقىلاۋ مەن قاداعالاۋعا جاتاتىن ونىمدەر مەن ەپيدەميالىق ماڭىزى بار نىسانداردى بەكىتۋ تۋرالى» بۇيرىعىنا سايكەس 50 دەن استام ورىنى بار ازىق- تۇلىك تاعامدارىن شىعاراتىن، قايتا وڭدەيتىن جانە ساتاتىن نىساندارعا مەملەكەتتىك باقىلاۋ جانە قاداعالاۋ جۇرگىزىلەدى»، - دەلىنگەن باسقارما جاۋابىندا.
اۆتور: مارلان جيەمباي
