يرانداعى قازاقتار موڭعول ساربازدارىنىڭ ءرولىن سومداپ ءجۇر - فوتو

استانا. قازاقپارات - يراندا تۇراتىن ابدۋللا توبىش تەگەران ماڭىندا ءتۇسىرىلىپ جاتقان كوپ سەريالى فيلمگە اكتەر رەتىندە قاتىسىپ ءجۇر. ءوزىنىڭ ايتۋىنشا، ول ون بەس جاسىنان بەرى يراندا بىرنەشە فيلمگە ءتۇسىپ، سونىڭ بارىندە موڭعول ۇلتى وكىلىنىڭ رولدەرىندە ويناعان.

(سۋرەتتە يراندا تۇراتىن ەتنيكالىق قازاق پەيمان ءابىش ۇلى. سۋرەت اۆتوردىڭ جەكە مۇراعاتىنان.)

- «دارعا اسىلعان جانكەشتىلەر»، «موڭعولدار قايتا ورالعاندا»، «حان سارايىندا كوتەرىلگەن جالاۋ» دەپ اتالاتىن ءۇش فيلمگە ءتۇستىم. وسى جولى موڭعول شاپقىنشىلىعى كەزىندە تۇتقىنعا تۇسكەن پارسى قىزى تۋرالى ءافسانا نەگىزىندە قۇرىلعان «ادەمى اي» دەپ اتالاتىن فيلمگە ءتۇسىپ جاتىرمىن. بۇل فيلمدە موڭعول جاۋىنگەرلەرىنىڭ رولىندە ويناپ ءجۇرمىن، - دەيدى ابدۋللا توبىش.

يرانداعى جەرگىلىكتى كينورەجيسسەر داۆۋد ميرباقەريدىڭ باسشىلىعىمەن تۇسىرىلە باستاعان «ادەمى اي» فيلمىنە قاتىسىپ جۇرگەن ابدۋللا توبىشتان باسقا دا ون شاقتى ەتنيكالىق قازاق جاسى بار. سولاردىڭ ءبىرى، ساۋدا- ساتتىقپەن اينالىساتىن پەيمان ءابىش ۇلى دا كينوعا تۇسۋگە كەزدەيسوق كەلىپ قالعانىن ايتادى.

- ارنايى وقىعان ماماندىعىم جوق. وتكەن جىلى تانىس جىگىتتەردىڭ ءبىرى «وسىنداي كينو تۇسىرگەلى جاتىر، قاتىساسىڭ با» دەگەن سوڭ سۋرەتىمدى جىبەرگەنمىن. بيىل شاقىرىپ، ءتۇسىرىلىم باستالىپ كەتتى، - دەيدى ول ازاتتىق تىلشىسىنە.

 

فوتوگالەرەيا: يراندا كينوعا ءتۇسىپ جاتقان ەتنيكالىق قازاقتار

پەيماننىڭ ايتۋىنشا، «بۇل فيلمنىڭ قوسىمشا ەپيزودتارىنا 22 قازاق ءتۇسىپ جاتىر، تاعى 10 قازاق جىگىتى كەلمەك».

پەيمان ءابىش ۇلىمەن بىرگە كينوعا ءتۇسىپ جۇرگەن يراندىق قازاق جىگىتىنىڭ ءبىرى ءوزىن «جاقىپ شادكاممىن» دەپ تانىستىردى.

- الماتىدان جاقىندا ورالدىم. وتكەن جىلى كاستينگ بولىپ، سۋرەتتەرىمىزدى جىبەرگەن ەدىك. كەلسەم، كينوعا تۇسۋگە ىزدەپ جاتىر ەكەن. مەن شىڭعىسحاننىڭ ءوزى جاۋلاپ العان جەرگە قالدىرىپ كەتكەن اسكەرباسى رەتىندە ويناپ جاتىرمىن. ءبىز قازىر تەك ات ۇستىندە شايقاسامىز، - دەيدى جاقىپ شادكام.

كينوعا ءتۇسىپ جاتقان قازاق جىگىتتەردىڭ ءبارى وسى كۇنگە دەيىن اتقا ءمىنىپ كورمەگەن ەكەن.

- ىرىكتەۋ بولعان كەزدە ءبىزدى ەڭ الدىمەن اتقا مىنگىزىپ، شاپقىلاتىپ كوردى. بۇرىن اتقا مىنبەسەك تە، بىردەن وتىرىپ كەتتىك. قازىر ات ۇستىندەگى ويىنداردىڭ ءبارىن مەڭگەرىپ الدىق. ودان كەيىن ەكى اپتادا ارنايى ادامدار كەلىپ، قالاي قىلىشتاسۋ كەرەك، اتتان قالاي قۇلاۋ كەرەك دەگەن سەكىلدى نارسەلەردى ۇيرەتتى، - دەيدى جاقىپ شادكام.

يراندىق فيلمگە ءتۇسىپ جاتقان، كينەماتوگرافيا سالاسىنان بۇعان دەيىن بەيحابار قازاق جىگىتتەرى «ارنايى ءبىلىمىمىز جوق بولعانىمەن ءوزىمىزدىڭ كىم ەكەنىمىزدى تانىتىپ ءجۇرمىز» دەيدى.

يرانداعى قازاق جاستارىنىڭ سوزىنشە، ولار ءتۇسىپ جۇرگەن «ادەمى اي» فيلمى شىڭعىسحان زامانىن بەينەلەيدى. ول ەلدەگى قازاقتار تۇسكەن العاشقى فيلم - رەجيسسەرى پارۆيز كيمياۆيدىڭ 1973 - جىلى ەكرانعا شىققان «موڭعولدار» فيلمى.

نۇرتاي لاحان ۇلى

https://www.azattyq.org