قازاق حالقى تاريحتا ەكى رەت جويىلىپ كەتە جازدادى - حانگەلدى ءابجانوۆ
كونفەرەنسيادا عالىمدار مەن قوعام قايراتكەرلەرى ەگەمەن قازاقستانداعى پرەزيدەنت ينستيتۋتىنىڭ قالىپتاسۋى مەن دامۋى؛ پرەزيدەنت ينستيتۋتىنىڭ قازاقستاندىق مودەلى، ەرەكشەلىكتەرى، تاريحي ءمانى جانە بولاشاعى؛ تاۋەلسىز قازاقستاننىڭ دامۋى مەن وركەندەۋى جولىنداعى تۇڭعىش پرەزيدەنت ن. ءا. نازاربايەۆتىڭ ءرولى سىندى وزەكتى تاقىرىپتاردا بايانداما جاسادى.
جيىندا تولىمدى بايانداما جاساعان ش. ۋاليحانوۆ اتىنداعى تاريح جانە ەتنولوگيا ينستيتۋتىنىڭ ديرەكتورى، تاريح عىلىمدارىنىڭ دوكتورى، پروفەسسور حانگەلدى ءابجانوۆ جاڭا قازاقستان تاريحى مەن ەلباسىنىڭ مەملەكەتتىلىكتى قالىپتاستىرۋداعى رولىنە توقتالدى.
«قازاق حالقى ەكى رەت تاريح بەتىنەن جوعالىپ كەتە جازدادى، ءبىرىنشى رەت جوڭعار شاپقىنشىلىعىندا، اقتابان شۇبىرىندىدا، ەكىنشى، 1932 -جىلعى اشارشىلىقتا. جۇبان اقىن ايتقانداي: «مىڭ ءولىپ، مىڭ تىرىلگەن» قازاقپىز. تاۋەلسىزدىك تاريحىن قاراپ وتىرساق، ەكى شىندىققا تىرەلەمىز: 1- شىسى - مەملەكەتتىلىكتى ساقتاۋ، 2- ءشىسى - مەملەكەتتى باسقاراتىن تۇلعانىڭ ەرەكشە قابىلەتكە يە بولۋى. ەلباسىنىڭ ەرەكشە قاسيەتى ونىڭ كورەگەندىلىگى دەر ەدىم. 20-30 جىل بۇرىندى بولجاي الاتىن قابىلەتى. 1992 -جىلى ناۋرىز ايىندا «ەگەمەندى قازاقستان» گازەتىنە ەلىمىزدىڭ مەملەكەت بولىپ قالىپتاسۋى تاقىرىبىندا جازعان ماقالاسىندا- اق ەلباسى 1992 -جىلدان 2012 -جىلعا دەيىن نە بولاتىنىن ايتىپ، ەل بولاشاعىنىڭ جولىن ايقىنداپ بەرگەن. بۇل ماقالانى مەن مانيفەست دەر ەدىم. بۇل - ارينە، ەلباسىنىڭ كورەگەندىلىگى. استانانىڭ اۋىسۋىنا قاتىستى ايتقانىندا دا ەشكىم سەنبەگەن ەدى»، - دەدى پروفەسسور حانگەلدى ءابجانوۆ.
سونىمەن قاتار، بۇگىنگى عالىمداردىڭ باس قوسۋىندا ەلباسىنىڭ ۇلتتىق يدەيانىڭ جانە قازاقستاندىق پاتريوتيزمنىڭ قالىپتاسۋى مەن نىعايۋىنداعى ءرولى مەن ونىڭ جۇرگىزىپ وتىرعان «ۇلت جوسپارى - 100 ناقتى قادام» رەمورماسىنا باسا نازار اۋدارىلدى.
اۆتور: الماس مۇقاش ۇلى
