الەمدەگى جالعىز التىن ءوندىرۋ تەحنولوگياسى بار زاۋىت جامبىل وبلىسىندا سالىنادى
تارازدا وتكەن «Taraz Invest - AgroChemical Day 2016» ينۆەست فورۋمىندا جامبىل وبلىسىنىڭ اكىمى مەن گەرمانيالىق «Aurum Deutschland AG» (اۋرۋم دويچلاند اگ) كومپانياسى اراسىندا تاۋ- مەتاللۋرگيالىق كومبيناتتىڭ قۇرىلىسى تۋرالى مەموراندۋمعا قول قويىلدى.
قورداي اۋدانىندا تاۋ-كەن كومبيناتىن تۇرعىزۋ جانە التىن كەنىن بايىتۋ تۋرالى كەلىسىمگە جامبىل وبلىسىنىڭ اكىمى كارىم كوكىرەكبايەۆ پەن «Aurum Deutschland AG» ج ش س باس ديرەكتورى يوگان شتول قول قويدى.
«مەن وسىندا، قورداي اۋدانىندا دۇنيەگە كەلدىم، - دەدى قازاقپارات تىلشىسىمەن سۇحباتتا يوگان شتول، - زاۋىت قۇرىپ، بيزنەسپەن اينالىسۋ ءۇشىن وتانىما ورالدىم». مايبۇلاق التىن كەن ورنىنداعى زاۋىتتىڭ جوسپارلانعان جىلدىق قۋاتى - 5-6 توننا.
قۇرىلىستىڭ قۇنى شامامەن 250 ميلليون دوللارعا جەتەدى، ال جوبانىڭ جالپى قۇنى - 300 ميلليون دوللار، گەرمانيالىق كومپانيا ءوز اكتسيالارىنىڭ %100 يە. قورداي اۋدانىندا شامامەن 900 جاڭا جۇمىس ورنى اشىلادى، دەپ اتاپ ءوتتى ول.
«قازىر مايبۇلاق كەن ورنىن بارلاۋ ۇستىندەمىز، - دەپ جالعاستىردى كومپانيا ديرەكتورى. - ءبىز وعان 30 ميلليون دوللار قارجى سالدىق، ءۇش جىلدا بىتىرەمىز دەگەن ويدامىز. قازىر جوبالىق جۇمىستار ءجۇرىپ جاتىر، ولاردى ءالى دە قورعاپ شىعۋ كەرەك. سوندا، شامامەن ءبىر جارىم جىلدان سوڭ زاۋىت قۇرىلىسىن باستايمىز. التىندى ءوندىرۋ جۇيەسى جاڭا گەرمانيالىق تەحنولوگيامەن جۇزەگە اسادى، ول ءالى الەمدە جوق، العاش رەت وسى جەردە سىناپ كورەمىز. جۇيە ازىرلەنىپ دايىن تۇر، ءبىز التىنمەن بىرگە وزگە دە مەتاللدار شىعاتىن قورداي اۋدانىنىڭ كەن ورنىنا ارنالعان تەحنولوگيانى ازىرلەۋ ءۇشىن 12 ميلليون ەۋرو جۇمسادىق».
