استانادا ءابىش كەكىلبايەۆتىڭ اۋديتورياسى اشىلدى - فوتو

استانا. قازاقپارات - بۇگىن ليەۆ گۋميليەۆ اتىنداعى ەۋرازيا ۇلتتىق ۋنيۆەرسيتەتىندە مەملەكەت جانە قوعام قايراتكەرى، حالىق جازۋشىسى ءابىش كەكىلبايەۆ اتىنداعى اۋديتوريا اشىلدى.

سول جەردە ءابىش اعانىڭ ءومىرى مەن شىعارماشىلىعىنا ارنالعان العاشقى ءدارىس وقىلىپ، كەكىلبايەۆتىڭ اتاۋلى شاكىرتاقىسى تابىستالدى، دەپ حابارلايدى قازاقپارات ءتىلشىسى.

ۋنيۆەرسيتەت رەكتورى ەرلان سىدىقوۆتىڭ ايتۋىنشا، جاڭادان اشىلعان اۋديتوريادا كۇندەلىكتى دارىستەردى وتكىزۋ ارقىلى قازاقتىڭ بىرەگەي جازۋشىلارىنىڭ ءبىرى - ءابىش كەكىلبايەۆتىڭ شىعارماشىلىعىمەن ەتەنە تانىستىرۋ جوسپارلانعان.

«بۇگىن ءابىش اعانىڭ دۇنيەدەن وزعانىنا جىل تولىپ وتىر. جىلدىق اسى بەرىلىپ جاتىر. سول كۇنگە سايكەستەندىرىپ، ەۋرازيا ۇلتتىق ۋنيۆەرسيتەتىندە اتاقتى جازۋشى، قوعام قايراتكەرى ءابىش كەكىلبايەۆتىڭ اۋديتورياسىن اشىپ وتىرمىز. بەلگىلى تۇلعالاردىڭ ەسىمىمەن اۋديتوريا اشۋ - بۇل ۋنيۆەرسيتەتىمىزدە قالىپتاسقان جاقسى ءبىر ءداستۇر. ويتكەنى سول تۇلعالاردىڭ ءومىرى، شىعارماشىلىعى مەن قايراتكەرلىگىنەن بۇگىنگى جاستار تاربيە الۋى قاجەت. باعدارلامامەن وقىتۋ ءوز الدىنا، ال تۇلعالار ارقىلى تاربيەلەۋ، ول دا ءبىلىم بەرۋ ادىستەرىنىڭ ءبىرى دەپ ءبىلۋىمىز كەرەك. اۋديتوريا اشۋ بۇل جاي تاقتايشا ىلە سالۋ ەمەس. ول جەردە وقىلاتىن دارىستەر، بەرىلەتىن ساباقتار ەرەكشە ءبىر سەزىمدە ءوتۋى ءتيىس. ماسەلەن، بۇگىنگى شاراعا قاتىسقان ازاماتتار مىنا اۋديتوريادا ءابىشتىڭ ءيىسى اڭقىپ تۇر دەدى. ودان ارتىق باعا بار ما؟ دەمەك، جاستاردىڭ بويىنا وسى سەزىمدى قۇيا الاتىن بولساق، ول ادامنىڭ رۋحاني جاعىنان باي ازامات بولىپ قالىپتاساۋىنا ءوز سەپتىگىمىزدى تيگىزەمىز»، - دەيدى ە. سىدىقوۆ.

سونداي-اق بۇگىن ءابىش كەكىلبايەۆ اتىنداعى اۋديتوريادا العاشقى ءدارىس وقىلدى. اقىن-جازۋشىلار جازۋشىنىڭ ومىرىنەن جىلى ەستەلىكتەرىن ايتىپ، ولەڭ شۋماقتارىن ارنادى.

اۋديتوريانىڭ اشىلۋىنا ءا. كەكىلبايەۆتىڭ جۇبايى كلارا اپاي دا قاتىستى. «مىناۋ ەندى، ءابىش بار كەزدە اۋىز اشپايتىن ەدىم. ول كەتكەسىن سويلەۋگە تۋرا كەلىپ تۇر. ءۇش-ءتورت وبلىستى ارالادىق، بارىندە دە ازداپ سويلەگەنىم بار. سويتە-سويتە ۇيرەنەتىن شىعارمىن. ءبىر ۇيدە ءبىر شەشەن بولۋى كەرەك دەيدى عوي. سول ءسوزدىڭ ءبارى ابىشتە بولاتىن.

«الىپ انادان تۋادى» دەيدى. سول انامىز جاقسى كىسى بولعان. جالعىزىم دەپ، ونىڭ تىلەگىن ءومىر-باقي تىلەپ وتكەن. جالعىزىنىڭ ازامات بولۋىنا 40 جىل ەڭبەك ەتكەن. ءابىشتىڭ ءوزى باياعىدا ستۋدەنت كەزىندە ءبىر توپ جاس جازۋشىلاردى جيناپ، جاستار ۇيىمىن قۇرعان. سول كەزدە ءبارى مۇحتار اۋەزوۆكە بارىپ، سول كىسىنىڭ ءبىر اۋىز ءسوزىن ەستىگىسى كەلىپ، ءابىشتى الدارىنا سالادى ەكەن. سودان ول اۋەزوۆتىڭ ۇيىنە بارىپ، جازۋشىنىڭ جاستار ۇيىمىنىڭ جينالىسىندا ءسوز سويلەۋىن سۇراعان. مۇحتار اعا كەلىپ، جيىندى اشقاندا «مىنا بالادان بىردەڭە شىعادى» دەگەن ەكەن.

ەندى، ول كەزدە اكادەميكتەر از. سول سەبەپتى جاستار ونداي ادامدارمەن امانداسىپ، ءبىر تىلدەسكەندەرىنە ءماز بولىپ جۇرەتىن. قازىر جاقسى ۋاقىتقا جەتتىك. كەرەمەت ۋنيۆەرسيتەتتەر اشىلىپ جاتىر. سوندىقتان جاستارعا ايتارىم، تەحنيكانىڭ ءبارىن بىلگەن دۇرىس. سوندا دا كىتاپتىڭ ءدامىن تاتىپ، اعا-اپالارىڭىزدان رۋحاني تاعىلىم العاندارىڭىز دۇرىس»، - دەپ اتاپ كورسەتتى كلارا جۇمابايەۆا.

بۇگىنگى شارا اياسىندا ۋنيۆەرسيتەتتىڭ جۋرناليستيكا جانە ساياساتتانۋ فاكۋلتەتىنىڭ 2-كۋرس ستۋدەنتىنە ءا. كەكىلبايەۆ اتىنداعى اتاۋلى ستيپەنديا تابىستالدى.

اۆتور: ارمان اسقاروۆ