داريعا نازاربايەۆا ءبىرقاتار حالىقارالىق كەزدەسۋلەر وتكىزدى
ەكىجاقتى قارىم-قاتىناستاردىڭ بولاشاعى تۋرالى پىكىر الماسۋ شەڭبەرىندە قازاقستان مەن ا ق ش اراسىنداعى پارلامەنتارالىق ىنتىماقتاستىقتى دامىتۋعا ەرەكشە نازار اۋدارىلدى.
دجوردج كرول «ەكسپو-2017» حالىقارالىق كورمەسى اياسىندا ا ق ش كونگرەسسمەندەرىنىڭ استاناعا كەلۋگە نيەتتى ەكەنىن جەتكىزدى، دەپ حابارلايدى سەناتتىڭ باسپا ءسوز قىزمەتىنەن.
د. نازاربايەۆا پارلامەنتتىڭ جانە سەناتتىڭ حالىقارالىق قاتىناستار، قورعانىس جانە قاۋىپسىزدىك كوميتەتىنىڭ زاڭ شىعارۋشىلىق قىزمەتى تۋرالى ەلشىنى حاباردار ەتتى.
تاراپتار سونداي-اق جاھاندىق جانە ايماقتىق قاۋىپسىزدىكتى قامتاماسىز ەتۋدىڭ ءتۇرلى اسپەكتىلەرى جانە سونىڭ ىشىندە تەرروريزم مەن ەكسترەميزمگە قارسى كۇرەس ماسەلەسىن دە تالقىلادى.
ساۋد ارابياسى كورولدىگىنىڭ قازاقستانداعى ەلشىسى گۋرم بەن سايد ال-مالحانمەن كەزدەسۋى بارىسىندا ولار مەملەكەت باسشىسى ن. ا. نازاربايەۆتىڭ ساۋد ارابياسىنا جۋىرداعى ساپارى ناتيجەلەرى اياسىنداعى ەكى جاقتى ىنتىماقتاستىقتىڭ بولاشاعى تۋرالى اڭگىمە بولدى. ديپلومات سەناتوردى قازاقستانعا 3,4 ميلليون دوللار كولەمىندە مەديتسينالىق قۇرىلعىنىڭ قويىلعانىنان حاباردار ەتتى.
سەناتور ساۋد ارابياسى باسشىلىعىنا كومەگى ءۇشىن العىسىن بىلدىرە كەلە، كورولدىك ءبىزدىڭ ەلىمىزدە جۇرگىزىلىپ جاتقان الەۋمەتتىك-ەكونوميكالىق، ساياسي رەفورمالارعا قولداۋ بىلدىرگەن العاشقى ەلدەردىڭ ءبىرى بولعانىن جانە قازاقستاننىڭ الەۋمەتتىك ماڭىزعا يە ماقساتتارعا قول جەتكىزۋى جولىندا قولداۋدى جالعاستىرىپ كەلە جاتقانىن اتاپ ءوتتى.
سونداي-اق حالىقارالىق قاتىناستار، قورعانىس جانە قاۋىپسىزدىك كوميتەتىنىڭ ءتورايىمى داريعا نازاربايەۆا يزرايلدىڭ بۇرىنعى قورعانىس ءمينيسترى گەنەرال-لەيتەنانت شاۋل موفازبەن كەزدەستى.
كەزدەسۋ بارىسىندا تاراپتار يزرايل پرەمەر-ءمينيسترى بەنيامين نەتانياحۋدىڭ استاناعا اعىمداعى جىلدىڭ جەلتوقسانىنا جوسپارلانعان رەسمي ساپارى ەكى ەل اراسىنداعى ىنتىماقتاستىققا جاڭا سەرپىن بەرۋى قاجەتتىگىن اتاپ ءوتتى.
د. نازاربايەۆا جاھاندىق قاۋىپسىزدىكتى نىعايتۋ، لاڭكەستىكپەن كۇرەس جانە وركەنيەتتەر اراسىنداعى ديالوگتى ىلگەرىلەتۋ تۇرعىسىندا ەكى ەلدىڭ ۇستانىمدارىنىڭ جاقىندىعىن اتاپ ءوتتى.
