استانا اكىمى مينيستر كەزىندەگى جۇمىسىن ەسكە الدى

استانا. قازاقپارات - استانا قالاسىنىڭ اكىمى اسەت يسەكەشەۆتىڭ ايتۋىنشا، قازاقستاندىق كومپانيالاردى يننوۆاتسيالاردى قولعا الۋعا مەملەكەت قانا ەمەس، داعدارىس تا ۇيرەتتى، دەپ حابارلايدى قازاقپارات ءتىلشىسى.

«بۇگىندە «يننوۆاتسيالار» ءساندى ءبىر سوزگە اينالدى. بۇل ءسوز كەز كەلگەن كومپانيانىڭ تابىستى جولىن انىقتايدى. ءالى ەسىمدە، وسىدان ون جىل بۇرىن قازاقستاننىڭ دامۋ بانكىنە، «دامۋ» قورىنا جانە تاعى باسقا قارجى ۇيىمدارىنا بارعان كوپتەگەن كاسىپورىندار تەحنولوگيالار تۋرالى مۇلدەم ءسوز قوزعاعان جوق.

«وي، مەن ءبىر قۇرال- جابدىقتاردى اكەلە سالامىن» دەپ قوياتىن. ال وزىق تەحنولوگيالارعا ءمان بەرمەيتىن. ينجەنەرلەردى دايارلاۋ جۇمىسىنا دا كوڭىل بولگەن جوق. قازىر كوپتەگەن كومپانيالار يننوۆاتسياسىز كاسىپتىڭ جۇرمەيتىنىن ءتۇسىندى. ءبىر جاعىنان داعدارىس تا كومەكتەسىپ، ولاردىڭ كوزىن اشىپ بەردى. بۇگىندە يننوۆاتسيالاردى وندىرىستە عانا ەمەس، ماركەتينگتە دە كەڭىنەن قولدانىپ كەلەدى. ەندى، ءبارى تۇسىنگەن شىعار، وتكەن ونجىلدىققا نەگىزگى ماسەلە قارجىعا تىرەلسە، اعىمداعى ونجىلدىقتا تەحنولوگيالىق جاڭالىقتار ءبىرىنشى ورىنعا شىعىپ وتىر»، - دەدى يسەكەشەۆ XI يننوۆاتسيالىق فورۋمىندا.

ايتا كەتەيىك، قازاقستاننىڭ ۇدەمەلى يندۋستريالدىق- يننوۆاتسيالىق دامۋ باعدارلاماسى اسەت يسەكەشەۆتىڭ جەتكەشىلىگىمەن قولعا الىنعان بولاتىن. 2009 -جىلدان باستاپ ول يندۋستريا جانە ساۋدا ءمينيسترى قىزمەتىنە تاعايىندالعان بولاتىن. سودان بەرى اتالعان مەملەكەتتىك ورگاننىڭ اتاۋى «جاڭا تەحنولوگيالار جانە يننوۆاتسيالار»، ودان كەيىن «ينۆەستيتسيالار جانە دامۋ مينيسترلىگى» بولىپ اۋىسسا دا، يندۋستريالدىق- يننوۆاتسيالىق دامۋ باعدارلاماسىنىڭ العاشقى بەسجىلدىعىندا يندۋستريالدىق باعىتقا باسىمدىق بەرىلدى. ەندى، ەكىنشى بەسجىلدىقتا يننوۆاتسيالارعا كوڭىل بولىنەدى. الايدا بۇل جۇمىس يسەكەشيەۆتىڭ ءىزباسارى - مينيستر جەڭىس قاسىمبەككە جۇكتەلىپ وتىر. ال يسەكەشيەۆتىڭ ءوزى بيىل يندۋستريالدىق- يننوۆاتسيالىق دامۋ باعدارلاماسىنىڭ العاشقى بەسجىلدىعى بويىنشا ەسەپ بەرەردىڭ الدىندا استانا قالاسىنىڭ اكىمى قىزمەتىنە تاعايىندالدى.

اۆتور: ارمان اسقاروۆ