اۆتوبۋستاعى بيلەت ساتۋشىلار «قويانداردى» ۇستاۋ ءۇشىن ەكەۋلەپ جۇمىس ىستەپ ءجۇر

استانا. قازاقپارات - ەلوردادا قاتىنايتىن اۆتوبۋستاردىڭ بىرىندە جولاۋشىلار ەكى كوندۋكتوردىڭ جۇمىس ىستەپ جۇرگەنىن بايقاپ قالدى.

قازاقپارات ءتىلشىسى سول اۆتوبۋستى تاۋىپ الىپ، ونداي شارانى نە ءۇشىن ەنگىزگەنىن ءبىلدى. باس كەزىندە اۆتوبۋس كوندۋكتورى ءوز ارىپتەسىن تاعىلىمداماشى (ستاجەر- رەد. ) دەپ تانىستىرسا دا، ارتىنان ونىڭ وزىنە كومەكتەسىپ جۇرگەن ەكىنشى كوندۋكتور ەكەنىن جەتكىزىپ، ونداي شاراعا نە ءۇشىن بارعانىن ايتىپ بەردى.

الايدا اۆتوبۋستىڭ باعدارى مەن ءوزىنىڭ اتى-ءجونىن كورسەتپەۋدى سۇرادى. ويتكەنى قازىرگى ەرەجەگە سايكەس، ءبىر اۆتوبۋستا ەكى كوندۋكتورعا جۇمىس ىستەۋگە بولمايدى. «ءبىز ونداي شاراعا بارۋعا ءماجبۇر بولىپ وتىرمىز. سەبەبى تاڭەرتەڭ جانە كەشكى ۋاقىتتا ادام كوپ بولادى دا، اۆتوبۋستىڭ ءبىر جاق شەتىنەن ەكىنشى شەتىنە دەيىن جەتكەنشە «قويان» بولىپ مىنەتىن جولاۋشىلار جولاقىسىن تولەمەي، ءتۇسىپ كەتەدى. ونداي ادامدار ابدەن ۇيرەنىپ قالعان. جۇمىسقا بارا جاتقاندا دا، شىققاندا دا اۆتوبۋستىڭ ادامعا لىق تولى ەكەنىن ءبىلىپ شىعادى. سودان اۆتوبۋسقا ءمىنىپ، ءۇش- ءتورت ايالدامادان كەيىن ءتۇسىپ، كەتە بەرەدى. سول سەبەپتى بۇگىن كومەككە تاعى ءبىر كوندۋكتوردى شاقىردىم. جاقسى بولدى، ەكى جاق شەتىنەن كىمنىڭ كىرگەنىن، كىمنىڭ شىققانىن كورىپ وتىرامىز دا، جولاقىسىن لەزدە جيناپ الامىز. ايتپەسە، جالعىز جۇرگەندە جولاۋشىلاردىڭ اراسىمەن سىعىلىسىپ جۇرگەنىڭ. ءبىر جەردەن مىنگەن ادامداردىڭ جولاقىسىن جيناپ العانشا، كەزەكتى ايالدامادان كىرىپ جاتادى. وندايدا ادامدى دا، اقشانى دا ساناپ ۇلگەرمەيسىڭ»، - دەيدى اۆتوبۋستىڭ ءوز كوندۋكتورى.

ونىڭ ايتۋىنشا، بۇگىندە ءبىر اۆتوبۋستا ەكى كوندۋكتورعا جۇمىس ىستەۋگە رۇقسات جوق. اۆتوپارك باسشىلىعى اقشانىڭ ەسەپ- قيسابى بۇزىلىپ كەتەدى دەپ ويلايدى. دەگەنمەن، ءاربىر جولاۋشى بيلەت تالاپ ەتسە، اقشانىڭ ەسەبى بۇزىلمايدى.

اۆتور: ارمان اسقاروۆ