شەكارامىزدى قۇقىقتىق تۇرعىدان انىقتاۋ تاۋەلسىزدىگىمىزدىڭ زور جەڭىسى دەپ قاراستىرۋ كەرەك - اشىمبايەۆ
دەپ حابارلايدى قازاقپارات.
«وزدەرىڭىز دە بىلەتىندەي، ءبىزدىڭ جەرىمىز كولەمى جاعىنان الەمدە 9- ورىندى الادى. بۇل اتا- بابامىزدىڭ «اق بىلەكتىڭ كۇشىمەن، اق نايزانىڭ ۇشىمەن» قورعاپ، دانالىعىمەن بىزگە جەتكىزگەن، باعا جەتپەس قۇندىلىعىمىز ەكەندىگى ءسوزسىز. بۇگىنگى جەرىمىزدىڭ ورنالاسقان اۋماعى دا وتە كۇردەلى. سەبەبى توڭىرەگىمىزدە رەسەي مەن قىتاي سىندى الپاۋىت ەلدەر، ورتا ازيا مەملەكەتتەرى بار. ءبىراق، وسىعان قاراماستان وسىنداي ۇلان- عايىر جەرىمىزدى ساقتاپ قالعان اتا- بابالارىمىزعا ءارقاشاندا تاعزىم ەتۋىمىز كەرەك»، - دەدى ول قازاقپارات تىلشىسىمەن سۇحباتتاسۋى بارىسىندا.
وسى رەتتە ءماجىلىس دەپۋتاتى قازاقستان ءوز تاۋەلسىزدىگىنىڭ ارقاسىندا، تۇڭعىش پرەزيدەنتى - ەلباسى نۇرسۇلتان نازاربايەۆتىڭ تىكەلەي كەلىسسوزدەر جۇرگىزۋىنىڭ ناتيجەسىندە كورشى مەملەكەتتەر رەسەي، قىتايمەن جانە ورتا ازيا ەلدەرىمەن شەكاراسىن دەليميتاتسيا پروتسەسىن تابىستى وتكىزگەندىگىن باسا ايتتى. «دەليميتاتسيا پروتسەسى دەگەنىمىز - كارتادا شەكارانى بەلگىلەپ، ەكى جاقتىڭ سوعان كەلىسۋى، كەلىسىمگە كەلۋى. سونىمەن قاتار ءبىز تاۋەلسىزدىكتىڭ ارقاسىندا دەليميتاتسيادان كەيىن دەماركاتسيا پروتسەسىن، ياعني، مەملەكەتتىك شەكارامىزدى ارنايى بەلگىلەر ورناتۋ ارقىلى شەگەندەۋدى دە جۇرگىزدىك. بۇل پروتسەسس نەگىزىنەن اياقتالدى. دەگەنمەن، ءبىر- ەكى جەر بار. ولاردىڭ ءوزى تەحنيكالىق ماسەلەلەر. جالپى، تاۋەلسىزدىگىمىزدىڭ، ەلباسىمىزدىڭ ارقاسىندا دەليميتاتسيانى دا، دەماركاتسيانى دا نەگىزىنەن اياقتادىق دەپ ايتا الامىز»، - دەدى اشىمبايەۆ.
دەپۋتات تاۋەلسىزدىك جىلدارى ىشىندە شەكارا قىزمەتىمىزدى كۇشەيتۋگە باسا ءمان بەرىلگەندىگىن، وعان مەملەكەت، ۇكىمەت، پارلامەنت تارابىنان ۇلكەن كومەك كورسەتىلگەندىگىن، مول قارجى بولىنگەندىگىن اتاپ ءوتتى. سونىڭ ارقاسىندا شەكارا قىزمەتىمىز كۇشەيتىلىپ، بۇگىندە ەل تۇتاستىعىنا وزگەنىڭ قول سۇعۋىنا جول بەرمەيتىن، بوتەن ادامنىڭ زاڭسىز شەكارانى كەسىپ ءوتۋ ارەكەتىن تىياتىن شەكاراشىلارىمىزدىڭ كاسىبي تۇرعىدا جەتىلگەندىگىن باسا ايتتى.
«ارينە، سوڭعى جىلدارى شەكارا قىزمەتىندە ءبىراز پروبلەما بولعانىن، كەلەڭسىز جايتتاردىڭ ورىن العانىن بىلەمىز. ءبىراق، ءبارىمىز دە ەندى ول قايتالانبايدى دەپ سەنەيىك. شەكاراداعى كۇردەلى ماسەلەلەرگە بايلانىستى دەپۋتاتتار دا ءبىراز ماسەلە كوتەردى. ماسەلەن، وسىدان بىرنەشە جىل بۇرىن حالىقارالىق ىستەر، قورعانىس جانە قاۋىپسىزدىك كوميتەتىنىڭ مۇشەلەرى، دەپۋتاتتارىمىز شەكارا قىزمەتىمەن بىرلەسە وتىرىپ، «قازاقستاننىڭ مەملەكەتتىك شەكاراسى تۋرالى» زاڭدى ازىرلەدى. ونى ءماجىلىس ماقۇلداپ، سەنات قابىلدادى. قازاقستان پرەزيدەنتى نۇرسۇلتان نازاربايەۆ قول قويدى. بۇگىنگى كۇنى سول زاڭىمىز شەكارامىزداعى قاۋىپسىزدىگىمىزدى قامتاماسىز ەتۋگە، شەكارامىزدى ساقتاۋعا تولىق قۇقىقتىق نەگىز قالىپتاستىرىپ وتىر»، - دەدى ول.
اشىمبايەۆ پارلامەنت دەپۋتاتتارى شەكارامىزدىڭ، شەكاراشىلارىمىزدىڭ جاعدايىن ۇنەمى قاپەردەن شىعارمايتىندىعىن ءارى تۇراقتى تۇردە باقىلاۋدا ۇستايتىندىعىن ايتتى. ويتكەنى، شەكارا مەملەكەتىمىزدىڭ نەگىزى ەكەندىگىنە باسا نازار اۋدارتتى. «شەكاراسىز مەملەكەت جوق. وسى تەرريتوريامىزدى ساقتاپ قالۋ ءۇشىن ءبىزدىڭ شەكارامىز، شەكاراشىلارىمىز مىقتى بولۋى كەرەك. شەكارا ستراتەگيالىق ماسەلە. سوندىقتان وعان ءار ۋاقىتتا دا ءوزىمىزدىڭ كوڭىلىمىزدى ءبولىپ، باقىلاۋدا ۇستاپ وتىراتىن بولامىز. جالپى، شەكارامىزدىڭ ايقىندالۋىندا، دەليميتاتسيالانۋدا، دەكارماتسيالانۋدا تۇڭعىش پرەزيدەنتىمىز ەلباسىنىڭ ايرىقشا ءرولىن اتاپ كورسەتۋگە ءتيىسپىز. سەبەبى، ەلباسىنىڭ كورشى مەملەكەتتەردىڭ باسشىلارىمەن ساۋاتتى كەلىسسوزدەر جۇرگىزۋىنىڭ ناتيجەسىندە عانا شەكارامىزدى انىقتاپ العاندىعىمىزعا ەشكىم داۋ تۋدىرا المايدى. بۇگىندە ءبىراز كورشى مەملەكەتتىڭ ءالى كۇنگە دەيىن شەكارالارىن بەكىتپەگەندىگىن دە بىلەمىز. سونىڭ ناتيجەسىندە ءبىراز پروبلەمالارى دا بار سياقتى. ال قازاقستاننىڭ 25 جىلداعى ۇلكەن جەڭىسى ول ءبىزدىڭ شەكارامىزدى قۇقىقتىق تۇرعىدان انىقتاۋ، بەكىتۋ، قاۋىپسىزدىگىن قامتاماسىز ەتۋ. بۇل ءبىزدىڭ تاۋەلسىزدىگىمىزدىڭ جەتىستىگى، ۇلكەن جەڭىسى دەپ قاراستىرۋ كەرەك»، - دەدى اشىمبايەۆ.
اۆتور: مارلان جيەمباي
