14:03, 23 - قاراشا 2016 | GMT +5
قازاقستان جۋرناليستيكاسى ەندى عانا تاۋەلسىز بولىپ قالىپتاسا باستادى - مينيستر
استانا. قازاقپارات - ساراپشىلاردىڭ بۇگىنگى كەزدەسۋىندە ق ر اقپارات جانە كوممۋنيكاتسيالار ءمينيسترى داۋرەن ابايەۆ «سوڭعى 25 جىلدا قازاقستان جۋرناليستيكاسىنىڭ كەلبەتى قالايشا وزگەردى؟» دەگەن سۇراققا جاۋاپ بەردى، دەپ حابارلايدى قازاقپارات.
«شىنى كەرەك، ءدال قازىر بۇل سۇراققا ءبىر سوزبەن جاۋاپ بەرگەن قيىن. مەنىڭ ويىمشا، بۇگىندە ءبىزدىڭ جۋرناليستيكامىز ەندى-ەندى تاۋەلسىز جۋرناليستيكا بولىپ قالىپتاسىپ كەلەدى. سونداي سانا-سەزىم ەندى جەتىلىپ كەلە جاتىر. ءبىزدىڭ جۋرناليستيكامىز ءالى ءوز ورنىن تاپقان جوق دەپ ويلايمىن. بۇل ءۇردىس ەندى عانا قارقىن الىپ كەلەدى. جاقىن ارادا ءبىر جاعىنا شىعادى دەگەن ويدامىن. قازىر قازاقستان جۋرناليستيكاسى زامان تالابىنا ساي، جان-جاقتى، ناعىز تاۋەلسىزدىككە ساي جۋرناليستيكا بولىپ قالىپتاسىپ كەلەدى»، - دەيدى د. ابايەۆ.
ايتا كەتەيك، بۇعان دەيىن مينيستر اقپاراتتىق قاۋىپسىزدىككە قاتىستى ءوز ويىن ءبىلدىردى. ونىڭ ويىنشا، قازاقستاننىڭ قازىرگى اقپاراتتىق قاۋىپسىزدىگىنىڭ ءبىر وسال تۇسى ول - تازا شەتەلدىك ارنالاردى كورسەتەتىن سپۋتنيكتىك تاباقتار.
اۆتور: ارمان اسقاروۆ
