قازاقستان وڭىرلەرىندەگى نىساندار نازاربايەۆتىڭ ەسىمىمەن اتالۋى مۇمكىن

استانا. قازاقپارات - ەلباسى ەسىمىن ەلدىڭ ماڭىزدى نىساندارىن اتاۋمەن ايشىقتاۋ - ۋاقىت مويىنداتقان تابيعي زاڭدىلىق.

بۇگىن «قازاقستان رەسپۋبليكاسى تاۋەلسىزدىگىنىڭ 25 جىلدىعى دەكلاراتسياسىن قابىلداۋ تۋرالى» ماسەلە قارالىپ جاتقان ق ر پارلامەنتى پالاتالارىنىڭ بىرلەسكەن وتىرىسىندا ءماجىلىس دەپۋتاتى نۇرتاي سابيليانوۆ وسىلاي ءمالىم ەتتى، دەپ حابارلايدى قازاقپارات.

«تاريحي تۇلعانىڭ بويىنداعى قاجىرلى قايرات پەن زور قابىلەت، كۇرەسكەرلىك قاسيەت - ءبۇتىن ەلدىڭ بەينەسى، جاي ەل ەمەس، كەڭ بايتاق دالانى ەن جايلاعان ماڭگىلىككە بەت العان بۇكىل قازاقستاننىڭ بەينەسى. وسى وراسان زور تابىستارىمىزدى دەكلاراتسيا جوباسىندا ۇسىنىلعانداي، استانا قالاسىندا «تاۋەلسىز قازاقستان» مونۋمەنتىن ورناتۋ، مەملەكەتىمىزدىڭ كونستيتۋتسياسىندا تۇڭعىش پرەزيدەنتىمىزدىڭ بىرەگەي ۇلەسىن كورسەتۋ، ەلباسى ەسىمىن ەلوردا مەن باسقا دا ماڭىزدى نىساندارىن اتاۋمەن ايشىقتاۋ - ۋاقىت مويىنداتقان تابيعي زاڭدىلىق»، - دەدى دەپۋتات.

ونىڭ سوزىنە قاراعاندا، تاۋەلسىزدىگىمىزدىڭ 25 جىلدىعىنا ارنالعان بۇل دەكلاراتسيا ق ر تۇڭعىش پرەزيدەنتى، ەلباسى نۇرسۇلتان ءابىش ۇلى نازاربايەۆ اتقارعان ەرەن ەڭبەكتىڭ لايىقتى باعاسى، قازاقستان حالقىنىڭ بەرەكە-بىرلىگىنىڭ جارقىن كورىنىسى دەپ باعالادى.

«ەل مۇددەسىن مۇرات ەتكەن ەلباسىمىزدىڭ ەڭبەگىنىڭ ارقاسىندا جارقىراي كەلگەن جاس مەملەكەت العا قادام باستى. ناقتى جۇيەگە بەت بۇرىپ، جەكەشەلەندىرۋ جۇرگىزىلدى. ينۆەستيتسيالار تارتىلىپ، شەت ەلدەردەن ءوزارا ساۋدا قاتىناستارى جاقسى جولعا قويىلدى. ءتول تەڭگەمىز قولدانىسقا ەنگىزىلىپ، دەربەس قارجى جۇيەسى قۇرىلدى. جۇمىس ىستەۋگە قولايلى جاعداي جاسالىنىپ، جەكە كاسىپكەرلىك قارقىندى دامىدى. بۇل تاۋەلسىز ەلىمىز ءۇشىن بۇرىن- سوڭدى بولماعان ناتيجەسىن بەردى»، - دەدى ن. ءسابيليانوۆ.

ايتا كەتەيىك، پالاتالاردىڭ بىرلەسكەن وتىرىسىنا ق ر پرەمەر-ءمينيسترى باقىتجان ساعىنتايەۆ، ق ر مەملەكەتتىك حاتشىسى گۇلشارا ءابدىقالىقوۆا، ق ر پرەزيدەنتى اكىمشىلىگىنىڭ باسشىسى ادىلبەك جاقسىبەكوۆ، سونداي-اق كونستيتۋتسيالىق كەڭەستىڭ، جوعارعى سوتتىڭ جانە ورتالىق سايلاۋ كوميسسياسىنىڭ ءتوراعالارى، ۇكىمەت مۇشەلەرى، رەسپۋبليكا پرەزيدەنتىنە تىكەلەي باعىناتىن جانە ەسەپ بەرەتىن مەملەكەتتىك ورگانداردىڭ باسشىلارى، پارلامەنت پالاتالارى اپپاراتتارىنىڭ جاۋاپتى قىزمەتكەرلەرى قاتىسۋدا.

اۆتور: رۋسلان عابباسوۆ