دۇكەن ءماسىمحان ۇلى: «دۇنيەءجۇزى قازاقتارىنىڭ بىرلىگى كۇنىن» بەلگىلەۋ كەرەك
بۇل تۋرالى ول ءوزىنىڭ facebook-تەگى جەكە پاراقشاسىندا وسىنداي مالىمدەدى.
«ارداقتى الاش بالاسى!
قادىرلى اعايىن!
قۇرمەتتى باۋىرلار!
دۇنيەجۇزىندەگى ءوزىن «قازاقپىن» دەپ ەسەپتەيتىن ازامات!
ۇلتتىڭ تاعدىرى مەن بولاشاعىنا، بىرلىگى مەن تىرلىگىنە قاتىستى مەنىڭ مىنا ۇسىنىسىما قولداۋ كورسەتىپ، داۋىس بەرۋلەرىڭىزدى سۇرايمىن!
P. S.: الداعى ۋاقىتتا بەرگەن داۋىستارىڭىز سانالىپ، اتى- جوندەرىڭىز جازىلىپ، كورنەكتى قوعام جانە مەملەكەت قايراتكەرلەرىنىڭ، ايگىلى ونەر ادامدارىنىڭ، بەلگىلى اقىن-جازۋشىلاردىڭ، عالىمداردىڭ، سپورتشىلاردىڭ قولى جينالىپ بۇل ۇسىنىس اقورداعا، ق ر پارلامەنتىنە، ق ر ۇكمىەتىنە جونەلتىلەدى.
ۇسىنىس
ءبىر كەزدەرى تاريحي جاعدايلارعا بايلانىستى قازاق حالقى دۇنيەءجۇزىنىڭ تۇكپىر- تۇكپىرىنە تارىداي شاشىراپ، شىلدەي توزىپ كەتتى. تاۋەلسىزدىك العان كۇننەن بەرى ن. ءا. نازاربايەۆتىڭ كوشى- قون جانە دەموگرافيالىق ساياساتىنىڭ ارقاسىندا الىس- جاقىن شەتەلدەردەن ءبىر ميلليونداي قانداسىمىز وتان قۇشاعىنا ورالدى. «قايدا بولسا دا جان باقپاق پارىز» دەگەن قادىمي قاعيدا بار. سول قاعيدامەن ءالى دە 5 ميلليونداي قانداسىمىز دۇنيەنىڭ تۇكپىر- تۇكپىرىندە تىرلىك ەتىپ جاتىر. ەلگە ورالعىسى كەلگەنى جايلاپ كەلە جاتار. ءبىراق سول 5 ميلليون قازاقتىڭ تۇگى قالماي، ءتۇپ قوتارىلىپ كوشىپ كەلۋى دە نەعايبىل.. .
تاۋەلسىزدىككە قول جەتكىزۋدەن، ونى ساقتاپ قالۋدىڭ الدەقايدا قيىن ەكەنىن بارلىقتارىڭىز جاقسى بىلەسىزدەر. ول ءۇشىن مەملەكەتتىڭ ەگەسى بولىپ وتىرعان قازاق حالقىنىڭ ءوزىنىڭ ىشكى ىنتىماق- بەرەكەسى، اۋىزبىرلىگى، تاتۋلىعى، باۋىرمالدىعى شەشۋشى ءرول اتقارادى. جاھاندانۋ دەيتىن مىناداي الماعايىپ زاماندا بىزگە، الاش بالاسىنا ءتىپتى دە ءبىر جاعادان باس، ءبىر جەڭنەن قول شىعارىپ، ايگىلى اقىن سابىر اداي ايتقانداي«ءار قازاق مەنىڭ جالعىزىم» دەپ تىرلىك ەتۋىمىزگە تۋرا كەلەدى. ول ءۇشىن ۇلتىمىزدى ۇيىستىرىپ، جۇرتىمىزدى جۇمىلدىرا تۇسەتىن ماڭىزدى ءىس- شارالار كەرەك. ونداي ءىس- شارانىڭ ءتۇرى كوپ. سونىڭ ءبىرى - ۇلت بىرلىگى كۇنى!
شىنى كەرەك، ءبىزدىڭ ەلدە دە از بولماعان مەركەلەر بار. ءبىراق ولاردىڭ ءبارى مەملەكەتتىك، جالپى ادامزاتتىق، جالپىشىعىستىق، جالپى مۇسىلماندىق سيپاتتا بولىپ كەلەدى. ارينە، ول دا كەرەك. دەگەنمەن، بىزگە قازاق دەيتىن حالىقتىڭ ءوزىنىڭ ىنتىماق- بەرەكەسىنە، اۋىزبىرلىگىنە، تاتۋلىعى مەن باۋىرمالدىعىنا وڭ ىقپال ەتەتىن جەكە مەرەكە وتە كەرەك. سونداي- اق، ول مەرەكە بۇكىل دۇنيەجۇزىندەگى قازاق بالاسىنىڭ بارىنە (كوشىپ كەلگەنى بار، كەلمەگەنى بار، وتاندا ءومىر ءسۇرىپ جاتقانى بار.. .) ورتاق بولۋ كەرەك!
ۇكىمەت ۇسىنىپ، ەلباسى قول قويسا، قازىرشە بەيرەسمي مەرەكە رەتىندە قوعامدىق نەگىزدە اتاپ وتۋگە بولادى. ماسەلەن، باستاپقى كەزدە، قازاقستاندا "دۇنيەءجۇزى قازاقتارى قاۋىمداستىعىنىڭ" ورتالىق اپپاراتى، جانە ونىڭ استانا مەن وزگە وبلىستارداعى بولىمشەلەرى، شەتەلدەردە قازاق مادەني ورتالىقتارى مۇرىندىق بولادى. بىرتە- بىرتە جالپىۇلتتىق دەڭگەيگە كوتەرىلىپ كەتەدى.
بۇل اسىرەسە، ەل ەگەسى بولىپ وتىرعان قازاقستانداعى قانداستارىمىزدىڭ بەرەكە- بىرلىگىنىڭ نىعايا تۇسۋىنە، سونىمەن بىرگە شەتەلدەردە، سونىڭ ىشىندە ەۋروپا ەلدەرىندەگى وتە ازشىلىقتا ءومىر ءسۇرىپ جاتقان قانداستارىمىزدىڭ جاس ۇرپاعى ءۇشىن، ولاردىڭ جىل سايىن باس قوسىپ، وزدەرىنىڭ قازاق بالاسى ەكەندىگىن سەزىنىپ، ۇلت پاتريوتى بولىپ وسۋىنە ەرەكشە يگى ىقپال ەتەدى دەپ سەنەمىز.
«سونىمەن، ءبىز ۇسىنىپ وتىرعان مەرەكەنىڭ اتاۋى - «دۇنيەءجۇزى قازاقتارىنىڭ بىرلىگى كۇنى»
ۋاقىتى - قىركۇيەك ايىنىڭ 30-كۇنى.
بۇل كۇن:
- قازاق ەلى تاۋەلسىزدىگىنىڭ ەكىنشى جىلى، ياعني 1992 -جىلى «دۇنيەءجۇزى قازاقتارىنىڭ تۇڭعىش قۇرىلتايى» وتكەن كۇن.
- دۇنيەءجۇزى قازاقتارى قاۋىمداستىعى قۇرىلعان كۇن.
- حالقىمىزدىڭ پەيىلىندەي دارقان، بەرەكەلى، شۋاقتى كەز.
(ىزدەنە بەرسەك، باسقا دا تاريحي داتالارمەن سايكەس كەلۋى مۇمكىن).
P. S.: ەسكەرتە كەتەتىن ءبىر جاعداي، بۇنداي مەرەكەدەن قورقىپ، ۇركۋدىڭ، ودان الدە قانداي ۇلتشىلدىق سىڭاي ىزدەۋدىڭ قاجەتى جوق! ويتكەنى الەم حالىقتارىنىڭ كوبىندە بۇنداي مەرەكە كوپتەن بەرى تويلانىپ كەلەدى. ءبىز ءبارىن ەمەس، ىرگەمىزدەگى ەكى الىپ كورشىمىز بەن باۋىرلاس ازەربايجان ەلىندە ءداستۇرلى ءتۇرلى تويلانىپ كەلە جاتقانىن ەسكە سالساق تا جەتكىلىكتى.
ال، اعايىن، قولداڭىزدار!
داۋىس بەرىڭىزدەر!
سىزدەرگە دەگەن زور قۇرمەتپەن - باۋىرلارىڭىز دۇكەن ءماسىمحان ۇلى
21-قاراشا 2016 -جىل. استانا» دەپ جازعان عالىم.
