قازاق ءتىلىنىڭ ايانىشتى جاعدايىنا كۇيىنگەن قاراعاندىلىق ستۋدەنت جان ايقايىن جەتكىزدى
الماتى وبلىسىنان قاراعاندىعا وسىدان ءتورت جىل بۇرىن وقۋعا كەلگەن ستۋدەنت قالاداعى ساتۋشىلاردىڭ وعان قازاق تىلىندە قىزمەت كورسەتۋدەن باس تارتىپ، ونى تالاي رەت دۇكەندەردەن قۋىپ شىققانىن ايتادى.
«قاراعاندىعا وقۋعا كەلگەن جىلى ورىسشا ءبىر اۋىز ءسوز بىلمەدىم. كۇندەلىكتى قازاقشا سويلەيتىن بولعان سوڭ، قاجەتىمدى دە سول تىلدە ساتىپ العىم كەلەدى. ورىسشا سويلەگىم كەلمەيدى. ونى سول ءبىر جىلدىڭ ىشىندە مەڭگەرىپ العام. وزىمە قاجەتتى دەڭگەيدە ورىس ءتىلىن بىلەمىن»، - دەيدى ول.
ول وقۋمەن قاتار اۋرۋحانادا مەديتسينالىق قىزمەتكەر بولىپ جۇمىس ىستەيدى.
«مەنىڭ الدىما ورىسشا سويلەيتىن ناۋقاس كەلسە، مەن ءتىلىمدى سىندىرىپ ورىسشا جاۋاپ بەرەمىن»، - دەپ اعىنان جارىلدى ستۋدەنت.
ول، ءتىپتى ۇيىنە جاقىن دۇكەندەردەن ءبىر بولكە نان مەن سۋ ساتىپ الا المايتىن ايتىپ كۇيىندى.
«دۇكەنگە كەلىپ قازاق تىلىندە سۋ سۇراسام، ماعان باجىرايىپ قاراپ ءوزىنىڭ قازاقشا تۇسىنبەيتىنىن ايتىپ قانا قويماي، وزىڭىزگە جەكىپ ۇرسىپ تاستايتىنىن قايتەسىز. كۇندەلىكتى ەستيتىنىم: «سەن مەنىڭ باسقا ۇلت وكىلى ەكەنىمدى كورمەي تۇرسىڭ با، ورىسشا سويلە» دەگەن تالاپ»، - دەيدى جىگىت.
داستان بۇل جاعدايدىڭ تەك دۇكەندە ەمەس، ءدارىحانا، بانك، اۋرۋحانا سياقتى قوعامدىق ورىنداردا كۇندە قايتالانا بەرگەنىنەن شارشاعانىن ايتىپ نالىدى. ءوز ەلىندە وسىلاي قينالعان ول كۇندەلىكتى ومىردە ورىسشا سويلەگىسى كەلمەيتىنىن جەتكىزدى.
«مەنىڭ بۇل ارەكەتىم ەشقانداي دا ەكسپەريمەنت تە ەمەس، ادەيى ەرەگەس تە ەمەس. مەنىڭ جاي عانا ورىسشا سويلەۋگە قۇلقىم جوق»، - دەيدى بولاشاق دارىگەر.
داستان بىرنەشە رەت دۇكەننەن ەشتەڭە ساتىپ الا الماي كەرى قايتقان سوڭ، قول قۋسىرا قاراپ وتىرا الماپتى.
«ءتىلى ولگەنى - ءتىرى ولگەنى» دەيدى عوي قازاق. بۇل ماسەلە الدىمنان ءجيى شىعا باستاعان سوڭ، وعان شىنداپ كىرىستىم. ءبىرىنشى كەزەكتە قاراعاندى قالاسىنداعى ميحايلوۆ پوليتسيا بولىمشەسىنىڭ ەسىگىن قاعىپ، ءتارتىپ ساقشىلارىنان كومەك سۇرادىم. «شىنى كەرەك، ءبىز تۇك بىلمەيمىز» دەپ پوليتسەيلەر مەنى شىعارىپ سالدى»، - دەيدى داستان جاقىپوۆ.
سودان كەيىن ستۋدەنت اكىمشىلىكتەگى شەندىلەرگە بارىپ كورگەن. ولار دا ەشتەڭە ىستەي المايتىندىقدارىن ايتىپ، داستانعا قول ۇشىن سوزۋدان باس تارتقان.
«ەش ناتيجە شىقپاعان سوڭ، «نۇر وتان» پارتياسىنىڭ وبلىستىق فيليالىنا باردىم. سول جەردە ءبىر زاڭگەردى توقتاتىپ الىپ، جاعدايىمدى ايتتىم. ول كىسى ماعان «ءسىزدىڭ شاعىمىڭىز قىزىق ەكەن» دەپ تاڭ قالدى. سودان سوڭ مەنى شاعىم قابىلدايتىن بولىمگە جىبەردى»، - دەپ اڭگىمەسىن ءوربىتتى ستۋدەنت.
ءبىر قىزىعى شاعىمداعى ماسەلەنى پارتيا فيليالىنىڭ قىزمەتكەرلەرى قاي كاتەگورياعا ەنگىزەرىن بىلمەي، تىعىرىققا تىرەلگەن.
«نۇر وتاننىڭ قىزمەتكەرى مەنىڭ شاعىمىمدى قايدا قىستىرارىن بىلمەدى. سەبەبى ول جەردە ادامداردان كەلىپ تۇسەتىن شاعىمدارى ءتۇرلى سالا بويىنشا جۇيەلەنگەن ەكەن. ءبىر قىزىعى وسى ءتىل ماسەلەسىنە بايلانىستى 25 جىلدىڭ ىشىندە ءبىر دە ءبىر ادام شاعىم قالدىرماعان. ونداعى قىزمەتكەرلەر بۇل شاعىمدى قانداي ماسەلەنىڭ قاتارىنا قوساتىنىن بىلمەي دال بولدى. سودان نە كەرەك، شاعىمىمدى قابىلداپ، كومەكتەسەمىز دەپ ۋادە بەرگەندەي بولدى»، - دەيدى داستان.
ورىس ءتىلدى ازاماتتارعا سول تىلدە جاۋاپ بەرىپ جۇرگەن ول بار بولعانى ءوز سۇراعىنا مەملەكەتتىك تىلدە جاۋاپ بەرگەنىن سۇراپ وتىر.
