بوكسشى قانات يسلام وڭتۇستىك قازاقستان جاستارىمەن كەزدەستى

استانا. قازاقپارات - وڭتۇستىك قازاقستان مەملەكەتتىك پەداگوگيكالىق ينستيتۋتىنىڭ ۇجىمى كاسىپقوي بوكسشى قانات يسلامدى شاقىرىپ، جاستارمەن كەزدەسۋ ۇيىمداستىردى.

ونداعى ماقسات - جاستاردى جارقىن ازاماتتاردىڭ ءومىر جولىنا ءۇڭىلدىرىپ، دۇرىس باعىتتا تاربيەلەۋ. كەزدەسۋ ويلاعانداي ءوربىدى. كاسىپقوي بوكسشى، WBA تۇجىرىمى بويىنشا لاتىن امەريكاسى ايماعىنىڭ چەمپيونى قانات يسلام شىناشاقتاي بالانىڭ شىن باتىرعا اينالۋ قۇپياسىن اشتى.

ءيسى قازاققا تانىمال كاسىپقوي بوكسشىنى جاڭا اقپاراتتىق-تەحنولوگيالىق دامۋ زامانىنىڭ جاستارى جازباي تانيدى. تاياۋدا بار جەلى بۇگىنگىنىڭ حاس باتىرى جايلى، ونىڭ ەرلىگى تۋرالى لەك-لەگىمەن جازعان. الەمدىك ارەنادا ەلىمىزدىڭ كوك تۋىن جەلبىرەتىپ، داڭقىن اسقاقتاتىپ جۇرگەن سپورتشىعا جاستار زور قوشەمەت كورسەتتى. جەڭىسىمەن قۇتتىقتادى.

ايتا كەتۋ كەرەك، قانات يسلام 1984- جىلى قىتايدىڭ التاي ايماعىندا دۇنيەگە كەلگەن. اۋەسقوي بوكسشى رەتىندە قىتاي حالىق رەسپۋبليكاسى ۇلتتىق قۇراماسى ساپىندا بەيجىڭ وليمپياداسىنىڭ قولا جۇلدەگەرى، 2006-جىلى ازيا ويىندارىنىڭ جانە 2007-جىلى چيكاگودا وتكەن الەم چەمپيوناتىنىڭ قولا جۇلدەگەرى اتانعان. قىتايدىڭ ون دۇركىن چەمپيونى.

ورتا سالماقتا ونەر كورسەتەتىن سپورتشى دۇنيەجۇزىلىك بوكس قاۋىمداستىعى WBA رەيتينگىنىڭ توپ 5-تىگىنىڭ قاتارىندا. «ات اينالىپ، قازىعىن تابار». ەر ەلگە، اتاجۇرتىنا ورالدى. شارشى الاڭدا 22 جەكپە-جەك وتكىزىپ، بارلىعىندا باسىم ءتۇستى. ونىڭ ون جەتىسىندە قارسىلاسىن نوكاۋتپەن جەڭدى. جيىن سوڭىندا قاتىسۋشىلار كاسىپقوي بوكسشىعا كوكەيلەرىندەگى سۇراقتارىن قويىپ، سپورتتىق كارەراسىنا ساتتىلىك تىلەدى. وڭتۇستىك جاستارى اتىنان داڭقتى سپورتشىعا ارناۋ ايتىپ، بار قازاقتىڭ باعىنا تۋعان بالانىڭ ءباسى بيىك بولۋىن تىلەدى.