قازاقستاندا كەلەر اپتادان باستاپ بارلىق وڭىردە توزىعى جەتكەن كولىكتەر قابىلدانادى

استانا. قازاقپارات - كەلەر اپتادان باستاپ ەلىمىزدىڭ بارلىق وڭىرىندە توزىعى جەتكەن ەسكى كولىكتەردى قابىلداۋ ءۇردىسى باستالادى.

دەمەك، كەز-كەلگەن ازاماتتىڭ قاڭتارىلىپ تۇرعان تەمىر تۇلپارىن تاپسىرىپ، ورنىنا قارجى الۋىنا مۇمكىندىك تۋادى.

بۇل تۋرالى 24.kz حابارلايدى.

اتاپ ءوتۋ كەرەك، ءتيىستى باعدارلاماعا سايكەس، سالماعى 3 جارىم توننادان اسپايتىن جەڭىل كولىكتەر عانا قابىلدانادى. جانە ۋتيليزاتسيالىق تولەم كولەمى دە بارشاعا بىردەي ەمەس. ماسەلەن، بارلىق قوسالقى بولشەكتەرى بار كولىككە - 150 مىڭ، ال ىستەن شىعىپ، كەيبىر قۇرىلعىلارى قامتىلماعان كولىككە - 48 مىڭ تەڭگەدەن بەرىلمەك.

ەلىمىز بويىنشا توزىعى جەتكەن اۆتوموبيلدەردى تولىقتاي ساتىپ الۋ ءۇشىن قىرۋار شارۋا اتقارۋ كەرەك. ازىرگە، ەنەرگەتيكا مينيسترلىگى جىل سوڭىنا دەيىن 10 مىڭ كولىكتى قابىلداۋدى جوسپارلاعان. ستاتيستيكاعا سۇيەنسەك، ەلىمىزدە اۆتوموبيلدەردىڭ 58 پايىزى ەسكىرگەن.

«تولىق جيىنتىعى جوق كولىكتەرگە 48 مىڭ تەڭگە كولەمىندە قارجى بەرىلەدى. ال بەرىلىس قورابى، قوزعالتقىشى، ەسىكتەرى، جۇك سالعىش قاقپاعىنا دەيىن قامتىلعان تەحنيكاعا 150 مىڭ تەڭگە قاراستىرىلعان. كولىگىن وتكىزۋگە نيەت بىلدىرگەندەر قابىلداۋ ورنىنا تەحنيكانى وزدەرى اكەلۋى ءتيىس. ارينە ول قوسىمشا شىعىن. ءبىز بۇل ماسەلەنى دە الداعى ۋاقىتتا تالقىلايتىن بولامىز»، - دەيدى «و ك م وپەراتورى» ج ش س باسقارۋشى ديرەكتورى رۋستام تەمىربەكوۆ.