بۇكىل قيىندىقتاردىڭ جاۋابى قايدا
«(ەي، مۇحاممەد)، يمان كەلتىرگەندەر، ىزگى ءىس ىستەگەندەر ءۇشىن تومەندە وزەندەر اعىپ جاتاتىن، توبەسىندە ميۋالار توگىلىپ تۇراتىن ءجاننات جايى بار ەكەنىن ايتىپ قۋانت. ول جەمىستەر كورەر كوزگە «ءبىز مۇنى دۇنيەدە بۇرىن دا جەپ ەدىك قوي» دەيتىندەي، ءتۇرى جاعىنان دۇنيە جەمىستەرىنە ۇقساس بولىپ كەلگەنىمەن، ءدامى جاعىنان الۋان ءتۇرلى بولادى. مۇمىندەر ءۇشىن ول جايدا ءتانى تاپ-تازا، جانى پاك جۇبايلار دا (قور قىزدارى دا) بار. ءجانناتتا ولار ماڭگى جاسايدى».
كۇنا جاسادىڭ با؟
«زۋمار» سۇرەسىنىڭ 53-اياتىن وقى: «(ەي، مۇحاممەد، مەنىڭ اتىمنان) ايت: «ەي، كۇناھار پەندەلەرىم! ءتاڭىردىڭ راقىمىنان تۇڭىلمەڭدەر. (قالاسا،) اللا، ءسوز جوق، بار كۇنانى كەشىرەدى. اللانىڭ وتە جارىلقاعىش ءارى وتە مەيىرىمدى ەكەنى داۋسىز».
تۋرا جول ىزدەيسىڭ بە؟
«مايدا» سۇرەسىنىڭ 16-اياتىن وقى: «وزىنەن ريزالىق تىلەگەندەردى اللا سول كىتاپ ارقىلى تۋرا جولعا جەتەلەيدى، ءوزى ىقپال جاساپ ولاردى قاراڭعىلىقتان جارىققا (كۇپىردەن ارىلتىپ يمانعا) شىعارادى، ءسويتىپ، تۋرا جولعا باستايدى».
دوس ىزدەيسىڭ بە؟
«باقارا» سۇرەسىنىڭ 257-اياتىن وقى: «اللا - يماندىلاردىڭ دوسى. ولاردى تۇنەكتەن جارىققا شىعارادى. كاپىردىڭ دوسى - شايتان. ول جارىقتان قاراڭعىعا قاراي تارتادى. ولاردىڭ ورنى - توزاق. وندا ولار ماڭگى قالادى».
جىنىستىق كەمسىتۋشىلىك كوردىڭ بە؟
«احزاب» سۇرەسىنىڭ 35-اياتىن وقى: «مۇسىلمان ەرلەر مەن مۇسىلمان ايەلدەرگە، ءمۇمىن ەرلەر مەن ءمۇمىن ايەلدەرگە، بويسۇنۋشى ەرلەر مەن بويسۇنۋشى ايەلدەرگە، شىنشىل ەرلەر مەن شىنشىل ايەلدەرگە، سابىرلى ەرلەر مەن سابىرلى ايەلدەرگە، قۇدايدان قورقاتىن ەرلەر مەن قۇدايدان قورقاتىن ايەلدەرگە، ساداقا بەرەتىن ەرلەر مەن ساداقا بەرەتىن ايەلدەرگە، ورازا ۇستايتىن ەرلەر مەن ورازا ۇستايتىن ايەلدەرگە، ءابۇيىرىن توكپەگەن ەرلەر مەن ايەلدەرگە، اللانى كوپ زىكىر ەتەتىن ەرلەر مەن اللانى كوپ زىكىر ەتەتىن ايەلدەرگە اللا جارىلقاۋ جانە زور ساۋاپ ازىرلەدى».
ناسىلدىك كەمسىتۋشىلىك كوردىڭ بە؟
«حۋجۋرات» سۇرەسىنىڭ 13-اياتىن وقى: «ەي، ادامزات! سەندەردى ءبىز اۋەلدە ءبىر ەركەك، ءبىر ايەلدەن، (ادام مەن حاۋادان) ءبىر اتا، ءبىر انادان جاراتىپ، (وربىتتىك). ءوزارا قارىم- قاتىناس جاساۋلارىڭ ءۇشىن كوپتەگەن ۇلت، ۇلىس ەتىپ، كوبەيتتىك. ال ەرەكشە ءدىندار بولعاندارىڭدى ءتاڭىر قۇرمەتتى ادام سانايدى (ياعني سەندەردىڭ ءبىر- بىرىڭنەن ارتىقشىلىعىڭ - نەسىبەلەرىڭمەن ەمەس، ءدىندار- تاقۋالىقتارىڭمەن ەسەپتەلەدى). انىعىندا، اللا بارلىق نارسەنى ءبىلىپ، بارىنەن حابار الىپ وتىرادى».
ماحاببات ىزدەيسىڭ بە؟
«رۋم» سۇرەسىنىڭ 21-اياتىن وقى: «سەندەردىڭ ءوز تابيعاتتارىڭا ۇيلەستىرىپ، (ءوز قاستارىڭنان) ايەل جىنىسىن جاراتقانى دا، ولارعا تىرشىلىك ءلاززاتى ەتىپ، سۇيىسپەنشىلىك، مەيىرىم بەرگەنى دە - ۇلىلىقتىڭ بەلگىسى. وي جۇگىرتىپ، عيبرات الىڭدار».
جانىڭ جايسىز بولىپ ءجۇر مە؟
«راعىد» سۇرەسىنىڭ 28-اياتىن وقى: «يمان ايتقاندارعا كەلسەك، ولاردىڭ جانى اللانى ەسكە الۋمەن جاي تابادى».
سەنى باعالاماي ما؟
«ينسان» سۇرەسىنىڭ 22-اياتىن وقى: «ءسوز جوق، بۇل سەندەرگە بەرىلگەن سىي. دەمەك، سەندەردىڭ ەڭبەكتەرىڭ ەش كەتپەيدى».
ساتسىزدىككە ۇشىرادىڭ با؟
«ءجۇسىپ» سۇرەسىنىڭ 87-اياتىن وقى: «جاراتقان جارىلقار، ءۇمىت ۇزبەڭدەر. اللانىڭ راقىمىنان تەك سەنبەۋشىلەر عانا ءۇمىت كۇتپەيدى» .
باقىتسىزدىققا تاپ بولدىڭ با؟
«يبراھيم» سۇرەسىنىڭ 34-اياتىن وقى: «سەندەرگە اللا سۇراعاندارىڭنىڭ ءبارىن بەردى. اللانىڭ ونداي يگىلىكتەرىن ساناپ تاۋىسا المايسىڭ. ال ادام دەگەن ىنساپسىز جانە تاۋبەسىز».
قيىندىقتاردان شارشادىڭ با؟
«شارح» سۇرەسىنىڭ 5-اياتىن وقى: «ارينە، ءارقالاي قيىندىققا قوسا جەڭىلدىك بار».
ادامدار جاماندىق قىلدى ما؟
«فۋرقان» سۇرەسىنىڭ 63-اياتىن وقى: «ۇلى ءتاڭىردى تايانىش ەتەتىندەر جەر بەتىندە سىپايى جۇرەدى، سوقتىققان سودىرلاردىڭ وزىنە (ناداندارعا) سولاقاي سويلەمەيدى، («اسسالاۋما عالەيكۇم» دەيدى). ءتۇن بالاسى ولار تاڭىرگە ساجدە ەتىپ، تىك تۇرىپ تىلەك تىلەيدى (ناماز وقيدى)...».
كەشىرىم قالايسىڭ با؟
«عيمران» سۇرەسىنىڭ 135-اياتىن وقى: «كۇنانى كەشىرەتىن اللادان باسقا ەشكىم جوق. وقىس ءبىر وقيات جاساپ قالسا، نەمەسە وزدەرىنە وزدەرى زيان كەلتىرسە (تاقۋالار سوندىقتان دا) اللانى ەسكە الىپ، ودان كۇنالارىن كەشىرۋدى سۇرايدى. قىلىقتارىنىڭ تەرىس ەكەنىنە كوزدەرى جەتكەن سوڭ، ونى ودان ءارى جالعاستىرمايدى».
muftyat.kz
