الماتىدا بوكس كەشىن وتكىزگەن قانات يسلام قانداي تيتۋلعا يە بولدى؟
«الماتىدا يسلام مەن اللوتەي اراسىندا وتكەن جەكپە-جەك اياسىندا تاراپ جاتقان قاۋەسەتتەرگە بايلانىستى تۇسىنىكتەمە بەرەيىن. بىردەن ايتايىن، قازاقستان كاسىپقوي بوكس فەدەراتسياسى ءوز ميسسياسىن تولىعىمەن 100 پايىزعا اتقارىپ شىقتى. ايتا كەتەيىن، 1992-جىلدان بەرى فەدەراتسيا قازاقستان اۋماعىندا جانە الەمدىك بوكس ۇيىمدارى مۇشەلەرىمەن بىرلەسە وتىرىپ بىردەن-ءبىر رۇقسات بەرۋشى، باقىلاۋشى ءارى نۇسقاۋشى ورگان.
2016-جىلى 29- قازاندا وسى جەكپە-جەكتى ۇيىمداستىرۋشى «نەلسون پروموۋشەن» كومپانياسى فەدەراتسيانى بوكسشىلار قولدانعان قولعاپتاردىڭ ساپاسىزدىعىن ياعني جارامايتىنىن ايتىپ، جالا جاپقان بولاتىن. كاسىپقوي بوكستا جەكپە-جەكتى ۇيىمداستىرۋشى پروموۋتەر بارلىق بوكسشىعا قولعاپتاردى تاۋىپ بەرۋى ءتيىس، سونىمەن قاتار قولدارى جاراقات الماۋى ءۇشىن تيتۋل ءۇشىن تالاساتىن بوكسشىلارعا ساپالى قولعاپتارىن بەرۋى ءتيىس.
ءوزىن قانات يسلامنىڭ مەنەدجەرى دەپ تانىستىرعان نۇرعازى يسماعامبەتوۆ تە فەدەراتسيانى جەكپە-جەك وتكىزىلگەننەن كەيىن كەزدەسۋ قورىتىندىسى BoxRec-تە جاريالانباعانىن ايتىپ، سول سەبەپتى WBA قانات يسلامنىڭ WBA- Fedelatin تيتۋلى ءۇشىن جۇدىرىقتاسقانىن مويىنداماعان دەپ كىنا تاققان بولاتىن. بۇل جەردە ايتا كەتۋ كەرەك، بارلىق كەزدەسۋدىڭ قورىتىندىسى BoxRec-كە جىبەرىلگەن، سول كەشتە-اق بىردەن كەش قورىتىندىلارى مەن قانات يسلام شىققان WBA- Fedelatin ۆاكانتتىق تيتۋل ءۇشىن دەپ جەكپە-جەكتە جاريالانعان. الايدا بىرنەشە كۇن وتكەننەن كەيىن، 3- قاراشادا WBA قانات يسلامنىڭ جەكپە-جەگى ەشقانداي WBA ايماقتىق تيتۋلدار ءۇشىن، سونىڭ ىشىندە Fedelatin ۇشىندە كىرمەگەنى جاريالانىپ، تيتۋلدى BoxRec-تەن الىپ تاستادى.
بۇل جەردە مىنانى ايتا كەتۋ كەرەك، قانات يسلام بۇل كەزدەسۋدە WBA- Fedelatin بەلبەۋىن قورعايدى دەگەن، الايدا «نەلسون پروموۋشەن» WBA- Fedelatin بەرگەن سانكتسيانى دۇرىس تۇسىنبەگەن سەكىلدى، سەبەبى WBA قانات يسلامعا اتاعىن ساۋىرگە دەيىن قورعاۋ كەرەك دەپ مىندەت قويعان. ءبىراق قانات يسلام التى ايدا بەلبەۋىن قورعاماعاندىقتان بۇل اتاقتان ايىرىلعان. بۇل رەتتە قاناتتىڭ كومانداسى WBA- Fedelatin فەدەراتسياسىنا ۆاكانتتىق تيتۋل ءۇشىن جۇدىرىقتاساتىنىن ايتىپ، ۇسىنىس تاستاپ، رۇقسات الۋى ءتيىس بولعان.
«نەلسون پروموۋشەن«قانات يسلام WBA- Fedelatin بەلبەۋىن قورعايدى دەپ مالىمدەمە جاساعان ۋاقىتتا، كورەرمەندەر مەن فەدەراتسيانى الداعان، سەبەبى قاناتتا سول ۋاقىتتا بۇل تيتۋل بولماعان. مۇمكىن «نەلسون پروموۋشەن» اقشا ۇنەمدەگىسى كەلىپ، WBA- Fedelatin سانكتسياسى ءۇشىن اقشا تولەمەگەن، ال WBA BoxRec-تە جاريالانعان اقپاراتتى كورىپ، ءوز نارازىلىقتارىن ءبىلدىرىپ، بۇل تيتۋلدى سايت بەتىنەن الىپ تاستاعان بولۋى مۇمكىن.
كىشى نەلسون مەن دە ۇلكەن نەلسونمەن دە قولعاپتار ماسەلەسىن ءسوز ەتكەنىمدە ولار بارلىعىن قاتىراتىنىن ايتتى. مەنىڭشە ولار قازاقستاندى دامىماي قالعان شەت ايماق دەپ ساناۋى، سوندىقتان دا نە جاساساق تا ءوتىپ كەتەدى دەپ ويلاعان. ەسكە سالايىن، قاناتتىڭ وسى جەكپە-جەگىنە IBO تيتۋلى دا قاتىستىرىلۋى ءتيىس بولعان جانە IBO فەدەراتسياسى وزدەرىنىڭ قۋانا قاتىساتىنىن مالىمدەگەن. الايدا جەكپە-جەككە ءۇش كۇن قالعان ۋاقىتتا، IBO بۇل كەزدەسۋگە قاتىسپايتىندارىن جازدى. سوعان قاراعاندا «نەلسون پروموۋشەن» بۇل جەردە دە اقشا ۇنەمدەپ، قازاقستاندىقتاردىڭ باسىن قاتىرعان بولۋى مۇمكىن.
مەن قۇرمەتتى الەۋمەتتەن بوكستى ۇيىمداستىرۋشى كوماندانىڭ قازاقستان كاسىپقوي بوكس فەدەراتسياسىنا جالعان جالا جاۋىپ وتىرعانىن اشىق ءتۇسىندىردىم دەپ ەسەپتەيمىن. قازىرگى ۋاقىتتا ءبىز تيتۋل ءۇشىن جەكپە-جەكتىڭ بۇلاي بولعانىن انىقتاۋ ءۇشىن WBA- Fedelatin فەدەراتسياسىنا رەسمي ساۋال جولدادىق، - دەدى قازاقستاندىق بەلگىلى مامان.
ەسكە سالايىق، 32 جاستاعى قانات يسلام الماتى قالاسىندا وتكەن كاسىپقوي بوكستا قارسىلاسى گانالىق پاتريك اللوتەيدى جەڭگەن بولاتىن. جەكپە-جەك تيتۋل ءۇشىن ۇيىمداستىرىلعان بولاتىن، الايدا كەزدەسۋگە قويىلعان بەلبەۋلەرگە قاتىستى داۋ-داماي تۋىندادى. سونىڭ ىشىندە WBA فەدەراتسياسى ەشقانداي دا بەلبەۋىن بۇل جەكپە-جەككە تىكپەگەنىن ايتقان. سونىمەن قاتار، يسلام وسى جەكپە-جەكتە قولدارىن جاراقاتتاپ الدى دەپ جاريالانعان.
