ەلىمىزدە تۇڭعىش رەت ەندوبەينەباقىلاۋ ارقىلى سكوليوزدى تۇزەتۋ وتاسى جاسالدى
«Universal Medical Center» كورپوراتيۆتىك قورىنىڭ فيليالى انا مەن بالا ۇلتتىق عىلىمي ورتالىعىندا 2016-جىلعى 28 قازان مەن 3- قاراشا ارالىعىندا «بالالار اراسىندا سكوليزدىق وزگەرۋدى وپەراتسيالىق ەمدەۋ كەزىندە ۆەنترالدى بەكىتۋ جۇيەسىن قولدانۋ» تاقىرىبىندا شەبەرلىك ساباعى وتكىزىلدى.
وعان ورتوپەديا سالاسىنداعى الەمنىڭ جەتەكشى ماماندارىنىڭ ءبىرى، سينگاپۋر ۇلتتىق ۋنيۆەرسيتەتىنىڭ ورتوپەديا جانە رەكونسترۋكتيۆتىك ميكروحيرۋرگيا بولىمشەسىنىڭ مەڭگەرۋشىسى، پروفەسسور ۆونگ حە كيت قاتىستى.
شارا اياسىندا سكوليوزدان ومىرتقاسى قيسايعان 3 بالاعا تۇزەتۋ وپەراتسيالارى جاسالدى. بۇل وتالاردىڭ ءبىرى پوستكەڭەستىك كەڭىستىكتە العاش رەت وتكىزىلدى. كىشى ينۆازيۆتىك وتاعا جاتاتىن بۇل ەمدەۋ شاراسى ەندوبەينەباقىلاۋ ارقىلى وتكىزىلدى.
وپەراتسيا «انتەريور جۇيەسى» مەتالل ەندوكوررەكتور ورناتۋ ارقىلى ومىرتقانىڭ كەۋدە ءبولىمىنىڭ يديوپاتيالىق سكوليوزىن ۆەنترالدى تۇزەتۋ» دەپ اتالادى. مۇنداي وتا كەزىندە اينالاسىنداعى ساۋ تىندەرگە زاقىم كەلمەيدى جانە ول ناۋقاسقا اۋرۋحانادان تەز شىعۋعا جانە وڭالتۋ شاراسىنان وڭاي وتۋگە مۇمكىندىك بەرەدى.
اتالعان وپەراتسيا ۇيرەتۋ رەجىمىندە وتكىزىلىپ، 13 جاسار نۇراي ەسىمدى قىزعا جوعارى دەڭگەيگە ءساتتى جاسالدى. بۇگىنگى تاڭدا ناۋقاستىڭ جاعدايى قاناعاتتانارلىق جانە جاقىن كۇندەرى ۇيىنە شىعارىلادى. اتالعان وزىق ءادىستى جاقىن ۋاقىتتا انا مەن بالا ۇلتتىق عىلىمي ورتالىعىندا كلينيكالىق تاجىريبەگە ەنگىزۋ جوسپارلانىپ وتىر. سونداي-اق، شەبەرلىك ساباعى بارىسىندا وتاندىق دارىگەرلەر ءۇشىن ءبىرقاتار دارىستەر وقىلدى.
