بارسەلونادا «قازاق ەلى» مۋلت فيلمى كورسەتىلەدى
بۇل تۋرالى قازاقپارات «قازاق فيلم» كينوستۋدياسىنىڭ باسپا ءسوز قىزمەتىنە سىلتەمە جاساپ حابارلادى.
انيماتسيالىق كينوتۋىندىنىڭ حالىقارالىق كينوفەستيۆالدەردە كورسەتىلىپ، كەڭىنەن ناسيحاتتالۋ جۇمىستارىن ش. ايمانوۆ اتىنداعى «قازاق فيلم» ا ق جۇزەگە اسىرادى. ق ر مادەنيەت جانە سپورت مينيسترلىگى تاپسىرىسى بويىنشا «ساق- دالا» ج ش س تۇسىرگەن «قازاق ەلى» انيماتسيالىق فيلمى بولاشاق حاندار - جانىبەك پەن كەرەيدىڭ بالالىق شاعى مەن ەسەيۋ جىلدارى تۋرالى باياندايدى. مۋلت فيلمدە شەتسىز- شەكسىز قازاق دالاسى، زاڭعار تاۋلار جانە ۇلى جىبەك جولىنداعى سىعاناق، وتىرار، تاراز جانە تۇركىستان سەكىلدى ەجەلگى قالالار بەينەلەنگەن.
«فيلم حالىقارالىق ارەنادا - سوناۋ يسپانيادا كورسەتىلەتىنىنە قۋانىشتىمىن. بۇل مۋلت فيلمدى ءبىز ەڭ بىرىنشىدەن بالالارعا ارناپ جاسادىق. كارتينادا بوستاندىق پەن تاۋەلسىزدىك ءۇشىن كۇرەس جولىندا قازاق ەلىنىڭ باسىن قالاي بىرىكتىرگەندىگى جايلى اڭگىمەلەنەدى. سوندىقتان يسپاندىق كورەرمەندەر دە ەلىمىزدىڭ باي تاريحىمەن تانىساتىن بولادى»، - دەدى فيلمنىڭ رەجيسسەرى باتىرحان داۋرەنبەكوۆ. اتالمىش فەستيۆالدە 20 ازيا ەلدەرىنىڭ 80 گە جۋىق فيلمدەرى كورسەتىلەدى.
وتاندىق تۋىندىدان باسقا فەستيۆالگە قىتاي، كورەي، يران، فيليپپين، سينگاپۋر، اۋعانىستان، جاڭا زەلانديا، تايلاند، مالايزيا جانە ۆەتنام ەلدەرىنىڭ فيلمدەرى قاتىسادى. ايتا كەتەتىن جايت، فەستيۆال شەڭبەرىندە ش. ايمانوۆ اتىنداعى «قازاق فيلم» ا ق جارىققا شىعارعان ساتىبالدى نارىمبەتوۆتىڭ «امانات» جانە دوسحان جولجاقسىنوۆتىڭ «قۇنانباي» تاريحي تۋىندىلارى، سونىمەن قاتار اسقار ۇزابايەۆتىڭ «جول» دراماسى مەن مۇرات ماحاننىڭ دەبيۋتتىك «سوت ورىنداۋشىسى» فيلمى كورسەتىلەدى.
ەستەرىڭىزگە سالا كەتسەك، جاسالۋىندا -D2 جانە D3- تەحنولوگيالار پايدالانىلعان «قازاق ەلى» انيماتسيالىق فيلمى ۇستىمىزدەگى جىلى مامىر ايىندا كوپشىلىك نازارىنا ۇسىنىلىپ، كينوتەاترلاردان كورسەتىلگەن بولاتىن. فيلمنىڭ جارىققا شىعۋىنا اتسالىسقاندار قاتارىندا ق ر مادەنيەت جانە سپورت ءمينيسترى ارىستانبەك مۇحامەدي ۇلى، تاريح عىلىمدارىنىڭ دوكتورى جامبىل ارتىقباي جانە بەلگىلى جازۋشى دۋلات يسابەكوۆ تە بار. باس كەيىپكەرلەردى ع. مۇسىرەپوۆ اتىنداعى قازاق مەملەكەتتىك اكادەميالىق بالالار جانە جاسوسپىرىمدەر تەاترىنىڭ، سونداي- اق، ج. شانين اتىنداعى وڭتۇستىك- قازاقستان وبلىستىق قازاق دراما تەاترىنىڭ ارتىستەرى دىبىستادى. فيلمنىڭ ساۋندترەكتەرىن نۇرلان ابدۋللين، ساكەن مايعازيەۆ جانە باسقا دا تانىمال قازاقستاندىق انشىلەر ورىندادى.
