تۇڭعىشباي جامانقۇلوۆ بيۋدجەت قاراجاتىن جىمقىرعانىن مويىندادى

استانا. قازاقپارات - تۇڭعىشباي جامانقۇلوۆ بيۋدجەت قاراجاتىن جىمقىرعانىن مويىندادى، دەپ حابارلايدى ۇلتتىق سىبايلاس جەمقورلىققا قارسى ءىس-ارەكەت بيۋروسى.

«جاقىندا ۇستالعان ت. جامانقۇلوۆ ءوزىنىڭ قورعاۋشىسىنىڭ قاتىسۋىمەن «فەنيكس» فيلمىنىڭ تۇسىرىلىمىنە بولىنگەن بيۋدجەتتىك قاراجاتتى جىمقىرعانىن تولىق مويىندادى جانە ءوز ايىبىنا وكىنىپ، كەلتىرگەن شىعىندى وتەۋدى موينىنا الدى.

ت. جامانقۇلوۆ قارجىنى قولما-قول اقشاعا اينالدىرعانىن راستادى جانە بيۋدجەتتىك قارجاتتى جەكە قاجەتتىلىكتەرىنە جۇمساعانىن مالىمدەدى. سونداي-اق ول ق ر ق ك 65-بابىنا سايكەس، كەپىل تولەۋ ارقىلى شىنايى وكىنۋىنە بايلانىستى قىلمىستىق جاۋاپتىلىقتان بوساتۋ شاراسىن قولدانۋ تۋرالى ءوتىنىش جازدى.

3- قاراشادا ت. جامانقۇلوۆ شىعىندى ءىشىن-ارا وتەدى جانە ونىڭ قوعامداعى ورنى، جاسى جانە كەپىلزات تولەگەنى نازارعا الىنىپ، جامانقۇلوۆقا قاتىستى «كەپىل» شاراسى قولدانىلدى. شىنايى وكىنۋىنە بايلانىستى قىلمىستىق جاۋاپتىلىقتان بوساتۋ تۋرالى ءوتىنىش ت. جامانقۇلوۆ، ن. يۋدينا جانە گ. ىسقاقوۆا كەلتىرىلگەن شىعىندى تولىق وتەگەن سوڭ قارالادى»، - دەپ جازىلعان حابارلامادا.

ەسكە سالا كەتەيىك، 2- قاراشادا اتالعان قارجىنى جىمقىردى دەگەن كۇدىكپەن تۇڭعىشباي جامانقۇلوۆ ۇستالعان بولاتىن.