توقتاردىڭ اناسى: بەيبىتتى ايەلدىككە الماسا ۇلىما رەنجيتىن ەدىم
ءانشى دە وزىنە تۋعان قىزىنداي قاراعان ەنەسىنە ءدان ريزا. بۇل تۋرالى استانا ارناسىنىڭ «انالار» جوباسىندا ايتىلدى، - دەپ جازادى stan.kz.
« ءبىر كونسەرتكە الىپ بارىپ، بالانى كورسەتتى. ۇناتتىق. ەگەر الماي كەتسەڭ، توقتار مەن ساعان ريزا ەمەسپىن دەدىم. نەگە ەكەنىن سۇرادى. سەنىڭ دە ءتورت اپايىڭ بار، ول دا بىرەۋدىڭ الپەشتەپ وتىرعان قىزى. جىلاتىپ كەتسەڭ، اكە- شەشەسى وڭباعان ەكەن دەپ ايتادى عوي. ءوزىڭ سۇيسەڭ، وسى بالانى ال دەدىم» ، - دەيدى كەلىنىن ءبىر كورگەننەن ۇناتقان توقتاردىڭ اناسى.
ال بەيبىت كەلىن بولىپ تۇسكەن كەزدە ەنەسىنىڭ باسىنا ورامال جاپپاعانىن ايتتى. سەبەبى مارۋسيا اپاي بەيبىتتى ءوز قىزىنداي كورەدى ەكەن.
«ول كىسىنى العاش كورگەن كەزىمدە ءبىز توقتار ەكەۋمىز ونەردەگى دوس بولاتىنبىز. كوپ بالانى دۇنيەگە اكەلگەن كەرەمەت كىسى بولىپ كورىندى. كەلىن بولىپ تۇسكەن كەزدە ماعان ورامال جاپقان جوق. «سەن كەلىن ەمەسسىڭ، وسى ءۇيدىڭ قىزىسىڭ» دەدى. سوندا دا ۇيالىپ ءوزىم تاعىپ الاتىنمىن. ءوزىنىڭ قىزىنداي كورەدى. دەگەنمەن كەلىننىڭ اتى كەلىن عوي. مۇمكىن باسقا كەلىندەرىنە قاتال شىعار. ءدال ماعان كەلگەندە انامىز جۇمساق. مەنىڭ قاس- قاباعىما قاراپ، كوڭىلىمە تيەتىن ءسوز ايتۋعا باتا المايتىن سياقتى. ءوزىم شەلەگىمدى الىپ جۇگىرگەم سيىر ساۋۋعا. 1-2 رەت قانا رۇقسات بەردى، ودان كەيىن رۇقسات بەرمەي قويدى»، - دەيدى بەيبىت سەيدۋاليەۆا.
ەنەسى ءانشى كەلىنىنىڭ بويىندا ناعىز قازاق قىزىنا ءتان ۇياڭدىق، يبالىلىق، يناباتتىلىق سىندى قاسيەتتەردىڭ بارىن ايتتى.
«بەيبىت دەگەن وتە ۇياتى كۇشتى بالا. قالاي تاربيەلەگەن. «وسىندا كەلسەك، داستارحانىن جايىپ وتىرادى. ءان ايتامىن، ساحنادا جۇرەمىن دەمەيدى ءيا؟ كۇيەۋىنە قاراپ وتقا دا كىرىپ كەتەدى، سۋعا دا ءتۇسىپ كەتەدى» دەپ ءبارى ريزا بوپ جاتادى. مەن وسى ارادا وتىرىپ ماقتانسام ەرتەڭ ەل ايتادى. ءبارى سوعان كۋا. وعان مەن ريزامىن»، - دەيدى توقتاردىڭ اناسى.
ال بەيبىتتىڭ ءوز اناسى كەزىندە ءانشى بولۋدى ارمانداپتى. 54 جاسىندا جۇرەك اۋرۋىنان كوز جۇمعان اناسىن ەسكە العان بەيبىت كوزىنە جاس الدى.
«وتە كەرەمەت كىسى بولاتىن. ءان دەسە، ونەر دەسە ىشكەن اسىن جەرگە قوياتىن. وتە سىنشىل، ونەرگە سىن كوزبەن قارايتىن. اكەمە تۇرمىسقا شىقپاي تۇرعاندا ءوزى ماماندىعى فارماتسيەۆت، دايىندىقسىز بارىپ بايقاۋلاردان ءبىرىنشى ورىن الىپ كەلەدى ەكەن. جاس كەزىندە ولەڭ دە جازعان. الايدا داپتەرىن جوعالتىپ الدىم. جاس كۇنىندە كونسەرۆاتورياعا وقۋعا تۇسكىسى كەلگەن كەزدە اناسى جىبەرمەپتى. ول كىسىنىڭ جەتپەگەن ارمانىنا مەن جەتىپ وتىرمىن. انام مەن اكەم ماڭگىلىك جۇرەدى دەپ ويلايسىڭ، ءبىراق ونى ءبىز شەشپەيمىز، ءبارى دە اللانىڭ قولىندا. ۋاقىتتى ەشكىم توقتاتا المايدى، وكىنىشكە قاراي. كوزى ءتىرى كەزىندە كۇندەلىكتى زۆونداپ، «توقتاردىڭ شايىن، تاماعىن بەردىڭ بە؟ جىلى قاباقپەن قارسى ال، ەسىكتەن قارسى ال، دۇرىستاپ شىعارىپ سال، قاباعىڭدى شىتپا، شىرت- پىرت مىنەزىڭدى قوي» دەپ ايتىپ وتىراتىن. ومىرىمە جەتەتىندەي ءتالىم- تاربيە الدىم دەپ ويلايمىن»، - دەپ ەسكە الدى اناسىن ءانشى.
بۇل ورايدا بەيبىت كەز كەلگەن ۋاقىتتا اناسىن مەيىرلەنە قۇشاقتاي الاتىن توقتارعا قىزىعا قارايتىنىن ايتتى:
«كەيدە توقتار اناسىن قۇشاقتاپ، ءسۇيىپ، ومىراۋىنا قولىن سالىپ جىبەرىپ وتىرادى. سوندا قىزىعىپ كەتەمىن، جۇرەگىم دە اۋىرىپ كەتەدى. اناسى بار ادامدار ەشقاشان قارتايمايدى، باقىتتى» .
توقتار دا اناسىنىڭ ماڭگىلىك جانىندا بولمايتىنىن تۇسىنەدى، سول سەبەپتى ونى اسا جوعارى باعالايدى.
«شەشەمنىڭ جىلدان جىلعا قارتايىپ بارا جاتقانى جانىما باتادى. بۇل كىسىلەردەن ۇزاعىمىز كەلمەيدى. سوندىقتان اللادان كوپ سۇرايمىن وسى كىسىلەردىڭ باقىتتى بولعانىن، كۇلىپ جۇرگەنىن. «دۇنيەدەگى ءتورت قۇبىلاڭ تۇگەل بولسىن» دەگەن ءسوز بار قازاقتا. دۇنيەدەگى ءتورت قۇبىلانىڭ ءبىرىنشىسى - سول اكە مەن شەشە. كىشكەنتاي كەزىمدە وزىمە سەرت قويعانمىن. وسى كىسىلەردىڭ ءتىرى كەزىندە كوپ نارسەنى كورسەتۋىم كەرەكپىن دەپ. ەندى جاسىراتىنى جوق، ۇلگەرمەگەنىم بار، ۇلگەرگەنىم بار. ۇلگەرمەي قالعانىم، اكەم ەگىزدەرىمىز دۇنيەگە كەلمەي تۇرعاندا اناممەن سىرلاسادى ەكەن. سوندا «نەمەرەم جالعىز قالاتىن بولدى، ارتىنان ءىنى- قارىنداستارى ەرسە جاقسى بولار ەدى» دەپ ايتادى ەكەن.
