ءبىزدىڭ اۋىلدى ميستيكا كەزىپ جۇرەتىن - قويشىبەك مۇباراك، ميستيك جازۋشى
- تاۋەلسىزدىكتىڭ 25 جىلى كوز الدىڭىزدا. اتاجۇرتقا كەلۋ سىزگە العاش قانداي سەزىم سىيلادى (جازۋشى رەتىندە)؟
- اتاجۇرتقا، تاۋەلسىز قازاقستانعا ورالۋ شەت ەلدەگى كەز كەلگەن قازاقتىڭ باستى ارمانى. انىعىندا مەن كەشەگى قازاق دالاسىنىڭ ءبىر پۇشپاعىندا دۇنيەگە كەلدىم. XVII عاسىردا باستالعان جوڭعار شاپقىنشىلىعى كەزىندە التايدى تاستاپ سىر بويىنا دەيىن اۋعان بابالارىمىز XVIII عاسىردىڭ سوڭىندا ەجەلگى جۇرتىنا قايتا ورالعان ەكەن. بىردە جوڭعار، بىردە قازاق جايلاعان سول بايتاق مەكەن بۇگىن قىتايدىڭ شەگارا سىزىعىنىڭ ىشىندە قالدى. مەنەن باستاپ ساناعاندا ون ءۇشىنشى اتامنىڭ باسى سول التايدىڭ اقباس شىڭىنىڭ باۋرىندا جاتىر... قاراشاڭىراق، اقتىلى ورداما، ەگەمەندى ەلىمە بايىرعى اتاقونىسىمدى قيماي- قيماي ءبىر ۋىس توپىراعىن تۇمار ەتىپ مەن دە جەتتىم.
اتا مەكەنگە كەلگەلى باسپا سالاسىن جاعالاپ كەلەمىن. اناۋ ايتاتىنداي اتاقتى بولماسام دا وزىندىك قولتاڭبام بار ديزاينەرمىن. ءوزىم ەڭبەك ەتكەن ءبىرسىپىرا باسپالارمەن قاتار ۇلت رۋحانياتىنىڭ وسۋىنە ۇلەس قوسىپ كەلە جاتقان «ەر جانىبەك» حالىقارىلىق قوعامدىق قورى شىعارعان كىتاپتاردىڭ ديزاينى مەنىڭ قولىمنان شىقتى. وسى ونەردى قازاق بالاسىنا ۇيرەتسەم دەگەن ويمەن سوڭعى 8 جىلدا ءال- فارابي اتىنداعى قازۇۋ- ءدىڭ جۋرناليستيكا فاكۋلتەتى، «باسپا ءىسى جانە ديزاين» كافەدراسىندا ساباق بەرىپ كەلەمىن. ۇلتتىق قۇندىلىقتى ارتتىرۋ ءۇشىن ۇلتتىڭ ءار دۇنيەسىنىڭ مازمۇنىمەن قوسا سىرتقى بەينەسىنىڭ دە وزىندىك ايرىقشا بەلگىسى بولۋ كەرەك. قازاق باسپاسىنان شىققان كەز كەلگەن ءونىم ءبىر قاراعاننان قازاقى بوياۋمەن كوز تارتۋى ءتيىس. سول ءۇشىن دە ۇلتتىق ديزايندى قالىپتاستىرۋ كەرەك ەكەندىگى بارىمىزگە ايان. وسى ارماننىڭ جەتەگىندە كەلەشەك ۇرپاققا باسپا سالاسىنداعى ۇلتتىق ديزايننىڭ ۇلگىسىن قالىپتاستىرسام دەيمىن.
- نە جازام دەپ ويلادىڭىز كەلە سالا. قازىر ءسىز قالام تارتىپ جۇرگەن ميستيكا جانرىنىڭ قاينار كوزى نە بولدى ءسىز ءۇشىن؟
- مەنىڭ تۋىپ وسكەن جەرىم قىتايدىڭ التاي ايماعىنا قاراستى شىڭگىل اۋدانىنىڭ اعاشوبا دەگەن اۋىلى. شىڭگىل، شاعانعول، بۇلعىن دەگەن ءۇش ۇلكەن وزەننىڭ قۇيعان تۇسى. بۇل ءوڭىردىڭ تابيعاتى دا، تابيعاتىنا ساي ادامدارى دا وزگەشە. قادىم زامانعى قاندى تاريحتىڭ تاڭباسى ءار تاسىنىڭ بەتىنە بادىزدەلگەن سىرلى دا سىيقىرلى جەر ەدى.
بالا كەزىمىزدە ءبىزدىڭ اۋىلدى ميستيكا كەزىپ جۇرەتىن. قايتىس بولىپ جەرلەگەلى جاتقاندا قايتا تىرىلگەن، تىرىلگەندە دە كەشەگى جاي اۋىل ادامى ەمەس عالامنىڭ ءتىلىن ءبىلىپ، ادامنىڭ پەشەنەسىندەگى جازۋدى دا وقي الاتىن، ەكى دۇنيەنىڭ اراسىنا ەركىن جۇرەتىن ايرىقشا قاسيەتتى باقسىلار بولىپ ورالاتىن. سونداي- اق جىلاننىڭ دا ءتىلىن بىلەتىن اپالار، پەرىمەن سويلەسەتىن اتالار، جىنى بۋعاندا كوز ۇشىنداعى مارالتىنىڭ (جەر اتى) باسىنا ءسۇت پىسىرىمدە شىعىپ قاجەتىن تاۋىپ كەلەتىن جەلگە مىنگەندەر، ادامدارى عانا ەمەس يەسىنە تونگەن قاۋىپتى سەزدىرەتىن جىلقى، قوراعا جاقىنداعان سايتاندى ءسۇزىپ قۋاتىن ەشكى، يەسىنىڭ قابىرىنە بارىپ كۇندە زيارات ەتىپ وتىراتىن ءيت، بولماسا قازىر عانا بالاعىڭدى ءتۇرىپ جالاڭ اياق ءوتىپ كەتكەن وتكەل، ارتىڭا قاراساڭ ات سالساڭ اعىزاتىن اساۋ وزەنگە اينالىپ كەتەتىنى، ەكى اۋىلدىڭ اراسىندا كوشىپ جۇرەتىن قۇم توبەلەرى، كەشە عانا ات ارقانداعان قازىعىڭ ەرتەسىندە الىپ اعاش بولىپ كوكتەپ تۇراتىندىعى. سوم تەمىردى دەمىمەن ۇرلەپ بالقىتا الاتىن ۇستالار... قويشى ايتەۋىر، اۋىلدىڭ بار بولمىسى سىرلى بولاتىن.
مىنە وسىنىڭ ءبارى- ءبارى تۇنىپ تۇرعان ميستيكا. كەز- كەلگەنىمەن سويلەسسەڭ ادامنىڭ اقىلى بويلامايتىن ءبىر تىلسىمنىڭ سىرىن اشىپ بەرە- تۇعىن. تەحنوگراتتىق زاماندا ءومىر سۇرسەك تە وسى اڭىزعا بەرگىسىز اۋىل اڭگىمەلەرى سانامىزعا ءسىڭدى، بۇگىندە جاسىم قىرىققا كەلگەنىمەن، مەن سول بالا كەزدەگى تىلسىمدارعا ءالى دە سەنەمىن. قازاقتىڭ كەز- كەلگەن ىرىم- تىيىمىنىڭ، سالت- ءداستۇرىنىڭ، قاراپايىم تۇرمىس تىرشىلىگىنىڭ استارىنان ارشىپ الىنعان ميف ەشبىر دالەلسىز- اق ءبىزدىڭ اۋىلدا اڭقىپ تۇرار ەدى. وسىنىڭ ءبارى مەنى ادەبيەتكە ميستيكا دەگەن جانرمەن كەلۋىمە تۇرتكى بولدى.
مەنىڭ تۋىپ وسكەن اۋىلىمدا ءدوڭتى دەگەن جەر بار- تىن. ناعاشىلارىم سوندا تۇراتىن. ءدوڭتى مەنىڭ كوز الدىما گارسيا ماركەستىك ماكوندوسىن ەلەستەتەتىن. ماكوندونىڭ ءار تۇرعىنى دوڭتىدە جۇرگەندەي اسەر بەرەتىن. الاتاستى قۇلداپ (جەر اتى) سىعاندار اسىل اينەكتەرى مەن تىلسىم حيكمەتتەرىن الىپ كەلە جاتقانداي سەزىلەتىن. اناۋ تۇرعان شولاق تەرەكتىڭ تۇبىندە ماليكادەس پەن اڭگىمە قۇرىپ وتىرعان ساياتشى شال، حوسە اركاديو مەن بىرگە قانجارىن قايراپ وتىرعان ەڭگەزەردەي ەر ادام، ۋرسۋلامەن بىرگە نەمەرەلەرىن قۋالاپ جۇرگەن كەمپىرلەر دە كوز الدىمدا.
بالا كەزىمدە تىلىمەن قىپ- قىزىل كۇرەكتى بىج- بىج ەتكىزىپ جالاعان باقسىنى، جوعالعان جوعىڭدى تۋرا ءوز قولىمەن ماتاعانداي ايتىپ بەرەتىن قۇمالاقشىنى، بولماسا، جاۋىرىنعا قاراپ وتىرىپ، ءبىر ايدىڭ ىشىندە ۇيىڭە كەلەتىن قوناقتاردى قاي كۇنى قانداي كولىكپەن، قانداي كيىم كيىپ كەلەتىنىنە دەيىن تاپ باسىپ ايتىپ بەرەتىن جاۋىرىنشىنى ءوز كوزىممەن كوردىم. شاپقان اتقا جەتكىزبەيتىن جىندى دا ءبىزدىڭ اۋىلدا بولدى. سول ەل قورقاتىن جىندالاردىڭ ءوزىنىڭ وزگەشە ءبىر قاسيەتتەرى بار بولاتىن. بىرەۋى شيە بولىپ شىرمالىپ قالعان ارقاننىڭ تۇيىنشەگىن ءاپ- ساتتە تارقاتا سالسا، ەندى بىرەۋى بۋىرقانىپ جاتقان اساۋ وزەنگە جول باستاپ ءتۇسىپ كەتسە ارقىراپ جاتقان وزەننەن وتكەل اشىلاتىن. مىنە وسىنىڭ ءبارى مەنىڭ سانا- سەزىمىمە بالا كەزىمنەن ابدەن ورنىعىپ قالدى.
ءوزىم كورىپ وسكەن اۋىل تۇرمىسى مەنىڭ شىعارمالارىما وزەك بولدى. ورتالاۋ مەكتەپتە وزىمە ساباق بەرگەن مۇعالىمىم جولاۋشى ءجۇرىپ بارا جاتىپ جولدان ءبىر تۇيىنشەك تاۋىپ العان ەكەن، سودان جول بويى سايتاننىڭ كەساپتىنان ۇشىنىپ اۋىرىپ كورشى اۋىلعا ازەر جەتە قۇلاپتى. سودان ۇزاق ۋاقىت قينالىپ قاتتى اۋىردى، بۇگىنگى مەديتسينا كومەكتەسە الماعان سول كىسىنىڭ جانىن اۋىلدىڭ باقسى- بالگەرلەرى الىپ قالىپ ەدى. سول دەتال «ايدىڭ سوڭعى سارسەنبىسى» اتتى شىعارمامدا قولدانىلدى. سوسىن جاقىن ءبىر قۇداشامىز بار ەدى، جاڭادان ۇيلەنگەن. سول كىسىنىڭ جاڭا كيىمدەرى وزدىگىنەن تۋرالىپ قالادى ەكەن. ول تۋرالى اۋىلدىڭ اڭگىمەسى تۇنىپ تۇرعان ميستيكا بولاتىن. وسى حيكايا «اقكويلەكتى قىز» اتتى شىعارمامدا ايتىلدى. 1940 -جىلداردىڭ باس كەزىندەگى اۋمالى- توكپەلى جاۋگەرشىلىك زامانىندا ۇساق بالاسى كوپ شاعىن ءبىر اۋىل تاۋدىڭ قۋىسىندا قالىپ قويىپتى دا، وزگە جۇرت ەرەنقابىرعاعا قاراي اۋىپتى. اراعا ءتورت- بەس جىل سالىپ قايتا ورالعان ەل الگى شاعىن اۋىلدان ەكى كەمپىردى عانا كورىپتى. كەشەگى كوپ بالادان بىرەۋى دە جوق، ال انا ەكى كەمپىر ادامدى كورسە كوزى شىراداي جانىپ اتىلعالى تۇر دەيدى. بالالاردىڭ ءبارىن ەكى كەمپىردىڭ جەپ قويعانىن بىلگەن جۇرت ەكەۋىن دە اتىپ تاستاپتى.
«سول جەردە ادام جەگىش ەكى كەمپىردىڭ ارۋاعى ءالى ءجۇر» دەي- تۇعىن. وسى ءبىر اڭىز ماعان «قۇبىجىق»، «اۋشى» اتتى شاعارمالاردى جازۋىما سەبەپ بولسا، سۇلەيمەننىڭ قاھارىنان قورقىپ اسپانعا كوتەرىلىپ كەتكەن جەتپىس ەكى مىڭ پەرى تۋرالى اڭىز مەنىڭ «ايعان» اتتى شىعارمالارىما وي تۇرتكى بولدى. «كۇمىستىنىڭ قۇيعانى (ەرتەدە اسپاننان مەتوريد اعىپ ءتۇسىپ سودان باستاپ «كۇمىستىنىڭ قۇيعانى» اتالعان جەر) سول اسپانعا ۇشىپ كەتكەن پەرىلەرگە اپاراتىن جول» - دەپ ايتىلاتىن. ءۇش وزەندى مەكەندەگەن سۋ پەرىسى تۋرالى ەستىگەن اڭىزدارىم «ەسكەكسىز قايقتى» جازدىردى. سۋ پەرىسىن كۇتىپ شاعانعولدىڭ جاعاسىندا جازدىڭ ۇزاق تاڭىن اڭساۋمەن وتكىزگەن كەزدەرىم كۇنى بۇگىنگە دەيىن كوز الدىمدا. سول سياقتى بارلىق شىعارماشىلىعىما ءوز اۋىلىمنىڭ ميستيكاسى سىڭگەن. ءار كەيىپكەرىمنىڭ ومىردە دە ءوز ءپروتوتيۆى بار. ءبارى دە قاراپايىم اۋىل ادامدارى. ايرماشىلىعى تەك ءوز تىلسىمىمىزعا ءوزىمىزدىڭ ولەردەي سەنەتىندىگىمىزدە.
جالپى ميستيكالىق باعىتتا شىعارما جازۋ ءۇشىن ميفكە بايلانا وتىرىپ تەك سانانىڭ تۇكپىرىندەگى تۇيسىككە سۇيەنۋىڭ كەرەك. ادامنىڭ اقىل- ويىنىڭ ەڭ بيىگىن تەك تۇيسىك ارقىلى عانا تابا الاسىڭ. كۇنى بۇگىنگە دەيىن الەم حالىقتارىنىڭ اڭىز ەرتەگىلەرىن ءسۇيىپ وقيمىن (ارينە قولىم جەتكەنىنشە). بىزدە «اڭىز- ەرتەگى تەك بالالار ءۇشىن عانا كەرەك» - دەگەن جاڭساق ۇعىم قالىپتاسقان. كەز- كەلگەن اڭىز- ەرتەگى ادامنىڭ جاسىنىڭ وسۋىنە قاراي جاڭا وي سالىپ وتىرادى.
قازاقتىڭ كوشپەلى ومىرىمەن بىرگە ۇمىت بولىپ، ەل ەسىنەن كوتەرىلىپ بارا جاتقان ءداستۇرلى دۇنيەلەردى قايتا جاڭعىرتىپ وقىرماننىڭ ساناسىنا سالسام، قازاقى ميستيكانى قازاق پروزاسىندا قايتا جاڭعىرتسام دەگەن وي العاش قالام ۇستاعانداعى ارمانىم ەدى.
- اۋدارما سالاسى تۋرالى ايتاساڭىز...
- قازاق ادەبيەتىندە اۋدارما ءىسى كەنجە قالىپ بارا جاتقان سياقتى. شەتەل ادەبيەتىنىڭ بىزگە اۋدارىلىپ جەتۋى جانە قازاق ادەبيەتىن شەت ەل وقىرماندارىنا اۋدارىپ جەتكىزۋ مۇلدەم جوق دەپ كوز جۇمباساق تا، اۋىز تولتىرىپ ايتاتىنداي وركەندەپ تۇرعانى شامالى. وسىدان ءبىراز جىل بۇرىن «اۋدارما» باسپاسىنان «الەم ادەبيەتىنىڭ 100 تومدىعى» دەگەن اتپەن، شەتەل اقىن- جازۋشىلارىنىڭ كىتاپتارىن شىعارۋ قولعا الىنىپ ەدى. ءوز باسىم سونىڭ 68 تومىن عانا كوردىم، ارى قاراي شىقپادى ما، الدە شىقسا دا، مەنىڭ قولىما جەتپەدى مە بىلمەدىم. سوسىن «پوليانت» باسپاسىنىڭ جانىنان اشىلعان كەڭەس يۋسۋپوۆ اعامىز باسقارعان «الەم ادەبيەتى» دەگەن تاماشا جۋرنال بار ەدى. (كەيىن بۇنى دۋمان رامازان اعامىز باسقاردى) وسى باسىلىم ارقىلى ءبىراز الەمدىك اقىن- جازۋشىلاردى تانىپ قالىپ ەدىك. سوڭعى كەزدەرى ودان دا كوز جازىپ قالدىق. اينالىپ كەلگەندە وسىنىڭ بارلىعىنا مەملەكەت تىكەلەي يەدەرشىلىك ەتۋ كەرەك ەدى. مەملەكەت تارابىنان ارنايى اۋدارما اگەنتتىگى مە الدە سول سياقتى ءبىر ۇجىم قۇرىلۋ ءتيىس. سوسىن بۇگىنگى قازاق بالاسىنا كەرەك ادەبيەت قازاقشاعا اۋدارىلىپ، قازاقتى الەمگە تانىتاتىن اقىن- جازۋشىلاردىڭ وزىق شىعارمالارى الەم تىلدەرىنە اۋدارىلۋى كەرەك. قازىرگە بۇل تەك بولاشاقتىڭ ەنشىسىندە.
- قازاق جازۋشىسىنا الەمگە تانىلۋدىڭ جولدارى قانداي؟ نوبەل سىيلىعى تۋرالى ويىڭىز؟
- بىزدە الەمدىك دەڭگەيدە جازىلعان شىعارمالار جەتەرلىك. سولاي بولا تۇرا «قالايشا الەمدىك ورەگە كوتەرىلە المايمىز؟» دەگەن سۇراقتىڭ تۋۋى زاڭدى. مەنىڭشە بۇل اراداعى تۇيتكىل جازۋشىعا ەمەس ۇلتتىڭ قۋاتتىلىعىنا بايلانىستى. ۇلتتىڭ الەمدەگى ورنى قانشا بيىك بولسا، ادەبيەتى دە سونشالىقتى باعالانادى. نوبەل سىيلىعىن العان شىعارمالاردىڭ ءبىرازىن وقىدىق. ارعىسىن ايتپاعان دا سولاردىڭ كوبىسى مۇحتار ماعاۋين، ءابىش كەكىلبايەۆ، ت. ابدىك، تىنىمباي نۇرماعامبەتتەن اسىرىپ جازىپ جۇرگەندەرى جوق. سول سىيلىقتى يەلەنگەندەردىڭ ءبىرازىنان وسى اعالارىمىزدىڭ ءباسى باسىم، قاي- قايسىسى دا سول بيىكتە تۇرىپ الەم الدىنا ءسوز ايتۋعا قاۋقارى ابدەن جەتەدى. ءتىپتى كەيدە ورتانقول جازۋشىلار دا نوبەلدىڭ ساحناسىندا قاسقايىپ تۇرادى. نەگە؟ ويتكەنى ونىڭ جازعانىنان گورى ارتىندا تۇرعان ەلى قۋاتتى، ۇلتى مىقتى. ءبىزدىڭ ەگەمەندىك العانىمىزعا شيرەك عاسىر عانا بولدى. الداعى ۋاقىتتا مەملەكەت قۋاتتانىپ، ۇلت وزىقتانسا ءبىزدىڭ دە جازۋشىلار الەمدىك دارەجەدە باعالانارى داۋسىز دەپ ويلايمىن. شىن مانىسىنە كەلگەندە نوبەل ادەبيەتكە ولشەم بولا المايدى. سوندىقتان ادەبيەتتى، ونەردى الەمگە تانىتۋ ءۇشىن اۋەلى ۇلتتىڭ الەمدەگى ورنىن بيىكتەتۋ كەرەك. بار بولعانى ون ميلليون عانا قازاق، ونىڭ جارتىسىنا جۋىعى ورىس ءتىلدى. سوندا ناقتى قازاقى وقىرمان ميلليونعا دا جەتپەيدى. ەگەر جان- سانىمىز كەم دەگەندە ەلۋ ميلليونعا جۋىقتاسا ءبىز جانىمىزداعى ورىستان دا، ىرگەدەگى قىتايدان دا الدە قايدا قۋاتتى بولار ەدىك. ويتكەنى ءبىز اۋەلدەن دانالىقتىڭ شىڭىنا شىققان حالىقپىز.
الەمدە اۆتورلىق كينو ادەبيەتپەن تىعىز بايلانىستى. كينونىڭ ادەبيەتپەن بايلانىسى كورەرمەنگە نە بەرەدى؟ كينوعا شە؟
- ارينە، بۇگىنگى ادامدار ءۇشىن كىتاپقا قاراعاندا كينونىڭ وتىمدىلىگى اۋقىمدى. دەيتۇرعامەن، ءبىر كىتاپقا سىيعان دۇنيە ەكى ساعاتتىق كينوعا سىيىپ كەتەدى دەۋ قيىن بولار. دەسە دە كينونىڭ دا ءوز قۇدىرەتى، بەينەلەۋى، جەتكىزۋى بار. وكىنىشكە قاراي بۇل سالا دا بىزدە كەنجە قالىپ تۇر. قازاق جازۋشىلارىنىڭ شىعارماسىنىڭ نەگىزىندە تۇسىرىلگەن كينولاردى ساۋساقپەن ساناپ الاسىڭ. ونى قويىپ ساپالى قازاق كينوسى ساناۋلى عانا. بۇل جاعىندا وزگەلەردەن كوپ قالىپ قالعان جايىمىز بار. بولماسا بىزدە دە كينوعا اينالدىرۋعا تاتىرلىق شىعارمالار جەتەرلىك. سونى كورەرمەنگە جەتكىزۋ - قاتارداعى قالام ۇستاعان جازۋشى مەن سەناريستىڭ بولماسا رەجيسسوردىڭ قۇزىرەتىندە ەمەس. ونى دا مەملەكەت قولداپ- قۋاتتاۋى كەرەك. ادەبيەتتىڭ كينوعا اينالۋى ونەردى اسىرماسا قۇنىن تۇسىرمەيتىنى انىق. كينو ونەرى تاريحى ءجۇز جىلعا تولماسا دا اداممەن قاتار جاساپ كەلە جاتقان ادەبيەتتەن قازىرگى تاڭدا وزىپ بارا جاتقانىن ەسكەرۋىمىز كەرەك. ادەبيەت پەن كينو ءبىرىن- ءبىرى تولىقتىراتىن ەگىز ۇعىمعا الدە قاشان اينالىپ ۇلگەردى. كوركەم ادەبيەتتى وقۋعا قۇلقى جوق كورەرمەندەر ءۇشىن كينو ارقىلى ساناسىنا ازدا بولسا ساۋلە شاشۋعا بولادى.
- «قاي جانر ادەبيەتتە جەتەكشى بولسا، باسقا جانرلار دا سوعان قاراي يكەمدەلە باستايدى» دەگەن باحتين. ءسىزدىڭ ويىڭىزشا قازاق ادەبيەتىندەگى جەتەكشى جانر قايسى؟ جانە ونىڭ باسقا جانرلارعا ىقپالى بار ما؟
- قالاي دەسەك تە قازاق ادەبيەتىندە پوەزيا كوش باستايدى. ويتكەنى ءبىزدىڭ ۇلتتىق بولمىسىمىزدىڭ ءوزى سول پوەزياعا جاقىن. سوسىن بىزگە جەتىپ، سانامىزعا قۇيىلعان ۇشان - تەڭىز مول مۇرامىزدىڭ كوپ بولىگى جىر تىلىندە ساقتالعان. سودان كەيىن دە ءبىزدىڭ بارلىق شىعارماشىلىعىمىز پوەزيالىق ۇلگىدە. ءبارى ءبىر قالىپتا، ءبىر ارنادا. وسىدان ەكى عاسىر بۇرىن وزگە ۇلت جازۋشىلارى قالىپتاستىرىپ كەتكەن يزمدەردىڭ بىزگە ءالى تولىق دەندەپ ەنىپ كەتە الماعانى، كۇنى بۇگىنگە دەيىن وقىرماندارىمىزدىڭ سول يزمدەردى جاتىرقايتىندىعى، سول پوەزيالىق ويمەن ويلايتىندىعىمىزدا بولسا كەرەك. ال بۇنىڭ ارتىقشىلىعى قازاق جازۋشىلارىنىڭ قايسىسى قالام ۇستاسا دا سول پوەزيالىق ويلاۋ جۇيەسىنەن الشاقتامايتىندىعىندا. ۇلت دىڭگەگىنە بايلاناتىندىعىندا بولسا كەرەك.
ب. ارىقباي
دەرەككوز: «قازاق ادەبيەتى» گازەتى. 2016- جىل
