نازىم قىزايباي باۋىرجان وسپانوۆ سالىپ بەرگەن ءۇيىن كورسەتتى - فوتو
قازاقپارات تىلشىسىنە ەكسكليۋزيۆتى سۋرەتتەرىن جولداعان سپورتشى جاڭا باسپانادا ءوزىنىڭ اتا-اناسى تۇراتىندىعىن ايتتى. 4 بولمەلى جاڭا شاڭىراق الماتى وبلىسى قاراساي اۋدانىنا قاراستى ىرگەلى اۋىلىندا سالىنعان. «باۋىرجان كەڭەسبەك ۇلى ءۇيدىڭ قۇرىلىسىن تولىقتاي اياقتاپ، كىلتىن تابىستادى. قازىر جيھازداردى الىپ، ىڭعايلانىپ جاتىرمىز. باۋىرجان اعانىڭ قامقورلىعىنا، سپورتقا دەگەن جاناشىرلىعىنا العىستان باسقا ايتارىم جوق. كولىكتى دە اپەردى، ەندى مىنە ءۇي سالىپ بەردى. ارتقان ءۇمىتتى اقتاۋعا بار كۇش-جىگەرىمدى جۇمسايمىن»، - دەپ سپورتشى قىز ءوز العىسىن ءبىلدىردى.
نازىم قىزايباي الماتى وبلىسى ىلە اۋدانى جەتىگەن اۋىلىندا دۇنيەگە كەلگەن. وتباسىندا 6 اعايىندى. ءوزى ءۇيدىڭ 3- بالاسى. 23 جاستاعى سپورتشى قىز قازىر سپورتتىق بابىندا. «جوسپارىمدا ءالى تۇرمىسقا شىعۋ دەگەن وي جوق. الداعى جارىستارعا دايىندالىپ ءجۇرمىن. مەن ءوزىم العاباستاعى جەكە پاتەرىمدە تۇرامىن. ال، باۋىرجان اعا سالىپ بەرگەن ۇيدە اتا-انام تۇرادى»، - دەدى نازىم قىزايباي. ەستەرىڭىزگە سالا كەتەيىك، نازىم قىزايباي الەۋمەتتىك جەلىدەگى جەكە پاراقشاسىنا جەرلەسى، بەلگىلى كاسىپكەر - باۋىرجان وسپانوۆ ءۇي سالىپ بەرگەنىن ايتىپ، العىسىن بىلدىرگەن ەدى:
«سالەمەتسىزدەر مە، مەنىڭ قۇرمەتتى ينستا وقىرماندارىم. مەن 2014 جىلى ءبىرىنشى رەت الەم چەمپيوناتىن ۇتقاندا باۋىرجان وسپانوۆ اعامىز ماعان كولىك سىيلاعان ەدى، ال 2016-جىلى مامىر ايىندا ءوزىمىزدىڭ استانادا وتكەن الەم چەمپيوناتىنىڭ جەڭىمپازى بولىپ، الەمنىڭ ەكى دۇركىن چەمپيونى اتانعاندا، ماعان جانە اتا-انا، باۋىرلارىما ۇلكەن ءۇي سالىپ بەرەمىن دەگەن ەدى. مىنە، قازىر سول ۇيگە كوشىپ كەلدىك. وسىنداي اعامىزعا بارلىق وتباسىمىزدىڭ اتىنان ۇلكەن راحمەت ايتقىم كەلىپ وتىر! وسىنداي باۋىرجان اعامىزداي، قازاقتىڭ سپورتقا دەگەن بارلىق جاعىنان كومەكتەسىپ، كوڭىل ءبولىپ جۇرگەن اعالارىمىزعا مىڭ دا ءبىر راحمەت!!! امان بولىڭىز، باۋىرجان اعا!».
ايتا كەتۋ كەرەك، سپورت جاناشىرى، جەتىسۋ جەرىنىڭ تۋماسى - باۋىرجان وسپانوۆقا قانات يسلام دا ءوز العىسىن جاۋدىرعان بولاتىن. جانە مەتسەنات ءوزىنىڭ جەرلەستەرىنە دە ەرەكشە قامقورلىعىن جاساۋدا. قازىر الماتى وبلىسى الاكول اۋدانى جىلاندى اۋىلىنىڭ حالقىنا بار جاعداي جاسالعان. اۋىلدا كينوتەاتر، سپورت زال، دەمالىس الاڭى، تويحانا سىندى وزگە دە حالىق ءۇشىن اسا قاجەتتى عيماراتتاردىڭ بارلىعىن كاسىپكەر باۋىرجان وسپانوۆ جوندەپ، ەل يگىلىگىنە بەردى. وقۋشىلارعا ساپالى ءبىلىم بەرۋ ماقساتىندا اۋىلعا قالانىڭ بىلىكتى ماماندارىن مەتسەنات ءوزى ارنايى شاقىرىپ، جاڭا باسپانا سالىپ، بارلىق جيھازعا دەيىن الىپ بەرگەن. جالاقىلارىن دا بىرنەشە ەسە وسىرگەن. مۇعالىمدەر قالادان تەك چەمودانمەن كەلگەندەرىن ايتادى.
اۆتور: سامال قابىشيەۆا
