ۇكىمەت قازاقستان ىشىندەگى اۋە تاسىمالىنىڭ تاريفتەرىن تەكسەرمەك

استانا. قازاقپارات - بۇگىن ۇكىمەت وتىرىسىندا ق ر پرەمەر- ءمينيسترى باقىتجان ساعىنتايەۆ قازاقستانداعى ىشكى اۋە تاسىمالدارىنداعى تاريفتەرگە قاتىستى تەكسەرۋدى تاپسىردى.

«اۆياتسيا سالاسىندا اۋقىمدى جۇمىستار ىسكە اسىرىلۋدا. وسى رەتتە ترانزيتتىك الەۋەت ارتىپ كەلەدى، ياعني استانا ارقىلى وتە كوپ رەيستەر شىعىپ جاتىر. بۇگىندە ەۋروپاعا، ونىڭ ىشىندە پاريجگە قاراي باعداردا كوبىنەسە قىتايلىق تۋريستەر ءبىزدىڭ رەيستەردى پايدالانۋدا. بۇل وتە جاقسى كورسەتكىشتەر، ءبىراق، سونىمەن بىرگە ەل ىشىندەگى تاريفتەرگە قاتىستى ماسەلە بار ەكەنىن بايقاپ وتىرمىز، اسىرەسە استانا- الماتى باعدارىنا قاتىستى. بۇل تۇرعىدا ق ر ۇلتتىق ەكونوميكا مينيسترلىگى ءتيىستى زەرتتەۋ شارالارىنا كىرىسكەن بولاتىن»، - دەپ توقتالدى ب. ساعىنتايەۆ.

 ءوز كەزەگىندە ق ر ۇلتتىق ەكونوميكا ءمينيسترى قۋاندىق بيشىمبايەۆ كەيبىر باعىتتار بويىنشا ەداۋىر تاريفتەر ءوسىمى بار ەكەنىن جەتكىزدى. وسى ورايدا ىشكى اۋە تاسىمالىنداعى استانا- ورال، استانا- الماتى باعدارلارىندا بۇنداي جاعداي بايقالىپ وتىرعان كورىنەدى. قازىرگى كەزدە تابيعي مونوپوليالاردى رەتتەۋ كوميتەتى تاسىمالدىڭ وزىندىك قۇنىن انىقتاۋعا تىرىسۋدا.

«وكىنىشكە قاراي، كومپانيالار رەيستەردى ورىنداۋدىڭ وزىندىك قۇنىنا بايلانىستى مالىمەتتەردى بەرۋدەن باس تارتۋدا. «سامۇرىق- قازىنا» ديرەكتورلار كەڭەسىنىڭ مۇشەسى رەتىندە رەسمي تۇردە قورعا، سايكەسىنشە ونىڭ ەنشىلەس كومپانياسىنا رەيستەردى ورىنداۋداعى وزىندىك قۇنىنا قاتىستى بارلىق ەسەپ- قيساپتى ۇسىنۋ تۋرالى ساۋال جولداعىم كەلەدى. وسى مالىمەتتەردەن كەيىن باعانى ءوسىرۋ قانشالىقتى نەگىزدى ەكەنى جايىندا شەشىم شىعارۋعا بولادى» - دەدى ق. بيشىمبايەۆ.

بۇل تۇرعىدا ۇكىمەت باسشىسى ب. ساعىنتايەۆ وسى باعىتتاعى شارالاردى سوڭىنا دەيىن جەتكىزىپ، زاڭ بۇزۋشىلىقتار ورىن العان جاعدايدا زاڭناماعا سايكەس، ءتيىستى شەشىم قابىلداۋ كەرەكتىگىن جۇكتەدى.

«ەير استانا» 2020 - جىلعا دەيىن 11 ەيرباس، 2 بوينگ 787 ساتىپ الماق. بۇل تۋرالى بۇگىن ۇكىمەت وتىرىسىندا ق ر ينۆەستيتسيالار جانە دامۋ ءمينيسترى جەڭىس قاسىمبەك ءمالىم ەتتى.

«قازىرگى ۋاقىتتا وتاندىق اۋە كومپانيالارى قازاقستان اۋماعى ارقىلى جىلىنا 250 مىڭ ترانزيتتىك جولاۋشىلاردى تاسىمالدايدى. بۇل 2010 - جىلعى كورسەتكىشتەن 10 ەسە كوپ. ورتاشا ەسەپپەن بارلىق ترانزيتتىك جولاۋشىلاردىڭ شامامەن 70 پايىزى ەلوردالىق اۋەجايعا كەلەدى. ياعني، 175 مىڭ ترانزيتتىك جولاۋشىلار استانا ارقىلى جانە 75 مىڭى الماتى ارقىلى وتەدى»، - دەدى ول.

ءمينيستردىڭ ايتۋىنشا، ترانزيتتىڭ ودان ارى ەسەلەنە تۇسۋىنە استانا اۋەجايىنىڭ جاڭا تەرمينالىن سالۋ، الماتىدا اۋە حابىن قۇرۋ، سونىمەن بىرگە حالىقارالىق جانە قازاقستاندىق اۆياكومپانيالاردى دامىتۋ ءوز سەپتىگىن تيگىزەتىن بولادى.

«ترانزيتتىڭ بارىنشا الەۋەتتى باعىتى وڭتۇستىك- شىعىس ازيا، قىتاي، ءۇندىستان جولاۋشىلارىنىڭ قازاقستان ارقىلى ءوتۋى بولىپ وتىر. وسى رەتتە «ەير استانا» كومپانياسى اۋە كەمەلەرى پاركىن كەڭەيتۋدى جوسپارلاۋدا.

2020 -جىلعا دەيىن ەيرباس 320 ۇلگىسىندەگى 11 اۋە كەمەسىن، 2019 -جىلعا دەيىن ۇزاق ماگيسترالدى ەكى بوينگ 787 ۇشاعىن جەتكىزۋ جوسپارلانۋدا»، دەدى قاسىمبەك.

اۆتور: رۋسلان عابباسوۆ