دوسحان جولجاقسىنوۆ: «قۇنانبايدى» تۇسىرۋگە اتسالىسقان ءتۇسىرىلىم توبىن جەڭىسىمەن قۇتتىقتايمىن

استانا. قازاقپارات - «قۇنانباي» فيلمىن تۇسىرۋگە اتسالىسقان ءتۇسىرىلىم توبىن جەڭىسىمەن قۇتتىقتايمىن، دەدى كارتينانىڭ رەجيسسەرى دوسحان جولجاقسىنوۆ تاريحي كوركەم فيلم حالىقارالىق كينوفەستيۆالدە جۇلدەلى ورىنعا ىلىككەن سوڭ.

ەسكە سالا كەتسەك، ش. ايمانوۆ اتىنداعى «قازاقفيلم» ا ق جارىققا شىعارعان «قۇنانباي» فيلمى ۋفا قالاسىندا قازاننىڭ 26-ى مەن 28- ءى ارالىعىندا وتكەن «كۇمىس اقبوزات» اتتى 3 - حالىقارالىق ۇلتتىق جانە ەتنيكالىق كينوفەستيۆالىندە ءامىر ءابدىرازاقوۆ اتىنداعى «ۇلتتىق رۋح» جۇلدەسىمەن ماراپاتتالدى.

«قۇنانباي» فيلمى - اتاقتى دالا كەمەڭگەرى، قارادان شىعىپ حان اتانعان ۇلى ابايدىڭ اكەسى - قۇنانباي وسكەنباي ۇلىنىڭ ونەگەلى ءومىرىنىڭ ءبىر كەزەڭىن قامتيدى. كارتينانىڭ رەجيسسەرى قازاقستاننىڭ حالىق ءارتيسى، مەملەكەتتىك سىيلىقتىڭ يەگەرى، قازاق مادەنيەتىنىڭ كورنەكتى قايراتكەرى، ونەر ارداگەرى دوسحان جولجاقسىنوۆ.

- شىعارماشىلىق توپتىڭ فيلمدى تۇسىرەردەگى ماقساتى: حالقىمىزدىڭ قۇندىلىقتارىن دارىپتەۋ ارقىلى، جاستاردىڭ بويىندا ۇلتتىق رۋحتى وياتۋ بولدى. ەندى مىنە، بۇگىندە ەڭبەگىمىزدى باعالانىپ جاتىر. كارتينانى تۇسىرۋگە اتسالىسقان ءتۇسىرۋ توبىن وسى جەڭىسپەن قۇتتىقتايمىن، - دەدى فيلمنىڭ رەجيسسەرى دوسحان جولجاقسىنوۆ.

اتاپ ايتا كەتەرلىگى، «قۇنانباي» تاريحي كوركەم فيلمى بىلتىر قىركۇيەك ايىندا پروكاتقا شىققان. وسى جىلدىڭ قىركۇيەك ايىندا رەسەيدىڭ ليپەتسك قالاسىندا وتكەن XII حالىقارالىق مۇسىلمان كينو فەستيۆالىنىڭ نەگىزگى بايقاۋىندا كورسەتىلگەن بولاتىن.

 ال 30 - قىركۇيەكتە «ەۋرازيا» كينوفەستيۆالى شەڭبەرىندە اتالمىش فيلم ۇلتتىق كينەماتوگرافيا ونەرى جانە عىلىمى اكادەمياسى تاعايىنداعان «تۇلپار» ۇلتتىق كينو جۇلدەسىمەن ماراپاتتالدى. باستى ءرولدى سومداعان اكتەر دوسحان جولجاقسىنوۆ «ەڭ ۇزدىك ەر ادام ءرولى» جۇلدەسىمەن، فيلمنىڭ كومپوزيتورى تولەگەن مۇحامەدجانوۆ «فيلمنىڭ ەڭ ۇزدىك مۋزىكاسى» جۇلدەسىمەن، ال كارتينانىڭ قويۋشى سۋرەتشىسى رۋستام ودينايەۆ «ەڭ ۇزدىك سۋرەتشى- قويۋشى جۇمىسى» جۇلدەسىمەن ماراپاتتالدى. سونىمەن قاتار، مارقۇم تالاسبەك اسەمقۇلوۆ جانە دوسحان جولجاقسىنوۆ جازعان فيلمنىڭ سسەناريى ۇزدىك دەپ تانىلدى.

 حالىقارالىق «كۇمىس اقبوزات» كينوفەستيۆالى الەم حالىقتارىنىڭ رۋحاني جانە مادەني قۇندىلىقتارىن ناسيحاتتاۋعا، ۇلتتىق جانە ەتنيكالىق باعىتتاعى فيلمدەردى ءتۇسىرۋشى كينەماتوگرافيستەر شىعارماشىلىعىن دارىپتەۋگە، رەسەي ايماقتارى جانە شەتەلدەرمەن مادەني قاتىناستى دامىتۋ ءۇشىن ارنايى جاسالعان. كينوفەستيۆال ۋفا قالالىق وكرۋگى اكىمدىگىنىڭ قولداۋىمەن باشقۇرتستان ۇكىمەتى مەن باشقۇرتستان رەسپۋبليكاسىنىڭ مادەنيەت مينيسترلىگى، «باشقۇرتستان» كينوستۋدياسىنىڭ ۇيىمداستىرۋىمەن وتەدى.