ەڭ قايىرىمدى جاندارعا ارنالعان «التىن جۇرەك» سىيلىعى تابىس ەتىلدى
2007 -جىلدان بەرى قازاقستانداعى ەڭ قايىرىمدى جانداردى ماراپاتتايتىن «التىن جۇرەك» سىيلىعى بيىل ونىنشى رەت ءوتىپ وتىر. «باۋىرجان» قايىرىمدىلىق قورىنىڭ ۇيىمداستىرۋىمەن قولعا الىنعان بۇل جوبا ەلىمىزدىڭ بارلىق ايماقتارىن قامتيدى.
«مەيىرىمدىلىك جان جىلۋى بار جەردە مەكەندەيدى. سوندىقتان مەن ءۇشىن حالىقتىڭ بۇل سىيلىق جايلى جىلى لەبىزدەرىن ەستىپ، قايىرىمدىلىق جولىندا جۇرگەن ادامداردىڭ جىل ساناپ ارتىپ كەلەتىنى قۋانتادى. بيىلعى 10 جىلدىق مەرەيتويلى سىيلىق ءوزىنىڭ شىنايى التىن جۇرەك يەگەرلەرىن تاپتى دەپ ويلايمىن»، دەپ اتاپ ءوتتى «التىن جۇرەك» سىيلىعىنىڭ باس ۇيلەستىرۋشىسى گۇلزات ساحوۆا.
سالتاناتتى ءراسىمنىڭ «جەتىم بالالارعا كورسەتكەن كومەگى ءۇشىن» اتتى العاشقى اتالىمنىڭ يەگەرى رادا حايرۋشيەۆا بولدى. قايىرىمدىلىق ىسپەن 2012 -جىلدان بەرى اينالىسىپ جۇرگەن رادا حايرۋشيەۆانىڭ پەرزەنتحاناداعى جاعدايى جوق انالارعا ءتۇرلى شارالار ۇيىمداستىرىپ، كيىم- كەشەكتەر جيناپ بەرەتىن باستاماسىنا ۋاقىت وتە كەلە ەرىكتى قالا تۇرعىندارى دا ات سالىسىپ، «قول ۇشى» اتتى مەيىربان جانداردان قۇرالعان توپ قۇرعان ەكەن. سول ۋاقىتتان بەرى 250 گە تارتا ءار ءتۇرلى جەتىم بالاعا كومەككە باعىتتالعان شارالار وتكىزىلگەن.
«مۇگەدەك جاندارعا كورسەتكەن قامقورلىعى ءۇشىن» اتتى ەكىنشى اتالىم بويىنشا «ءۇمىت- نادەجدا» قوعامدىق ۇيىمىنىڭ باسشىسى، I توپتاعى مۇگەدەك دۇيسەنعالي وسپانوۆ ماراپاتتالدى. وزدىگىنەن ءجۇرىپ- تۇرۋ مۇمكىندىگىنەن ايىرىلعان مۇگەدەك جاندارعا قولداۋ كورسەتۋ ءۇشىن 120 مۇمكىندىگى شەكتەۋلى ادامعا ارناپ ۇيىم قۇرعان دۇيسەنعالي وسپانوۆ «پوليگرافيالىق ديزاين» ، «تىگىن شەبەرلىگى» ، «اعىلشىن ءتىلى» سىندى تەگىن ءبىلىم كۋرستارىن ۇيىمداستىرعان. «مەن وزگە مۇمكىندىگى شەكتەۋلى جانداردىڭ جاعدايىن ءوزىم وسى جاعدايعا تۇسكەننەن سوڭ ءتۇسىندىم. سوندىقتان، قايىرىمدىلىقپەن اينالىسىپ، وسى جارىم- جان ادامداردىڭ ومىرگە دەگەن قۇلشىنىستارىن ارتتىرۋ جولىندا ەڭبەك ەتۋدى ماقسات تۇتتىم»، دەپ قۋانىشىمەن ءبولىستى دۇيسەنعالي وسپانوۆ.
قاراعاندى وبلىسى، ۇلىتاۋ اۋدانىندا 35 جىلدان استام ۋاقىت بويى مەديتسينا سالاسىندا قىزمەت ەتىپ جۇرگەن ۇلمەكەن قوجاسوۆا «دەنساۋلىق ساقتاۋ سالاسىنا قوسقان ۇلەسى ءۇشىن» اتالىمىمەن ماراپاتتالدى. ول مەديتسينانىڭ بارلىق ءتۇرى بويىنشا تەگىن قىزمەت كورسەتىپ، تالاي ادامدى اجال اۋزىنان اراشالاپ قالعان جان.
ال «ارداگەرلەرگە كورسەتكەن كومەگى ءۇشىن» اتالىمى الماتى قالاسىنىڭ تۇرعىنى، 1991 -جىلدان بەرى ارداگەرلەر ۇيىمىندا ەرىكتى بولىپ جۇرگەن، 2010 -جىلى «ميرينە» اتتى ۇيىم اشقان، ۇلى وتان سوعىسىنىڭ ارداگەرلەرىنە مەديتسينالىق، الەۋمەتتىك جاردەم كورسەتىپ تۇراتىن كۇلاش سارسەمبايەۆاعا بۇيىردى.
قازاق كۇرەسىنىڭ مايتالمانى جاقسىلىق ۇشكەمپىروۆ «سپورت سالاسىنىڭ دامۋىنا ۇلەس قوسقانى ءۇشىن» اتالىمى بويىنشا لاۋرەات اتاندى. جاقسىلىق ۇشكەمپىروۆ الماتى وبلىسىنداعى «مىڭبايەۆ» ەلدى مەكەنىندە بالاباقشا مەن كىشىگىرىم جاتاقحانا عيماراتىنىڭ بوي كوتەرۋىنە سەبەپشى بولعان. سونىمەن قاتار، كاسىپكەر اۋىل بالالارىنا سپورت مەكتەبىن سالىپ، بۇگىندە 300 دەي جاس جەتكىنشەكتىڭ سامبو، دزيۋدو، بوكس سياقتى سپورت تۇرلەرىمەن اينالىسۋىنا مۇمكىندىك بەرىپ وتىر. وليمپيادا چەمپيونى ساحنا تورىندە تاعى ءبىر مارتتىك تانىتىپ، ارباعا تاڭىلعان ەكى بيشىگە ءبىر- ءبىر تۇلپار اتادى.
ال ءوز قاراجاتىنا شۋ قالاسىندا زاماناۋي ەكى بالاباقشا سالعان كاسىپكەر نيكون كيم «ءبىلىم سالاسىنا قوسقان ۇلەسى ءۇشىن» جۇلدەسىنە لايىق دەپ تانىلدى.
جۇلدەلەر قاتارىنا كەيىنگى جىلدارى عانا قوسىلعان «قازاقستاننىڭ وركەندەۋىنە قوسقان ۇلەسى ءۇشىن» اتالىمى بويىنشا يرلانديادا قايىرىمدىلىق قورىنىڭ نەگىزىن سالۋشى فيونا كوركوران ماراپاتتالدى. ول قازاقستانعا ارنايى كەلىپ سەمەي قالاسىندا 30 ادامعا ارنالعان حوسپيس قۇرىلىسىنىڭ جۇزەگە اسىرىلۋىنا سەبەپشى بولعان. فيونا كوركوران بۇگىندە قازاقستاندىق حوسپيس تۇرعىندارىنا تۇراقتى تۇردە ماتەريالدىق كومەك قولىن سوزىپ تۇرادى.
ۇلكەن ىسكە - ۇلكەن ماراپات دەمەكشى، «مەيىرباندار كلۋبى» ارقىلى تانىمال بولعان گۇلميرا ابدىراشيەۆا «جىلدىڭ قايىرىمدى ادامى» اتاعىن يەلەندى. گۇلميرا ابدىراشيەۆا قۇرعان كلۋب قازاقستاننىڭ 7 ءىرى قالاسىندا 130 مىڭ ەرىكتىنىڭ باسىن بىرىكتىرىپ، جالعىزباستى قارت جاندارعا، تۇرمىسى تومەن وتباسىلارعا، كوپبالالى وتباسىلارعا، ءۇي- كۇيسىز قالعان جانۋارلارعا قامقورلىق كورسەتىپ، ءتۇرلى اۋقىمدى شارالار وتكىزىپ ءجۇر.
بيىلعى جىلدىڭ قايىرىمدىلىق جولىنداعى ەڭ ايتۋلى شاراعا جينالعان قاۋىم ەلىمىزگە بەلگىلى ونەرپازداردىڭ ءان- شاشۋىن تاماشالادى. ال ءانشى روزا رىمبايەۆا شىمكەنت قالاسىنان ارنايى شاقىرتۋ العان، كوز جانارىنان ايىرىلعان كىشكەنتاي قىزبەن بىرگە ءان سالىپ، ءبۇلدىرشىننىڭ ارمانىن ورىندادى.
ميرا بايبەك،
«ەگەمەن قازاقستان»
