كۇلەكبايەۆ سوتتا سوڭعى ءسوزىن ايتتى
بۇعان دەيىن حابارلاعانىمىزداي، الماتى قالاسى پروكۋرورىنىڭ ورىنباسارى جارقىنبەك باقاشبايەۆ كۇلەكبايەۆقا ءولىم جازاسىن سۇراعان بولاتىن. سوت تالقىلاۋىنىڭ 4- كۇنىندەگى جارىسسوزدە ءسوز سويلەگەن كۇلەكبايەۆ قانداي جازاعا بولسىن كونەتىنىن ايتتى، دەپ حابارلادى قازاقپارات ءتىلشىسى سوت زالىنان.
كۇلەكبايەۆ ءوز سوزىندە ءدىني ۋاعىز ايتا باستاپ ەدى الماتى قالاسى قىلمىستىق ىستەر جونىندەگى مامانداندىرىلعان اۋدانارالىق سوتىنىڭ سۋدياسى ەرلان بولاتوۆ ونى توقتاتىپ تاستادى.
«مەن نە ءۇشىن جاساعانىمدى ايتايىن؟ جاساعان ءىسىمدى مويىندايمىن. مەن بۇل قىلمىستى، سىزدەر اعا-باۋىرلارىڭىز، بالالارىڭىز قازا تاپقانىن ايتىپ وتىرسىزدار عوي. ولار دا مەنىڭ «سەسترالارىمدى»، «باۋىرلارىمدى» اللاھتىڭ زاڭىنسىز قيناعان، ادىلەتسىز سوتتاپ، سەمياسىنان ءبولىپ تاستادى. مەن سول سەبەپتەن وسىنى جاسادىم»، دەدى كۇلەكبايەۆ.
وسى سوزىنەن كەيىن سۋديا بولاتوۆ ونى تاعىدا توقتاتتى. «ءسىز مۇندا ۋاعىز ايتپاڭىز»، - دەدى ول.
«ماعان قانداي جازا قولدانىپ جاتىر، ءولىم جازاسى بولسىن، ماڭگىلىك وتىرعىزۋ جازاسى بولسىن ينشاللاھ سابىر ەتەمىن. ماعان قولدانعان زاڭ اسەر ەتپەيدى. اللاھ جاراتقان شىبىن شاقسا اسەر ەتەدى، قالعانى ءسوز»، - دەدى ول.
