شىڭعىسحاننىڭ ۇرپاقتارىنا قالدىرعان وسيەتىنىڭ قۇپياسى شەشىلدى
«اقىل كىلتى» قولجازباسى XIII- XIV عاسىرلارداعى كونە موڭعول تىلىندە جازىلعان. بۇل عىلىمعا بەلگىلى ەڭ ەجەلگى موڭعول قولجازبالارىنىڭ ءبىرى، - دەپ جازدى «كومسومولسكايا پراۆدا».
تاۋلى التاي مۇراجايى قىزمەتكەرلەرىنىڭ حابارلاۋىنشا، قولجازبا سۋترا ۇزىندىلەرىن قامتيدى. كوپ پاراعى جوعالىپ قالعان. عالىمداردىڭ پىكىرىنشە، قولجازبانى حات جازۋعا جاتتىعۋ ءۇشىن پايدالانعان بولۋى مۇمكىن. پاراقشالاردا ەجەلگى موڭعول ءالىپبيى مەن جازۋ ۇلگىسى بار.
ءماتىندى ءۇش ادام جازعانعا ۇقسايدى. مىسالى، ولاردىڭ ءبىرىنىڭ جازۋى ادەمى. عالىمدار بۇل مۇعالىمنىڭ نە جازۋعا ماشىقتانعان ادامنىڭ جازۋى ەكەنىن ايتادى. قالعان ەكى جازۋ جاڭا جازىپ ۇيرەنگەندەر سياقتى. ءماتىندى بامبۋك تاياقشالارىمەن جانە قىلقالاممەن جازعان. جوعارىدان تومەن قاراي جازىلعان كلاسسيكالىق موڭعول حاتى، جولدار وڭنان سولعا قاراي ورنالاسقان.
شىڭعىسحاننىڭ جولداۋىن ر ع ا س ب فيلولوگيا ينستيتۋتىنىڭ باس عىلىمي قىزمەتكەرى يرينا نيەۆسكايانىڭ باسشىلىعىمەن عىلىمي ديسسەرتاتسيا قورعاۋ اياسىندا گەرمانيالىق ۋنيۆەرسيتەتتىڭ ستۋدەنتى حەرلەن بولد شەشتى.
سۋترا بالالاردى تاربيەلەۋ كەزىندە تاپسىرما، وسيەت تۇرىندە اۋىزشا تاراتىلعان بولۋى مۇمكىن. باستاپقىدا ونى شىڭعىسحاننىڭ ءوزى ايتقان. اۋىزدان- اۋىزعا تاراپ، قولباسشىنىڭ جولداۋى قاتتى وزگەرىسكە ۇشىراعان.
جازبادا شىڭعىسحاننىڭ كەيىنگى ۇرپاققا كەڭەستەرى جازىلعان، وندا «سەنىمسىزدىك تۋدىرعان ادامعا سىرىڭدى اشۋدىڭ قاجەتى جوق» دەلىنگەن.
سونداي-اق شىڭعىسحان كەڭەستەرىندە «ايەلدەردىڭ سوزىنە اسا سەنبەۋگە» ۇندەگەن. «قۇل ارقىلى ۇلىڭا بۇيرىق بەرمە»، «جاۋىز نەمەسە ءىشى تار اداممەن كەڭەسپە»، «كوپشىلىك ادام ماقۇلداعاندى تەرىسكە شىعارما» دەگەن ۇزىندىلەر بار.
