يسلام كاريموۆتىڭ قازاسىنان كەيىنگى وزبەكستانداعى وزگەرىستەر
وزبەكستاننىڭ يسلام كاريموۆسىز تىرشىلىك ەتىپ جاتقانىنا ءبىر جارىم ايدان استى. ەلدى ۋاقىتشا شاۆكات ميرزيايەۆ باسقارىپ وتىر ءارى ول - پرەزيدەنتتىككە نەگىزگى كانديدات. ءبىراق ميرزيايەۆ پرەمەر- مينيستر قىزمەتىن قوسا اتقارىپ كەلەدى، نەگىزى، كونستيتۋتسياعا سايكەس، پرەزيدەنت مىندەتىن اتقارۋعا ونىڭ مۇلدە قۇقىعى بولماعان، ول مىندەت ۋاقىتشا سەنات سپيكەرىنە جۇكتەلۋى ءتيىس ەدى.
وزبەكستاننىڭ جاڭا باسشىسى بەرگەن العاشقى ۋادە - «يسلام كاريموۆ جۇرگىزگەن ساياساتتى جالعاستىرۋ». ءبىراق بۇل ۋادەگە قاراماستان، كەيىنگى ايدا ورتالىق ازيانىڭ حالىق ەڭ كوپ قونىستانعان ەلىندە كوبىنەسە جاعىمدى ءارى ءۇمىت كۇتتىرەتىن ءبىرتالاي وزگەرىستەر بولدى. ازاتتىق ولاردىڭ ەڭ ەلەۋلىلەرىنە شولۋ جاسادىق.
شاعىمداردى ونلاين جەلى ارقىلى قابىلداۋ
وزبەكستاننىڭ جاڭا باسشىسى ەنگىزىپ، اسىرەسە الەۋمەتتىك جەلىلەردە ەڭ كوپ تالقىلانعان جاڭالىقتاردىڭ ءبىرى - كەز كەلگەن ازامات شاعىم جازا الاتىن ۆەب- سايتتىڭ ىسكە قوسىلۋى. رەسمي دەرەككە قاراعاندا، نەبارى ەكى اپتا ىشىندە ميرزيايەۆتىڭ اتىنا 30 مىڭنان اسا ءوتىنىش- شاعىم تۇسكەن. ولاردىڭ ءبىر بولىگى ارىزدانۋشىلاردىڭ پايداسىنا شەشىلگەن. ەرتەرەكتە، كاريموۆتىڭ تۇسىندا وزبەكستاننىڭ قاراپايىم ازاماتىنىڭ پرەزيدەنتكە جۇگىنۋى مۇلدە مۇمكىن ەمەس بولاتىن.
ەندى اتقارىلعان جۇمىس جايلى ەسەپ پەن ازاماتتاردىڭ العىس حاتتارى جەرگىلىكتى ب ا ق پەن الەۋمەتتىك جەلىلەردە جاريالانادى. شاعىمداردى ۆيرتۋالدى قابىلداۋ قانشالىقتى ۇزاققا باراتىنى ءارى بۇل امال ميرزيايەۆتىڭ سايلاۋ كامپانياسىنىڭ ءبىر بولىگى مە، جوق پا - بۇل جاعى ازىرشە بەلگىسىز.
Facebook پاراقشا
وزبەكستاندا مەملەكەت باسشىسى اتىنان الەۋمەتتىك جەلىدە تۇڭعىش پاراقشا اشىلىپ، رەسمي تۇردە جۇرگىزىلە باستادى. وندا جاريالانعان جازبالاردىڭ كوبى ميرزيايەۆتىڭ ايماقتارعا ساپارى، شەتەل باسشىلارىمەن كەزدەسۋ ناتيجەلەرى، جاڭا جارلىقتارى، كادرلىق اۋىس- تۇيىستەر جانە شاعىمداردى ۆيرتۋالدى قابىلداۋ جۇمىسى جايلى باياندايدى، ءبىراق وزبەكستان ءۇشىن مۇنداي جاريالىلىق - بۇرىن كورمەگەن تاڭسىق دۇنيە. قازىرگە دەيىن پاراقشاعا 22 مىڭنان اسا ادام جازىلعان. بيلىك كاريموۆتىڭ تۇسىندا حالىقپەن تەلەۆيزيا جانە رەسمي سايتتار ارقىلى عانا تىلدەسەتىن.
كادرلىق اۋىس- تۇيىستەر
پرەزيدەنت وكىلەتتىلىگىن العاننان كەيىن پرەمەر- مينيستر تاشكەنت پەن ايماقتارداعى مەملەكەتتىك قۇرىلىم باسشىلارىن اۋىستىرا باستادى. از عانا ۋاقىت ىشىندە ول ەلدىڭ بىرنەشە وبلىسى مەن كادرلىق اۋىس- ءتۇيىس بولعان جەرلەردى ارالاپ شىقتى. ءبىر قىزىعى، كەزىندە يسلام كاريموۆتىڭ شەشىمىمەن قىزمەتىنەن كەتكەن شەنەۋنىكتەردىڭ كەيبىرى ميرزيايەۆتىڭ تۇسىندا باسشى ورىندارعا قايتا ورالدى.
سوندىقتان، كەي ساراپشىلار وزبەكستاننىڭ ۋاقىتشا باسشىسى «ءوزىن قازىردىڭ وزىندە پرەزيدەنت سەزىنىپ ءارى پرەزيدەنت رەتىندە ارەكەت ەتىپ»، بۇعان قوسا، الدا بولاتىن «قاعاز جۇزىندەگى» پرەزيدەنت سايلاۋى الدىندا ءوز بيلىگىن كادرلىق اۋىس- تۇيىستەر ارقىلى نىعايتىپ جاتىر دەپ سانايدى.
بيزنەس وكىلدەرىنە بەرىلگەن جەڭىلدىك
شاعىن جانە ورتا بيزنەس وكىلدەرىنە شاۆكات ميرزيايەۆ ولاردىڭ جاعدايىن جاقسارتقىسى كەلەتىنى جايلى ايقىن بەلگى بەرۋگە تىرىسىپ جاتىر. ول وزبەكستاندا كاسىپكەرلىك سۋبەكتىلەرىنىڭ قۇقىقتارى مەن زاڭدى مۇددەلەرىن قورعاۋعا وكىلەتتى ينستيتۋت، ياعني بيزنەس- ومبۋدسمەن سياقتى ورگان قۇرۋدى ۇسىندى. بۇعان قوسا، جاڭا بيلىك ءونىمىن شەتەلگە ەكسپورتتايتىن فەرمەرلەرگە دە بوستاندىق جاريالادى. ولار ەندى مەملەكەتكە ۆاليۋتالىق ءتۇسىمىنىڭ 25 پايىزىن عانا ساتۋعا مىندەتتى. ەرتەرەكتە بۇل كۆوتا 50 پايىز بولاتىن، سوندىقتان فەرمەرلەر ۆاليۋتا باعامى (وزبەكستاندا دوللاردىڭ رەسمي باعامى نارىق باعامىنان ەكى ەسە تومەن) كەسىرىنەن تابىسىنىڭ ءبىراز بولىگىنەن ايىرىلاتىن.
ايتپاقشى، يسلام كاريموۆتىڭ قازاسىنان كەيىن وزبەكستاندا ا ق ش دوللارىنىڭ رەسمي باعامى ءبىرىنشى رەت 3000 سۋمنان استى، ال تاشكەنتتەگى «قارا بازاردا» دوللار 6500 سۋمنان ساتىلادى. جاڭا بيلىك ۆاليۋتا ساياساتىن وزگەرتۋگە ازىرشە ەشقانداي قادام جاساعان جوق.
«تاتۋ كورشى» ساياساتى
وزبەكستاننىڭ جاڭا باسشىسى ەلدىڭ سىرتقى ساياساتىن دا وزگەرتە باستادى. ءبىر ايعا جەتپەي ول قازاقستان، قىرعىزستان جانە تاجىكستانمەن قارىم- قاتىناستى جاقسارتاتىن قادامدار جاسادى. يسلام كاريموۆ بيلىگىنىڭ سوڭعى جىلدارى قىرعىزستان، تاجىكستانمەن قاتىناس مۇلدە دەرلىك ءۇزىلىپ، وزبەكستاننىڭ ەكى ەلمەن قۇرلىق شەكاراسى جابىق بولاتىن.
قىرعىز- وزبەك شەكاراسىنداعى «دوستىق» بەكەتىندەگى وزبەكستان بيلىگى قىرعىز ازاماتتارىنا ءولىم- جىتىمگە عانا ەمەس، توي- تومالاققا دا كەلۋگە رۇقسات ەتكەننەن كەيىنگى جاعداي. 2016 -جىلدىڭ قازانى.
كاريموۆتىڭ قازاسىنان بىرەر كۇننەن كەيىن تاشكەنت قىرعىزستانمەن داۋعا تۇرتكى بولعان ۇڭگىرتاۋ تەرريتورياسىندا تۇتقىندالعان ءتورت قىرعىز ازاماتىن بوساتتى. ال كەيىنگى جىلدار ىشىندە العاش رەت وزبەكستاننىڭ ءاندىجان قالاسىنا قىرعىزستاندىق شەنەۋنىكتەر مەن جۋرناليستەردىڭ ۇلكەن دەلەگاتسياسى كەلدى. قازان ايىنىڭ باسىندا تاجىكستاننىڭ حۋدجاند قالاسىنا دا وزبەكستاننان ءدال وسىنداي دەلەگاتسيا باردى. بۇرىن تاشكەنت كورشى ەلدەرگە مۇنداي دوستىق پەيىل ەشقاشان تانىتپايتىن.
ازاماتتىقتان شىعۋعا بەرىلگەن رۇقسات
ميرزيايەۆ ازاماتتىق تۋرالى زاڭعا ازاماتتىقتان باس تارتۋ جانە ودان ايىرۋعا نەگىز بولاتىن جايتتاردى ناقتىلايتىن تۇزەتۋلەر ەنگىزدى. ەرتەرەكتە زاڭدا مۇنداي نەگىزدەر مۇلدە قاراستىرىلماعان بولاتىن، سوندىقتان وزبەكستان تۇرعىندارىنىڭ ەل ازاماتتىعىنان باس تارتۋ مۇمكىندىگى بولماعان. ەندى وزگە مەملەكەتتىڭ ازاماتتىعىن الۋ وزبەكستان ازاماتتىعىنان باس تارتۋعا نەگىز بولا الادى. بۇعان قولىندا رەسەي ءتولقۇجاتى بار ءارى وزبەكستان ازاماتتىعىنان باس تارتۋ مۇمكىندىگىن كوپ جىل كۇتكەن ميگرانتتار قۋانىپ جاتىر.
«تىيىم سالىنعان» ارتيستەرگە كەڭشىلىك بەرۋ
كەيىنگى جىلدارى كونسەرت بەرۋىنە نەمەسە تەلەۆيدەنيە، راديوعا شىعۋىنا شەكتەۋ قويىلعان شەرالى جۋرايەۆ، يۋلدۋز ۋسمانوۆا جانە وبيد اسوموۆ سياقتى بىرنەشە تانىمال ارتيست ساحناعا قايتا ورالدى. الگى تىيىمدى الىپ تاستاۋعا ناقتى نە تۇرتكى بولعانى ازىرشە بەلگىسىز. ءبىراق جۋىردا يۋلدۋز ۋسمانوۆا وزبەكستان وپپوزيتسياسىن سىناپ سويلەگەن ەدى.
«ميرزيايەۆتىڭ » كەرىگى
تاشكەنتتىڭ حايۋاناتتار باعىندا وزبەكستان تاريحىندا العاشقى جيراف پايدا بولدى. «شەتەلدىك» جانۋاردى قازان ايىنىڭ باسىندا كورشى قازاقستاننان اكەلگەن. الەۋمەتتىك جەلىلەردەگى وزبەكستاندىق قولدانۋشىلار «الاتاۋدى» (جانۋاردىڭ اتى - رەد. ) شاۆكات ميرزيايەۆتىڭ ءوزى اكەلىپتى» دەپ ازىلدەپ جاتىر. ءبىراق تاشكەنتكە جيرافتىڭ كەلۋىنە وزبەكستاننىڭ جاڭا باسشىسىنىڭ قاتىسى بار ما، جوق پا - ازىرشە بەلگىسىز.
ءبىراق وزبەكستاننىڭ جاڭا باسشىلىعى ءسوز ەركىندىگىنە قىسىم جاساۋ، وپپوزيتسيانى قۋدالاۋ جانە ادام قۇقىعىن جاپپاي بۇزۋ سياقتى باتىس ەلدەرى ساياساتكەرلەرى مەن حالىقارالىق قۇقىق قورعاۋ ۇيىمدارى ەلدىڭ ءبىرىنشى پرەزيدەنتىن ۇنەمى سىناپ كەلگەن ءبىراز نارسەلەردى وزگەرتۋگە ازىرشە اسىعار ەمەس.
وزبەكستاندا ازاتتىقتىڭ وزبەك قىزمەتى مەن BBC سايتتارى ءالى جابىق تۇر. الەمنىڭ ەكى ەلى - سولتۇستىك كورەيا مەن وزبەكستاندا عانا قولدانىلاتىن «ەلدەن شىعۋ ۆيزاسى» ءالى كۇنگە جويىلماعان. بۇعان قوسا، ونداعان مىڭ ستۋدەنت پەن بيۋدجەت سالاسى قىزمەتكەرلەرى مەملەكەتتىك پلانتاتسيالاردا ماقتا جيناۋعا ءماجبۇر. ساياسي تۇتقىنداردىڭ تاعدىرىمەن ەشكىمنىڭ شارۋاسى جوق، ال يسلام كاريموۆتىڭ تۇسىندا تۇرمەگە وتىرعىزىپ ۇلگەرمەگەن وپپوزيتسيا وكىلدەرى شەتەلدە جۇمىس ىستەيدى.
ماقتا تەرۋگە بارا جاتقان ستۋدەنتتەر. وزبەكستان، 2016 -جىلدىڭ قىركۇيەگى.
وزبەكستاننىڭ تۇڭعىش پرەزيدەنتى قىركۇيەكتىڭ 2- كۇنى ينسۋلتتان قايتىس بولعان. مەملەكەتتىڭ جاڭا باسشىسىن سايلاۋ جەلتوقساننىڭ 4-ىندە ءوتۋى ءتيىس. پرەزيدەنت سايلاۋىنا شاۆكات ميرزيايەۆتەن وزگە، ءبىراق وعان قاراعاندا ونشا تانىمال ەمەس تاعى ءۇش كانديدات تۇسەتىن بولادى.
تولقۋن ۋماراليەۆتىڭ ماقالاسى ورىس تىلىنەن اۋدارىلدى.
«ازاتتىق» جاڭالىقتارى
