حالىقارالىق لاڭكەستىك اتوم ەلەكتر ستانسالارىنا قاۋىپ ءتوندىرىپ تۇر ما

استانا. قازاقپارات - حالىقارالىق لاڭكەستىكتىڭ جايىلۋىنا بايلانىستى سىن-قاتەرلەردىڭ ءبىر پاراسى الەمدەگى اتوم ەلەكتر ستانسالارىمەن بايلانىستى بولىپ وتىر.

بۇل تۋرالى بۇگىن استانادا «ن. نازاربايەۆتىڭ «الەم. 21-عاسىر» مانيفەسى جانە قازىرگى زاماننىڭ جاھاندىق سىن- قاتەرلەرى» اتتى ساياسات تانۋشىلار حالىقارالىق كونگرەسىندە عالىم ءادىل احمەتوۆ ءمالىم ەتتى، دەپ حابارلايدى قازاقپارات.

«20- عاسىردا جاپپاي قىرىپ جوياتىن يادرولىق قارۋلار تەك الپاۋىت ەلدەردىڭ عانا ۋىسىندا بولسا، بۇگىنگى تاڭدا ونداي قارۋ شىعارۋعا تەحنيكالىق مۇمكىندىكتەرى جەتكىلىكتى مەملەكەتتەردىڭ سانى 40 قا جەتىپ وتىر جانە ولاردىڭ اراسىندا ەكونوميكالىق تۇرعىدان ءالسىز ەلدەر دە بارشىلىق. بۇل قاي تۇرعىدان بولماسىن وتە قاۋىپتى سىن- قاتەر ەكەنى داۋ تىعىزبايدى. ويتكەنى، ءتۇپتىڭ تۇبىندە بۇل كۇللى وركەنيەت پەن ادام بالاسىنىڭ تەگىس جويىلىپ كەتۋىنە اپاراتىن تۇيىق تا، قاتەرلى جول»، - دەپ توقتالدى عالىم.

وسى ورايدا ول ۇستىمىزدەگى جىلى ۆاشينگتوندا وتكەن ءتورتىنشى انتيادرولىق سامميتتىڭ مىنبەرىنەن سويلەگەن پرەزيدەنت نۇرسۇلتان نازاربايەۆتىڭ ۇندەۋى كوپشىلىكتىڭ قولداۋىنا يە بولىپ، وتە ماڭىزدى پىكىرتالاسقا ۇلاسقانىن اتاپ ءوتتى.

«حالىقارالىق لاڭكەستىكتىڭ ەتەك الۋىمەن بايلانىستى ەندىگى اپات، سىن- قاتەرلەردىڭ ءبىر پاراسى الەمدەگى اتوم ەلەكتر ستانسالارى دەسەك، مۇلدە ارتىق ايتقاندىق ەمەس. ويتكەنى، ۇستىمىزدەگى جىلى لاڭكەستەردىڭ بەلگياداعى اتوم ەلەكتر ستانساسىن جارماق بولعان ارەكەتى بۇعان ناقتى دالەل بولا الادى. بۇل تۇرعىدان كەلگەندە، بۇگىنگى تاڭدا الەمنىڭ 31 ەلىندە ەلەكتر قۋاتىن وندىرەتىن 192 اتوم ەلەكتر ستانسالارىنىڭ بارلىعى دا وسى سىن- قاتەرلەردىڭ نىساندارىنا جاتاتىنى كۇمان تۋدىرماسا كەرەك. وسى نىسانداردا قازىرگى كەزدە 438 ەنەرگيالىق بلوك قۋات وندىرەدى. بۇل ءتىزىمنىڭ باسىندا ا ق ش، فرانسيا، رەسەي، ۇلى بريتانيا، جاپونيا جانە باسقالار تۇر. بۇگىنگى تاڭدا الگىلەردەن بولەك تاعى دا 72 يادرولىق بلوك ىسكە قوسىلىپ جاتىر. ولاردىڭ كوپشىلىگى قىتايدا (28)، رەسەيدە (10)، ءۇندىستان (6)، وڭتۇستىك كورەيادا (5) جانە باسقا ەلدەردە»، - دەدى ءا. احمەتوۆ.

سونىمەن قاتار عالىم يادرولىق ءقاۋىپ تە، يادرولىق قالدىقتار دا اتالمىش بلوكتارمەن قاتار ۇلعايىپ كەلە جاتقانىن جەتكىزدى.

«ءدال وسى ماسەلەدە ەلباسىنىڭ «21-عاسىر: سوعىسسىز الەم» مانيفەسىنىڭ ءمانى زور. بۇل عالامدىق قۇجاتتا مەملەكەت باسشىسى قازىرگى زامانداعى سىن- قاتەرلەردى وتە سالماقتى دايەكتەرمەن دالەلدەگەن»، - دەدى ول.