ءدىنىمىز بويىنشا جامان ءتۇس كورگەندە نە ىستەۋ كەرەك

 استانا. قازاقپارات - ادامنىڭ كورگەن ءتۇسى ونىڭ ومىرىنە اسەر ەتەدى. ال ونىڭ اسەرى كوبىنەسە جورىعانعا بايلانىستى. قازاقتا «ءتۇستى كورۋىنەن ەمەس، جورۋىنان» دەگەن جاقسى ءسوز بار.

 ارداقتى پايعامبارىمىزدىڭ دا ءوز تۇستەرىن جورىعانىن بىلەمىز. مىسالى، ءاناس يبن ماليكتەن (ر. ا. ) جەتكەن مىناداي ءبىر حاديس بار. ول: «اللا ەلشىسى (س. ع. س. ) : «ءبىر ءتۇنى ءتۇس كوردىم. مەن ۋقبا يبن ءرافيعتىڭ اۋلاسىندا ەكەنمىن دەيمىن. سوندا بىزگە يبن تابتىڭ جاس پىسكەن قۇرمالارىنان بىرنەشە قۇرما اكەلىندى. مەن مۇنى وسى دۇنيەدە جوعارى ورلەيتىنىمىزگە، اقىرەتتە يگى ناتيجەگە جەتەتىنىمىزگە جانە ءدىنىمىزدىڭ كوركەيەتىندىگىنە جورىدىم» ، -  دەدى» ، -  دەگەن (ساحيح ءمۇسليم) . كوردىڭىز، ءتۇستى يگىلىككە جورىعان. ءتۇس دورۋدا دۇنيە عانا ەمەس، اقىرەت تە نازارعا الىنعان. بۇل، البەتتە، ءتۇس تۋرالى وتە تەرەڭ تۇسىنىك.

 ال ەندى كەيدە ادامداردىڭ ءوز تۇسىنەن شوشىپ جۇرگەنىن دە كورەمىز. ولارعا دا اللا ەلشىسىنەن (س. ع. س. ) جەتكەن وسيەت بار. ءابۋ ءسالامادان جەتكەن حاديستە بىلاي دەلىنەدى. ول: « ءابۋ قاتادانىڭ (ر. ا. ) : «اللا ەلشىسىنىڭ (س. ع. س. ) : «يگى ءتۇس -  اللادان، ال شىم- شىتىرىق ءتۇس -  شايتاننان. الدەكىم وزىنە ۇنامايتىن ءتۇس كورسە، سول جاعىنا ءۇش رەت دەم ۇرلەسىن جانە ونىڭ كەسىرىنەن اللاھقا سيىنىپ پانا سۇراسىن، سوندا ول وعان ەشقانداي زيان كەلتىرمەيدى» ، -  دەگەنىن ءوز قۇلاعىممەن تىڭدادىم» ، -  دەپ ايتقانىن ەستىدىم» ، -  دەگەن (مۇحتاسار ساحيح ءمۇسليم، Ⅱتوم، 210-بەت. حاديس № 1522) .

بۇل مۇسىلمان ومىرىندە ءتۇس كورۋدىڭ دە وزىندىك ادەبى بار ەكەنىن كورسەتەدى. وسى ءحاديستى وقىپ بىلگەن سوڭ، قانداي ءتۇس كورسەڭىز دە، ۋايىمداماساڭىز بولادى. كورگەن ءتۇسىڭىزدى تەك قانا جاقسىلىققا جوريسىز. ناشار ءتۇس كورسەڭىز لاعىنەتى شايتاننان اللاعا سىيىنىپ، سول جاعىڭىزعا تۇكىرەسىز. بار بولعانى وسى.

 

اسىلبەك اۋەزحان ۇلى