داريعا نازاربايەۆا ءوزىنىڭ اتى اتالعان جالعان جارناماعا قاتىستى پىكىرىن ايتتى
بۇل تۋرالى بۇگىن ق ر پارلامەنت سەناتىندا تىلشىلەرگە بەرگەن سۇحباتىندا دەپۋتات داريعا نازاربايەۆا ءمالىم ەتتى، دەپ حابارلايدى قازاقپارات.
ايتا كەتەيىك، بۇدان بۇرىن عالامتوردا سەنات دەپۋتاتى د. نازاربايەۆانىڭ ەلەكتر ەنەرگياسىن ۇنەمدەيتىن قۇرالدى جارنامالاۋعا قاتىستى جالعان سۇحباتى تاراعان ەدى. شىن مانىندە دەپۋتاتتىڭ بۇل قۇرالدىڭ جارناماسىنا ەش قاتىسى جوق بولىپ وتىر.
«ءدال قازىر بۇل ماسەلە بويىنشا تۇسىنىكتەمە بەرۋ قيىنداۋ، سەبەبى بۇل تۇرعىدا زەرتتەۋ جۇرگىزۋ كەرەك. ينتەرنەت، الەۋمەتتىك جەلىلەر قارقىندى دامىپ كەلە جاتقان جاعدايدا وسى تەكتەس جالعان سۇحباتتار مەن قانداي دا ءبىر ارانداتۋشىلىق ماسەلەلەر بويىنشا كەز كەلگەن ادام قۇربان بولۋى مۇمكىن. بۇنداي فاكتىلەر بۇگىندە وسى سالانى رەتتەيتىن زاڭناماعا جاڭا كوزقاراسپەن قاراۋعا ماجبۇرلەيدى. ينتەرنەت جەلىسىنەن ەلەكتر ەنەرگياسىن ۇنەمدەيتىن قانداي دا ءبىر تەحنولوگيا مەنىڭ اتى- ءجونىم ارقىلى جارنامالانىپ جۇرگەنىن بايقادىم. ەندى بۇل ماسەلەنىڭ ءمان- جايىن تەكسەرۋ كەرەك»، - دەدى د. نازاربايەۆا.
وسى رەتتە دەپۋتات ءونىمدى شىعاراتىن جانە بۇنداي الاقول جارنامامەن اينالىساتىن كومپانياعا جاۋاپكەرشىلىكتى جۇكتەۋ قاجەت ەكەنىن اتاپ ءوتتى.
