راحتىڭ ءىسى بويىنشا ايىپتالۋشى يزرايل ازاماتشاسى جابىرلەنۋشىنىڭ ۇستىنەن ارىزداندى

الماتى. قازاقپارات - ءسان الەمىندە تانىمال كاسىپكەر ليديا راحتىڭ ءىسى بويىنشا تاعى ءبىر ايىپتالۋشى، يزرايل ازاماتشاسى ميري پاز جابىرلەنۋشى حامرو سۋۆانوۆتىڭ ۇستىنەن ارىز ءتۇسىردى.

بۇل تۋرالى ميري پازدىڭ ادۆوكاتى ناتاليا گۋتاروۆا ايتتى، دەپ حابارلادى قازاقپارات ءتىلشىسى.

«پازدىڭ ارىزى نەگىزىندە حامرو سۋحانوۆقا قاتىستى الاياقتىق جاسادى دەگەن كۇدىكپەن قىلمىستىق ءىس قوزعالدى. ازىرگە ەشقانداۋ تەرگەۋ امالدارى باستالعان جوق»، - دەدى ن. گۋتاروۆا.

بۇعان دەيىن حابارلانعانداي، سوت ادام ۇرلادى دەپ ايىپتالىپ وتىرعان ليليا راح پەن ميري پازدىڭ ادۆوكاتتارى جازعان ءوتىنىمحاتتى قاناعاتتاندىرمادى. وندا ايىپتالۋشىلاردىڭ قورعاۋشىلارى راح پەن پازدى ءۇي قاماققا نەمەسە كەپىلدىك ارقىلى بوساتۋدى سۇراعان.

ءىستى قاراعان سۋديا قۋانىش ءارىپجانوۆ باستى سوت وتىرىسىن 21 -قازانعا بەلگىلەپ، 15 -جەلتوقسانعا دەيىن ايىپتالۋشىلاردى قاماۋدا ۇستاۋ مەرزىمىن ۇزارتتى.

بۇعان دەيىن حابارلانعانداي، 2016 -جىلدىڭ 9 -شىلدەسىندە 33 جاستاعى وزبەكستان ازاماتىنىڭ جوعالىپ كەتكەندىگى تۋرالى پوليتسياعا ارىز تۇسكەن.

كەشەندى تەكسەرۋ شارالارى بارىسىندا ايىپتالۋشىلاردىڭ وزبەكستان ازاماتىن ۇرلاپ، قالاداعى جالدامالى پاتەرلەردىڭ بىرىندە قاماۋدا ۇستاعىنى انىقتالدى. پوليتسيا قىزمەتكەرلەرىنىڭ جەدەل ارەكەتىنىڭ ارقاسىندا جابىرلەنۋشى قامالعان مەكەن جاي انىقتالىپ، ول امان- ەسەن بوستاندىققا شىعارىلعان ەدى. وسى ىسكە قاتىسى بار دەگەن كۇدىكپەن ءتورت ادام ۇستالدى. ولار: ليليا راح، ميري پاز، يسلام مەسيروۆ جانە باقىت شالبايەۆ.

اۆتور: الماس مۇقاش ۇلى