تالدىقورعاندا باقىتبەك ەسەنتايەۆقا قاتىستى سوت وتىرىسى باستالدى - كەسكىن

تالدىقورعان. قازاقپارات - تالدىقورعاندا باقىتبەك ەسەنتايەۆقا قاتىستى سوت وتىرىسى باستالدى دەپ، حابارلايدى قازاقپارات ءتىلشىسى.

الماتى وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ عيماراتىندا ءىس جابىق رەجيمدە ءوتىپ جاتىر. ءوزىنىڭ كولىگىندە جۇبايىن زورلاپ، بىرنەشە جەردەن پىشاقتاعان باقىتبەك ەسەنتايەۆ بىرنەشە قىلمىستىق باپ بويىنشا ايىپتالۋدا.

ب. ەسەنتايەۆ ق ر ق ك- نىڭ 24-باپ 3- ءبولىمى، 99-باپتىڭ 2- ءبولىمى 10-تارماعى (زورلاۋمەن نەمەسە سەكسۋالدىق سيپاتتاعى زورلىق-زومبىلىق ارەكەتتەرىمەن ۇشتاسقان ادام ولتىرۋگە وقتالۋ) 120-باپتىڭ 1- ءبولىمى (زورلاۋ) 121-باپتىڭ 1- ءبولىمى (سەكسۋالدىق سيپاتتاعى زورلىق- زومبىلىق ارەكەتتەرى) بويىنشا ايىپ تاعىلعانى بەلگىلى بولدى.

وسى ۋاقىتتا القا بيلەر مۇشەلەرى انىقتالىپ جاتىر.

ەستەرىڭىزگە سالا كەتەيىك، بايان ماقسات قىزى ماۋسىمنىڭ ونى كۇنى بىرنەشە جەردەن پىشاقتالىپ، اۋىر جاراقاتپەن تالعار اۋدانىنداعى اۋرۋحاناعا تۇسكەن بولاتىن. بەلگىلى پروديۋسەر، ەكى بالانىڭ اناسى بايان ماقسات قىزىن ءوزىنىڭ كۇيەۋى ولتىرمەك بولدى دەگەن كۇدىكپەن باقىتبەك ەسەنتايەۆ ۇستالىپ، قاماۋعا الىندى. سونداي-اق قازىرگى تاڭدا بايان بۇرىنعى تەگىنە قايتا ورالعان سىڭايلى. ول الەۋمەتتىك جەلىدەگى پاراقشالارىنا بايان ماقسات قىزى دەگەن وزگەرىس ەنگىزگەن.

 

اۆتور: سامال قابىشەۆا